Kɛ Zezi yili atrɛ kun mannin sran kpanngban be aliɛ’n, ɔ yoli sran’m be fɛ dan. I sɔ’n ti’n, be seli kɛ: “Nanwlɛ, Ɲanmiɛn nuan ijɔfuɛ nga be seli kɛ ɔ́ bá mɛn’n nun’n, yɛ ɔ o yɛ.” Yɛle kɛ be waan i yɛ ɔ ti Mesi’n niɔn. Asa ekun’n, be waan sɛ ɔ yo be famiɛn’n, ɔ́ yó be ye dan. (Zan 6:14; Mmla’n 18:18) I sɔ’n ti’n, be kunndɛli kɛ bé trɛ́ i naan bé síe i famiɛn.

Sanngɛ Zezi wunnin akunndan nga be bu’n i wlɛ. I sɔ’n ti’n, ɔ kannin sran’m be bo, kpɛkun ɔ seli i sɔnnzɔnfuɛ mun kɛ be fu alie’n nun naan be wɔ. ?Yɛ ninfan yɛ bé wá kɔ́-ɔ? Bé dún mmua kɔ́ Bɛtsaida naan i sin b’a wɔ Kapɛɛnaɔmun. Zezi liɛ’n, w’a fuman alie’n nun wie. I ngunmin ɔli oka kun su kɔnguɛ sɔ’n nun ko srɛli Ɲanmiɛn.

Kɛ Zezi o oka’n su lɔ’n, ɔ wun alie nga i sɔnnzɔnfuɛ’m be o nun’n. Afin anglo ba’n ta kpa, yɛ aliɛ su wa cɛn. Ɔ wunnin kɛ aunmuan dan kpa kun su fita jenvie’n su, naan “alie’n i kanlɛ’n ti kekle [akoto’m] be sa nun. Afin aunmuan’n fin be ɲrun yɛ ɔ ba-ɔ.” (Marki 6:48) Zezi fin oka’n su lɔ jrali, kpɛkun ɔ nantili nzue’n su ɔli be wun lɔ. Kɛ ɔ́ yó sɔ’n, nn i sɔnnzɔnfuɛ’m ‘b’a kan alie’n b’a ɔ kilo nnun annzɛ nsiɛn.’ (Zan 6:19) Sanngɛ ɔ yoli Zezi i sɔnnzɔnfuɛ’m be kɛ Zezi su san be wun sa. Ɔ maan srɛ kunnin be naan b’a kpan kpa liɛ su. Be seli kɛ: “Aolia nun like-ɔ!”​—Marki 6:49.

Yɛ Zezi seli be kɛ: “An gua amun wla ase! Min-ɔn. Nán srɛ kun amun.” Piɛli tɛli i su kɛ: “E Min, sɛ wɔ’n, se min kɛ n nanti nzue’n su n to ɔ lɔ.” Zezi seli kɛ: “Bla!” Yɛ Piɛli fin alie’n nun jrali-ɔ. Kpɛkun ɔ nantili nzue’n su ɔli Zezi wun lɔ. Sanngɛ kɛ ɔ wunnin kɛ aunmuan’n fita dan’n, srɛ kunnin i, yɛ ɔ boli mlɔnlɛ bo-ɔ. I sɔ’n ti’n, ɔ kpannin. Ɔ seli kɛ: “E Min, de min-o!” Zezi tinngɛli i sa’n nun sɔli i nun ba, naan w’a se i kɛ: “A lafiman min su kpa. ?Ngue ti yɛ wɔ akunndan’n wa yoli nɲɔnnɲɔn-ɔn?”​—Matie 14:27-31.

Kɛ Piɛli nin Zezi be fuli alie’n nun’n, yɛ aunmuan dan’n yacili fitalɛ-ɔ. I sɔ’n boli i sɔnnzɔnfuɛ’m be nuan dan. Sanngɛ ɔ fataman kɛ i sɔ’n bo be nuan. Afin icra’n, Zezi yili atrɛ. Ɔ mannin sran kpanngban aliɛ. Ɔ maan sɛ ɔ ti kɛ ‘be wunnin abonuan sa ng’ɔ fali kpanwun mun yoli’n, i cinnjin m’ɔ ti’n i wlɛ’n,’ nn nantilɛ mɔ Zezi nantili nzue’n su’n, ɔ nin aunmuan’n m’ɔ yoli maan ɔ yacili fitalɛ’n, b’a boman be nuan. Sanngɛ b’a wunmɛn i wlɛ. I sin’n, be kotoli i bo naan b’a se i kɛ: “A ti Ɲanmiɛn Wa sakpa.”​—Marki 6:52; Matie 14:33.

Kɛ be kpɛli nzue’n, be bali Zenezarɛti lɛ. Lika sɔ’n wo Kapɛɛnaɔmun i ngua lɔ. Lɔ asiɛ’n yo like ye kpa. Be sili be alie’n ce’n su lɛ. Kɛ be fin alie’n nun jrali cɛ’n, sran’m be wunnin Zezi i wlɛ. Ɔ maan klɔ sɔ’n i sufuɛ mun nin be nga be fin klɔ nga be mantan lɛ’n be su’n, be ko fali be sran nga be wunnɛn yo be ya’n be bali. Kɛ tukpacifuɛ’m be kɛn i tralɛ’n i nuan njɔlɛ bɔbɔ cɛ’n, kpɛkun be yo juejue.

Blɛ sɔ’n nun’n, be nga be wunnin kɛ Zezi yili atrɛ mannin sran kpanngban aliɛ’n, be wunnin kɛ Zezi w’a wɔ. Ɔ maan kɛ alie kanngan wie’m be fin Tiberiadi be bali’n, be fuli nun kpɛkun be ɔli Zezi kunndɛlɛ Kapɛɛnaɔmun lɔ. Kɛ be wunnin i’n, be usɛli i kɛ: “?Rabi, blɛ onin nun yɛ a juli wa-ɔ?” (Zan 6:25) Sanngɛ kɛ é wá fá wún i sa’n, Zezi ijɔli be. Sɛ ɔ yoli sɔ kusu’n, i ndɛ yo fɛ.