53-تاراۋ
تابيعاتتىڭ دۇلەي كۇشىن باعىندىرا الاتىن بيلەۋشى
ماتاي 14:22—36 مارقا 6:45—56 جوحان 6:14—25
-
ادامدار يسانى پاتشا ەتپەك بولدى
-
يسا سۋ بەتىمەن ٴجۇردى جانە داۋىلدى باستى
يسانىڭ مىڭداعان ادامدى تاماقتاندىرا الاتىن كەرەمەت قابىلەتى جۇرتتى بەيجاي قالدىرمادى. ولار ونى «دۇنيەگە كەلۋى كەرەك پايعامبار»، ياعني ٴماسىح، دەپ ەسەپتەدى جانە ونىڭ جاقسى بيلىك ەتەتىنىنە سەنىمدى بولدى (جوحان 6:14؛ مۇسانىڭ 5-جازباسى 18:18). سوندىقتان يسانى ۇستاپ الىپ، پاتشا ەتكىسى كەلدى.
الايدا يسا ولاردىڭ جوسپارىن ٴبىلىپ قويدى. ول جينالعان جۇرتتى تاراتىپ، شاكىرتتەرىنە قايىقتارىنا وتىرۋدى بۇيىردى. ولاردى قايدا جىبەردى؟ بەتسايداعا، كەيىن قاپارناۋمعا. ٶزى بولسا ٴتۇنى بويى وڭاشادا دۇعا ەتۋ ٷشىن، تاۋعا كوتەرىلدى.
تاڭعا جۋىق ايدىڭ جارىعىنان يسا الىستان شاكىرتتەرىنىڭ قايىعىن كوردى. قاتتى جەل سوعىپ، تەڭىز تولقي باستادى. ەلشىلەر «ەسكەكپەن ارپالىسىپ جاتتى، سەبەبى جەل قارسى سوعىپ تۇرعان ەدى» (مارقا 6:48). يسا تاۋدان ٴتۇسىپ، سۋ بەتىمەن سولارعا قاراي ٴجۇردى. ولار «بەس-التى شاقىرىمداي» جەرگە كەتىپ قالعان بولاتىن (جوحان 6:19). يسا شاكىرتتەرىنىڭ جانىنان ٶتىپ كەتپەك بولعانداي سىڭاي تانىتقاندا، ولار ونى «ەلەس ەكەن دەپ ويلاپ، بار داۋىستارىمەن ايقايلاپ جىبەردى» (مارقا 6:49).
يسا: «باتىل بولىڭدار، بۇل مەنمىن! قورىقپاڭدار!»— دەپ شاكىرتتەرىن تىنىشتاندىردى. پەتىر وعان: «يەم، ەگەر بۇل ٴسىز بولساڭىز، وزىڭىزگە سۋ بەتىمەن كەلۋگە بۇيىرا كورىڭىز»،— دەگەندە، يسا: «كەل!»— دەدى. سوندا ول قايىقتان شىعىپ، سۋ بەتىمەن وعان قاراي ٴجۇردى. ٴبىراق داۋىلدى كورگەندە، قورقىپ كەتىپ، سۋعا باتا باستادى. ول: «يەم، قۇتقارا كورىڭىز!»— دەپ ايقايلاپ جىبەرگەندە، يسا دەرەۋ قولىن ٴسوزىپ، ونى ۇستاي الدى. سوسىن: «سەنىمى از-اۋ، نەگە كۇمانداندىڭ؟»— دەدى (ماتاي 14:27—31).
پەتىر مەن يسا قايىققا شىققاندا، داۋىل باسىلدى. بۇعان شاكىرتتەرى تاڭعالدى. ەگەر ولار بىرنەشە ساعات بۇرىن يسانىڭ مىڭداعان ادامدى تويدىرۋ ٷشىن نانمەن جاساعان كەرەمەتىنىڭ ٴمانىن تۇسىنگەندە، قازىر ونىڭ سۋ بەتىمەن ٴجۇرىپ، داۋىلدى باسقانىنا مۇنشاما تاڭعالماس ەدى. سودان شاكىرتتەرى يساعا تاعزىم ەتىپ: «ٴسىز شىنىمەن دە قۇدايدىڭ ۇلىسىز!»— دەدى (مارقا 6:52؛ ماتاي 14:33).
كوپ ۇزاماي ولار قاپارناۋمنىڭ وڭتۇستىگىندەگى شۇرايلى ٵرى قۇنارلى گەنەسارەت جازىعىنا كەلدى. جاعالاۋعا جاقىن جەرگە زاكىر تاستادى. توڭىرەكتەگى حالىق يسانى بىردەن تانىپ، اۋرۋ-سىرقاۋلارىن اكەلە باستادى. ولار يسانىڭ جامىلعىسىنىڭ شاشاعىنا قولدارىن تيگىزىپ، قۇلانتازا ساۋىعىپ جاتتى.
بۇل كەزدە يسانىڭ مىڭداعان ادامدى تويدىرعان كەرەمەتىنە كۋا بولعاندار ۇستازدارىنىڭ كەتىپ قالعانىنان حاباردار ەدى. ولار تيبەريادان كەلگەن قايىقتارمەن يسانى ىزدەپ، قاپارناۋمعا بەتتەدى. يسانى تاپقاندا، ودان: «ۇستاز، بۇل جەرگە قاشان كەلدىڭىز؟»— دەپ سۇرادى (جوحان 6:25). ٴبىراق يسا ولاردى ايىپتادى. كەيىن كورەتىنىمىزدەي، بۇعان كەلەلى سەبەبى بولدى.
