O nkangu utomene sivika wau bamwene e sivi dia Yesu vava kadikidi mafunda ma wantu. Bayantikidi ovova vo: “Kieleka, yandi i Ngunza ina ikwiz’ova nza,” Masia ona okala se ntinu ambote. (Yoane 6:14; Nsiku 18:18) Muna kuma kiaki, o nkangu bazolele baka Yesu yo kunkitula se ntinu.

Kansi, Yesu obakwidi dina o nkangu uzolele vanga. Dianu vo, osindikidi e ndonga, i bosi okanikini alongoki andi bakota muna nzaza. Akweyi bekwenda? Kuna Betesaida, i bosi kuna Kafanau. Vo i Yesu, otombokele kuna mongo kasamba muna fuku wauna.

Vitila o kuma kwakia, muna lusadisu lwa miezi, Yesu omwene e nzaza kuna vala. Tembwa kiangolo kinikwini mavuku ma mbu, antumwa ‘benwananga mu singika e nzaza, kadi e ntembwa kibaluakidi.’ (Maku 6:48) Yesu okulumukini kuna mongo, oyantikidi diatila vana ntandu a mbu, wizidi kwa yau. Muna kolo kiaki, alongoki badiete kala “tezo kia kilometa tanu yovo sambanu.” (Yoane 6:19) Bamwene Yesu ovangidi nze yandi ozolele kubavioka, bakazidi yo wonga, oku vo: “Ekiaki mona-meso!”—Maku 6:49.

Muna kubavuvika o ntima, Yesu ovovele vo: “Ke nutokani ko! I mono kwame; ke numoni wonga ko.” Kansi Petelo umvutwidi vo: “E Mfumu, avo i ngeye, umpan’o nswa ngiza kwa ngeye vana ntandu a maza.” Yesu umvutwidi vo: “Wiza!” I bosi, Petelo okulumukini muna nzaza, odiete vana ntandu a maza, wele kwa Yesu. Kansi vava kamwene e tembwa, obakamene kwa wonga. Una kayantikidi dimuka, okazidi vo: “E Mfumu, umpuluza!” Vana vau Yesu olambwidi o koko kwandi, unzakwidi, umvovese vo: “Nkwa filukwikilu, ekuma okatikisidi?”—Matai 14:27-31.

Petelo yo Yesu bakotele muna nzaza, i bosi e tembwa kidingalele. Alongoki basivikidi kikilu. Nga bafwana sivika kikilu e? Kele vo babakula “e nsas’a sivi dia mbolo,” dina Yesu kavangidi vava kadikidi mafunda ma wantu, ke badi sivika ko wau bamwene Yesu odiatilanga vana ntandu a mbu yo dingidika e tembwa. Alongoki bankudidi, oku vo: “Kieleka, ngeye u Mwan’a Nzambi.”—Maku 6:52; Matai 14:33.

Kuna kwalanda, balueke muna Ngenesarete, nsi yambote iyimanga mbongo ayingi, kuna sude ya Kafanau. Batubidi e mbw’a nzaza, i bosi bakulumukini kuna simu. O wantu wau bamwene vo i Yesu ndioyo, bezidi kwa yandi kumosi mpe yo wantu bakala muna mavata mena lukufi, batwese mbevo kwa Yesu. Vava e mbevo zisimbidi kaka o nsuiku a mvuatu a Yesu, zisasukidi.

I bosi, e ndonga ina Yesu kadikidi muna mpil’esivi babakwidi vo Yesu wele kwandi. Dianu vo, vava vezidi e nzaza zitukidi kuna Tiberia, o nkangu bakotele mo, bele vavi Yesu kuna Kafanau. Vava bansolwele, banyuvuidi vo: “E Rabi, nkia ntangwa wizidi kwaku?” (Yoane 6:25) Yesu ubatumbidi. Yambula twazaya ekuma kavangidi wo.