Andũ nĩmakiitiwe ngoo mũno nĩ kyama kĩla Yesũ weekie kya kũĩthya andũ ngili mbingĩ. Ũndũ ũsu watumie masya kana Yesũ “kwa w’o nĩwe ũla Mwathani waĩ oke ĩũlũ wa nthĩ,” nake nĩ Masia. Na masũanĩaa kana no asumbĩke andũ nesa mũno. (Yoana 6:14; Kũtũngĩlĩlwa Kwa Mĩao 18:18) Kwoou andũ nĩmavangie kũmũkwata Yesũ na kũmũtw’ĩkĩthya mũsumbĩ.

Ĩndĩ Yesũ nĩwamanyie mũvango ũla andũ maĩ naw’o. Ũu watumie atavya ĩkomano yĩthi na eea amanyĩw’a malike ĩsiwanĩ. Ameaa malike ĩsiwanĩ mathi va? Endaa amanyĩw’a mathi Vethisaita na ĩtina wa vau maithi Kavelinaumi. Ĩndĩ Yesũ ndaaendany’a na amanyĩw’a, vandũ va ũu, aendie kĩĩmanĩ akavoye ũtukũ ũsu.

Yesũ e vaasa nĩwoonie ĩsiwa yĩla yaĩ na amanyĩw’a nũndũ kwakilyĩ kũkya na kwaĩ o na kyeni kya mwei. Nũndũ wa kĩseve kingĩ, ũkanga waĩ na itulumo nene na atũmwa maendeee ‘kũng’ang’ana kũtwaa ĩsiwa, nũndũ kĩseve kyaumĩte ngalĩko ĩla maendete.’ (Maliko 6:48) Yesũ nĩwatheeie kuma kĩĩmanĩ na avika ũkanganĩ, akinyĩla ĩũlũ wa kĩw’ũ elekele vala ve amanyĩw’a. Amanyĩw’a maĩ manatwaa “ĩsiwa vandũ va ta maili atatũ kana ana.” (Yoana 6:19) Me ĩsiwanĩ, nĩmoonie Yesũ e vakuvĩ kũmavĩtũka na makwatwa nĩ wia, na ũu watuma makaya na wasya mũnene makyasya: “Kĩya nĩ kyaũ kyũkĩte!”—Maliko 6:49.

Yesũ amekĩie vinya kwa kũmea atĩĩ: “Ĩthĩwai na ũkũmbaũ! Ninyie; ekai ũkĩa.” Ĩndĩ Vetelo eew’a ndeto isu asya: “Mwĩaĩi ethĩwa nue, mbĩe nũke vau ũĩ nĩkinyĩle ĩũlũ wa kĩw’ũ.” Nake Yesũ amwĩa: “Ũka!” Na Vetelo auma ĩsiwanĩ na akinyĩla kĩw’ũnĩ ĩũlũ elekele vala ve Yesũ. Ĩndĩ yĩla Vetelo wasyaisye kĩuutani, nĩwakwatiwe nĩ wia na ambĩĩa kũvota kĩw’ũnĩ. Yĩla woonie ũu, nĩwakayie na wasya mũnene ayasya: “Mwĩaĩi, ndangĩĩe!” Yesũ nĩwatambũũkisye kw’oko amũkwata Vetelo, na amwĩa: “We wĩ na mũĩkĩĩo mũnini, nĩkĩ wakwatwa nĩ nzika?”—Mathayo 14:27-31.

Ĩtina wa ũu, Vetelo na Yesũ nĩmalikile ĩsiwanĩ na kĩseve kyausya. Amanyĩw’a nĩmaseng’ie moona maũndũ asu. Ĩndĩ ĩkũlyo nĩ, Mo nĩmaĩle kwĩthĩwa maseng’iw’e nĩ maũndũ ala meyooneie? Keka nĩmaeleiwe “nĩ kĩla kyoonanaw’a nĩ ĩla mĩkate,” yĩla Yesũ weekie kyama kya kũĩthya andũ ngili mbingĩ, methĩwa mataaseng’a nĩ kwona Yesũ akinyĩle kĩw’ũnĩ ĩũlũ na aikilĩthya kĩseve. Amanyĩw’a nĩmamwonisye ndaĩa kwa kũmũkumanĩa makyasya: “Kwa w’o we wĩ Mwana wa Ngai.”—Maliko 6:52; Mathayo 14:33.

Ĩtina wa ĩvinda ĩkuvĩ, Yesũ na atũmwa nĩmavikie kĩsionĩ kyanake kya Kenesaleti, kĩla kĩ ngalĩko ya ĩtheo ya Kavelinaumi. Nĩmatheeisye nanga na ĩsiwa yaũngama mathi ũtee wa ũkanga. Andũ ma kũu nĩmamwonie Yesũ, na me na andũ angĩ ma isio ila syaĩ vakuvĩ, mamũetee awau moo. Yĩla awau asu makiitie o mũthya wa ngũa ya ĩũlũ ya Yesũ, nĩmavoie vyũ.

Maũndũ asu o maendeee kwĩkĩka, ĩkomano yĩla yoonete Yesũ ayĩĩthya andũ kwa nzĩa ya kyama nĩyesie kũmanya kana nũendie. Kwoou, yĩla moonie masiwa kuma Tivelia mavika, andũ asu nĩmalĩsile na mathi nginya Kavelinaumi makamũmanthe Yesũ. Mavika, nĩmamwonie na mamũkũlya-ĩ: “Lavai, ũvikie kũũ ĩndĩĩ?” (Yoana 6:25) Yesũ nĩwamakanisye nũndũ wa ĩkũlyo yĩu mamũkũlilye. Ĩndĩ ndaamakany’a e na kĩeleelo kĩthũku o tondũ tũkwĩsa kwona.