Ang milagrosong pagpakaon nga gihimo ni Jesus dakog epekto sa mga tawo. Kombinsido sila nga “siya gayod ang propeta nga gitagnang moanhi sa kalibotan,” ang Mesiyas, ug angayan siyang mahimong magmamando. (Juan 6:14; Deuteronomio 18:18) Busa gusto sa mga tawo nga pugson si Jesus nga mahimong hari.

Pero nasayod si Jesus sa plano sa mga tawo. Iyang gipapauli ang mga tawo ug gipasakay ang mga tinun-an sa sakayan. Asa sila moadto? Moadto sila sa Betsaida ug dayon sa Capernaum. Pero si Jesus nag-inusarang miadto sa bukid nianang gabhiona aron moampo.

Kadlawon pa pero hayag ang bulan, maong makita ni Jesus ang sakayan sa layo. Gikusokuso sa kusog nga hangin ang balod sa dagat, ug ang mga apostoles ‘naglisod ug bugsay kay sungsongon man ang hangin.’ (Marcos 6:48) Milugsong si Jesus ug milakaw sa tubig padulong sa mga apostoles. “Nakabugsay na silag mga lima o unom ka kilometro.” (Juan 6:19) Dili sila makatuo sa ilang nakita ug sila misinggit: “Hala! Unsa na?”—Marcos 6:49.

Giingnan sila ni Jesus: “Ayaw mog kahadlok. Ako kini.” Si Pedro mitubag: “Ginoo, kon ikaw gyod kana, palakwa ko ibabaw sa tubig paingon nimo.” Si Jesus miingon: “Dali ngari!” Mikawas si Pedro sa sakayan ug milakaw sa tubig paingon kang Jesus. Pero pagkakita niya sa unos, siya nahadlok ug anam-anam nga miunlod. Siya misinggit: “Ginoo, luwasa ko!” Gikuptan siya ni Jesus ug giingnan: “Ikaw nga diyutay ug pagtuo, nganong gidaog man ka sa pagduhaduha?”—Mateo 14:27-31.

Si Pedro ug Jesus misakay sa sakayan, ug milurang ang hangin. Natingala ang mga tinun-an. Pero angay pa ba silang matingala? Kon ilang nasabtan ang “kahulogan sa milagro bahin sa mga tinapay,” ang pagpakaon ni Jesus sa libolibo ka tawo pipila ka oras pa lang ang milabay, dili na unta sila matingala nga si Jesus nakalakaw sa tubig ug nakapalurang sa hangin. Sila miyukbo kang Jesus ug miingon: “Ikaw gayod ang Anak sa Diyos.”—Marcos 6:52; Mateo 14:33.

Miabot sila sa nindot ug daghag tanom nga kapatagan sa Genesaret, habagatan sa Capernaum. Ilang giangkla ang sakayan ug nanaog sa baybayon. Nailhan si Jesus sa mga tawo, busa sila ug ang uban pang mga tawo sa palibot nga lugar nagdalag mga masakiton aron iyang ayohon. Dihang nakahikap sila sa sidsid sa besti ni Jesus, naayo dayon sila.

Sa laing bahin, nasayran sa mga tawong milagrosong gipakaon ni Jesus nga mibiya na siya. Busa, pagdunggo sa gagmayng mga sakayan gikan sa Tiberias, ang mga tawo nanakay ug milawig paingon sa Capernaum aron pangitaon si Jesus. Dihang nakit-an na nila si Jesus, sila nangutana: “Rabbi, kanus-a ka miabot dinhi?” (Juan 6:25) Gibadlong sila ni Jesus, ug ato unyang masayran kon ngano.