Umi hénte ohecha kuri mbaʼéichapa Jesús omongaru hetaitereípe peteĩ milágro rupive, ha haʼekuéra omombaʼeterei upéva. Upéicha rupi heʼijoa hikuái: “Añetehápe kóva hína pe proféta ojeʼe vaʼekue outaha ko múndope”. Haʼekuéra heʼi Jesús haʼeha pe Mesías ha katuete ogoverna porãitereitaha (Juan 6:14; Deuteronomio 18:18). Upévare ojagarrase hikuái chupe ojapo hag̃ua chugui rréi.

Péro Jesús opilláma mbaʼépa ojapose umi hénte. Upévare pyaʼe ojedespedi chuguikuéra ha heʼi idisipulokuérape ojupi hag̃ua pe kanóape. ¿Moõpa ohóta hikuái? Haʼekuéra oĩ hína peteĩ lugár opytáva Betsaida ojehasamíre, péro koʼág̃a oho jeýta Capernáumpe. Og̃uahẽvo upe lugárpe, Jesús ojupi haʼeño pe sérrope oñemboʼe hag̃ua, ha opyta upépe pe pyhare pukukue.

Upéi koʼẽmbotávo, ñasaindy porãme gueteri, Jesús ohecha mombyry guive peteĩ kanóa pe márpe. Pe yvytu atã omopuʼã oláda tuichaicháva, ha umi disípulo oĩva pe kanóape “vaikuépe orrema ohóvo pe yvytu atã ohug̃uaitĩgui chupekuéra” (Marcos 6:48). Jesús oguejy pe sérrogui ha oguata ohóvo hendapekuéra pe y apére. Upérõ g̃uarã haʼekuéra ‘orremáma cinco térã seis kilómetro’ (Juan 6:19). Umi disípulo ohecha peteĩ oguatáva pe y apére ha tuichaiterei oñemondýi hikuái, ha osapukái: “¡Mbaʼéiko pe oúva!” (Marcos 6:49).

Jesús otrankilisa chupekuéra, ha heʼi: “Ani peñemondýi, chénteko; ani pekyhyje”. Péro Pedro osẽ heʼi: “Ndéramo añete che Ruvicha, ere chéve aha hag̃ua ne rendápe y ári”. Jesús heʼi chupe: “¡Eju!”. Pedro oguejy pe kanóagui, oñepyrũ oguata pe y ári ha oho hendápe. Péro ohechávo pe torménta, okyhyje ha oñepyrũ oñapymi. Upépe osapukái: “Che Ruvicha, ¡chesalvamína!”. Jesús ipojái hese ha heʼi: “Ajépa rejeroviaʼiete. ¿Mbaʼére piko péicha ndepyʼamokõi?” (Mateo 14:27-31).

Pedro ha Jesús ojupi pe kanóape ha opaite pe torménta. Umi disípulo oponderaiterei upéva. Péro, ¿oñesorprende vaʼerãpa hikuái? Angeténte Jesús ‘omboheta umi pan’ omongaru hag̃ua hetaiterei persónape. Haʼekuéra ontende porãrire pe milágro, ndodudái vaʼerãmoʼã haʼe ikatuhánte avei oguata y ári ha okalma pe yvytu atã. Koʼág̃a ae haʼekuéra ohechakuaa upéva ha ombotuicha chupe, ha heʼi: “Añetehápe nde hína Ñandejára Raʼy” (Marcos 6:52; Mateo 14:33).

Upéi og̃uahẽ hikuái peteĩ lugár iporãitereívape hérava Genesaret, oĩva sur gotyo Capernáumgui. Oguejýre hikuái pe kanóagui, umi hénte ensegída orrekonose Jesúspe. Upémarõ umi hénte upepegua ha avei umi oikóva ag̃ui upégui, ogueru chupe heta hasýva. Ha umi hasýva opokóre Jesús ao ruguáire jepe, okueraitéma voi opytávo.

Upe aja, umi hénte ohecha vaʼekue Jesús omongarúrõ guare hetaitereípe, oñemeʼẽ enkuénta Jesús ndaiporiveimaha ijapytepekuéra. Upémarõ ojupi hikuái umi kanóa oúvape Tiberíadesgui, ha oho Capernáumpe oheka hag̃ua Jesúspe. Otopávo hese, haʼekuéra heʼi: “Mboʼehára, ¿arakaʼe piko reg̃uahẽ raʼe?” (Juan 6:25). Péro Jesús omongavaju chupekuéra. Jahechamína mbaʼérepa.