E korakora rotakia aomata iroun Iesu ngke e karaoa te kakai are e kaamwarakeia iai aomata aika nga ma nga. A taekinna bwa “bon te Burabeti teuaei are e a kaman taekinaki bwa e na roko i buakoia kaain te aonnaba” are te Mesia ae e na bon riki bwa te tia kairiri ae e tatangiraki. (Ioane 6:14; Te Tua-Kaua 18:18) Ngaia are a baireia aomata bwa a na taua ni kaueaa.

Ma e ataa Iesu aia babaire aomata, ngaia are e a kanakoia te koraki ao e tua nakoia taan rimwina bwa a na okira te booti. A na nakea ao a na toki ia? A a kaineta ngkai Betetaita ao imwina Kaberenaum. Ma e ararakea te maunga Iesu ni kaokoroa bwa e na tataro iai n te tairiki anne.

E tarataraa te booti mai kiraroa i aan otan namwakaina, teutana te tai imwain ae e tabwena mainiku. E a mareburebu te nama ibukin te ang ae korakora, ao a a tabe abotoro ni “kakorakoraia ni bwetua bwa e kauntabaiia te ang.” (Mareko 6:48) E ruo rikaaki Iesu man te maunga ao n nakonako i aon te ran ni kainetiia. Ma a a tia ngkai ni “bwetua n te raroa ae tenua ke aua te maire.” (Ioane 6:19) A a nora Iesu are e bakaaea te taonnako riki, ao a tatakarua ibukini maakuia ni kangai: “Ai kamira te baei!”​—Mareko 6:49.

E karaui nanoia Iesu ni kangai: “Kaninikoriaingkami bwa boni ngai. Tai maaku.” Ma e taku Betero: “Te Uea, ngkana boni ngkoe, ao tuua bwa N na nakoim i aon te ran.” E kaeka Iesu ni kangai: “Nakomai!” Ngaia are e a ruo Betero man te booti ao e a nakonako i aon te ran ni kaineta Iesu. Ma ngke e nora te angibuaka Betero, ao e a maaku ao e a moanna n iinako, ao e takarua ni kangai: “Te Uea, kamaiuai!” E arora baina Iesu ao e taua Betero, ao e taku: “Ai karakora am onimaki, e aera ngkai ko nanououa”?​—Mataio 14:27-31.

A uaia n toka n te booti Betero ma Iesu ao e a kerikaaki te ang. A a mimi taan rimwina ma a bon riai ni mimi? Ngke arona bwa a ataa “nanon ana kakai ni kaineti ma te kariki” are e karaoia tabeua te aoa n nako ngke e kaamwarakeia nga ma nga, ao e aki riai ni kamimi ngkai e kona n nakonako i aon te ran ao ni katoka te angibuaka. A bobaraaki ni karinea ao a taku: “Bon te koaua bwa Natin te Atua ngkoe.”​—Mareko 6:52; Mataio 14:33.

A a roko ngkekei naba n te tabo ae aoraoi ma ni maiureirei i Kennetareta i maiakini Kaberenaum. A kabwakaa atinron aia booti ao a waerake nakon te aba. A kinaa Iesu aomata ngaia are a a uotiia aoraki nakoina man taabo nako ni kabutaa te aono anne ao taabo ake i rarikina. A bane ni kamarurungaki man tii ringani buruburun ana kauaatao.

N te tai anne ao a a tibwa ataia te koraki ake a nora te kakai are kaamwarakeaia nga ma nga bwa e a tia n nako Iesu. Mangaia are ngke a roko booti aika uarereke mai Tiberia, ao a a toka naba iai aomata nako Kaberenaum ni kakaaea Iesu. Ngke a a noria ao a titirakinna ni kangai: “Rabi, ko roko n ningai ikai?” (Ioane 6:​25) E boaiia Iesu ni kaineti ma bukina ae eti, n aron ae ti nang noria ngkai.