Drei la kola ketr la hni ne la itre atr la angatr a öhnyi Iesu e thuane la itre thauzan lao atr. Matre öni angatr, “nyidrëti hnyawa hi lo Perofeta ka troa traqa kowe la fen,” lo Mesia. Nge ma öni angatre fe, ka loi e troa acili nyidrë troa joxu. (Ioane 6:14; Deuteronomi 18:18) Itre atr a thele jëne troa xolouthi Iesu, me acili nyidrë troa joxu.

Ngo atre hi Iesu la hnei angatr hna mekun, matre nyidrëti a upe pi la ka ala nyim, me upi itretre dreng troa elë hune he. Angatr a tro ië? Bethesaida, nge e thupen, Kaperenauma. Ngo ame Iesu, nyidrë a pane tro ju kowe la wetr troa thithi cas ngöne la jidri cili.

Itre hnepe hawa qëmekene la kaqa ne lai, Iesu a wangatrehmekune qa gaa nanyi la he ke kola melem. Hna mejë la ketre enyi ka catr matre enienije catr la hnagejë, nge koi itre aposetolo, ‘jole hë troa galu, ke hnahna catre la eny.’ (Mareko 6:48) Matre Iesu a uti pi qa hune wetr, me tro koi angatr hune la tim. Nge traqa ha koi “faifi maine sikisi lao kilomet” hnei angatr hna galu. (Ioane 6:19) Nge ame ju hi la angatr a öhnyi Iesu e tro ezi angatr, angatr a isuenyi me hape: “E kaka i ni hetre ka iamamanyi koi së!”—Mareko 6:49.

Iesu a sa hnyawa jë ka hape: “Catre pi! The xou kö, ke eni hi!” Nge öni Peteru jë hi: “Joxu, maine nyipëti hi, hë ni jë, matre tro ni a tro hune la tim koi nyipë.” Matre Iesu a sa jë me hape: “Nga trohemi hö!” Ame hnei Peteru hna canga ut me tro koi Iesu hune la tim. Ngo ame hë la angeic a goeëne la enyi ka catr, xou ju hi angeic nge angeice ha nyiqaane nunucil. Matre angeic a sue jë me hape: “Joxu, wai ni!” Iesu a line pi la ime i nyidrë, me ea catrë Peteru me hape: “Atre lapaun acon, a hnauëne la eö a luelu?”—Mataio 14:27-31.

Nge ame la Iesu me Peteru a elë hune he, lapa kötre ju hi la eny. Matre kola sesëkötr hnei itretre dreng, ngo hapeu, tro kö angatr a sesëkötr? Waea, ke maine trotrohnine ju angatr “la aliene lo iamamanyikeu ne la itre falawa,” lo nyidrëti a thuane la ka ala nyim, tha tro kö angatr a sesëkötre la nyidrëti a tro hune tim, me lep ahumune la eny. Enehila, angatr a atrunyi nyidrë me hape: “Eje hi, nyipëti hi la Nekö i Akötresie.”—Mareko 6:52; Mataio 14:33.

Angatre hë e Genesareta, nöj e kolojë ne Kaperenauma. Ketre götrane gaa mingöming nge gaa mana hnei wene sinöe. Angatr a kuiëne ju la iuhni, me uti qa hune he. Nge itre atr e cili a wangatrehmekunyi Iesu, matre kola traqa koi nyidrë la itre atrene la itre nöje xötreith, me itre wezipo i angatr. Nge ame la angatr a ketr la pune iheetre i Iesu, loi pi hi la itre meci angatr.

Nge ngöne la ijine cili, hnene lo itre atr ka öhnyi Iesu e thuane la ka ala nyim hna wangatrehmekune laka, patre hë Iesu. Matre ame ju hi la kola qale la ketre he qa Tiberia, itre atr a elë jë hune he me tro e Kaperenauma troa thele Iesu. Nge ame hë la angatr a öhnyi nyidrë, öni angatr: “Rabi, traqa nyipëti eue e celë?” (Ioane 6:25) Nge Iesu a wesitrë angatre jë. Hnauën? Tro sa ce wang.