Yesu byo ajishishe biumbi mu jishinda ja kukumya, bantu bakuminye bingi. Baambile’mba: “Kine uno ye Ngauzhi wafwainwe kwiya pano pa ntanda,” ye Mesiasa, kabiji wakonsha kwikala kalama wawama. (Yoano 6:14; Mpitulukilo ya mu Mizhilo 18:18) Onkao mambo, bantu bakebele kukwata Yesu amba ekale mfumu.

Nangwa byonkabyo, Yesu wayukile byalangulukilenga bantu. Waambijile jibumba kuya kabiji wakambizhe baana banji ba bwanga kukanjila mu bwato. Kwepi ko bayilenga? Bayilenga ku Beteseda apa bino ne ku Kapenama. Bino, Yesu wayile bunke bwanji ku mutumba na kulomba bufuku bonse.

Saka bukyangye kukya, Yesu wamwene bwato saka buji palepa na mambo a kyeya kya ñondo. Wamwene manyaki saka emana na mambo a luvula lukatampe kabiji batumwa saka “bakabakana na kuvuwa na mambo a luvula wapupilenga kufumina kulutwe yabo.” (Mako 6:48) Yesu wakunkulukile pa mutumba ne kuya ko bajinga saka enda pa manyaki. Pa kino kimye, “bavuwile bwato mamailoshi asatu nangwa ana.” (Yoano 6:19) Baana ba bwanga byo bamwene nobe Yesu ubena kukeba kwibapitaila, babijikile na moyo amba: “Kino ke kimonwamonwa!”—Mako 6:49.

Yesu wibatekeneshe’mba: “Chinchikai! Yami iye; kuba moyo ne.” Bino Petelo wamukumbwile’mba: “Nkambo, umvwe yenu iye, ñambilai ngiye ko muji saka ñenda pa mema.” Yesu wamwambijile’mba: “Iya!” Ponkapo Petelo wafumine mu bwato ne kwenda pa mema kuya kwajinga Yesu. Bino byo amwene luvula, Petelo waumvwine moyo kabiji watendekele kwibila. Kepo abijikile’mba: “Nkambo, mpulushai!” Ponkapo Yesu watanyikile kuboko ne kumukwata ne kumwambila’mba: “Obewa wa kalwitabilo kacheche, mambo ka o waji kuzhinaukila?”—Mateo 14:27-31.

Petelo ne Yesu byo bakanjijile mu bwato, luvula wikilekele. Baana banji bwanga bakuminye bingi. Nanchi bafwainwe kukumya nyi? Umvwe “bakwatakenye mwatajile kya kukumya kya bashinkwa” Yesu kyo aubile juba jafumineko byo ajishishe biumbi, umvwe kechi bakuminye pa kumumona saka enda pa mema ne kukanya luvula ne. Pano bino, pa kikye kimye baana banji ba bwanga bamulambijile Yesu ne kwamba’mba: “Kine mwi Mwana Lesa.”—Mako 6:52; Mateo 14:33.

Byo papichiletu kakimye kacheche, bafikile ku Ngenesaleta musanza wawama wajinga ku bulenge bwa Kapenama. Konkakwa bwato ko ko bebukashijile ku kitulu. Byo batuntukile, bantu bamuyukile Yesu kabiji bayile mu yoya mpunzha yonse ne kuleta bakolelwenga. Kabiji bamo bakwachilenga nsenkebele ya kivwalo kyanji kya peulu, ne kubukwa babukilwenga.

Pa kikye kimye, jibumba jamweneko byo ajishishe biumbi mu jishinda ja kukumya, jayukile’mba Yesu waya. Onkao mambo, maato acheche afumine ku Tibeliasa byo afikile, bakanjijilemo ne kuya ku Kapenama na kukeba Yesu. Byo bamutaaine, bamushikishe’mba: “Labi, ñanyi kimye kyo mwaji kwiya kuno?” (Yoano 6:25) Yesu wibanenene byonka byo tusakumona.