Ngul asimba Yésus a nga bo na a ve betoyini be bôte bidi é nga nambe be abui. Ba su’ulane jô na, “nyina a ne fo’o nkulu mejô be nga jô na a ye zu si nyô,” Messie émien, a ba yene na a ye bo mbamba njô bôt. (Jean 6:14; Deutéronome 18:18) Ane bôte ba taté na ba bondé fe’e ya telé Yésus ane njô bôt.

Ve, éyoñe Yésus a yemelaneya jame ba bondé, a suu nsamba bôt a kate fe beyé’é bé na be bet éfunga. Nne ba ke vé? Ba yiane ke mfa’a ya Bethsaïda, mvuse ya valé ba ke mfa’a ya Capernaoum. Yésus émiene ki a kôlô, a bete nkôl na a ke ye’elan étam alu ete ébien.

E dibi tyé, Yésus a yen éfunga é za’ak ôyap. Mintyôa mi mañ mia bibi été a ngul ôkôs, a minlômane mia ‘duk a mfulan éfunga, évuñulu ki ja so ôsu.’ (Marc 6:48, Mfefé Nkôñelan) Ane a siliki nkôl, a taté na a wulu mintyôa mi mañ yôp a kele’e vôme be too. Be fuleya éfunga “nta môt a wulu mebo awolo da nge mebaé.” (Jean 6:19) Beyé’é ba yene Yésus a lôte be bebé, a ba “si’a ko na a ne [ñyenan]” a bôé miñyôn.​—Marc 6:49.

Yésus a ve be ngule nyul a jô’ô na: “Taba’ane ndi, ma le, te koone woñ.” Ve Pierre a jô nye na: “A Nti, nge wo le, jô’ô ma me zu vôm ô né me wulu’u mendime yôp.” Yésus nye na: “Za’ak!” Ane Pierre a kôlô éfunga, a nga wulu mendime yôp a ke vôme Yésus a né. Ve éyoñ a yeneya ane évuñulu ja vuñ, Pierre ve ko woñ a taté fe na a nyoñe mendim été. Nde a yôn a jô’ô na: “A Nti nyi’i ma!” Ane Yésus a same wo wé, ve bi Pierre a jô nye na: “A te dañe buni, amu jé ô nga bo bisô?​—Matthieu 14:27-31, Mfefé Nkôñelan. 

Pierre ba Yésus ba dañ éfunga été, a évuñulu ja tebe. Beyé’é ba kam, ve ye ba yiane si’an a jam ete? Nge be nga wô’ô “ajô belet,” asimba Yésus a nga bo bone mewolo mvus, éyoñe Yésus a nga ve betoyini be bôte bidi, ve be nji ye kame na a ne wulu mendime yôp a télé fe ôkôs. Ane ba buni a semé nye be jô’ô nye na: “Ô ne fo’o Mone Zambe.”​—Marc 6:52, Mfefé Nkôñelan; Matthieu 14:33.

Mvuse ya valé, ba kui si ya Gennésareth; abeñ si, nje’ese a atek, e sud ya Capernaoum. Ba telé éfunga a sise si. Ane bôte ba yemelan Yésus, mfula’ane a bôte ya mesi ma bômane be ba zu minkôkone be nye. Nné ane ba nambe ve éwondé ngômesane Yésus, ba mane bo mvo’é.

Nté ôse wu, nsamba bôt ô mbe éyoñe Yésus a nga ve betoyini be bôte bidi a zene ya asimba wo zu teme na Yésus a keya. Ajô te éyoñe bone bifunga bia so Tibériade, bôte ba dañ été na ba ke jeñe Yésus e Capernaoum. Éyoñ be yeneya nye, ba sili nye na: “A Rabbi, wo ate zu nne éyoñ évé?” (Jean 6:25) Yésus a komekane be, avale bia ye yen ôsu.