Ngolo jaYesu jakulisa makombakaji avatu mujila yakukomwesa jakwachile chikuma vatu kumichima. Vatu vakukulwile ngwavo: “Chikupu vene, ou ikiye uze Kapolofweto vambile ngwavo mwakeza mukaye,” vavuluka ngwavo Meshiya uze mwakapwa chikupu muka-kuyula wamwaza. (Yowano 6:14; Lushimbi lwamuchivali 18:18) Ngocho vatu vasakile kukwata Yesu vamulingise kupwa mwangana.

Yesu atachikijile vyuma vasakile vatu kulinga. Kaha anguhwishile kuwana mwakulingila mangana vahone kumukwata. Alwezele vatu valimwange, nakulweza nawa tumbaji twenyi vengile muwato. Uno vapwile nakuya kulihi? Vapwile nakuya kuMbetesaita nakukaheta kuKapelenau. Oloze Yesu kayile navoko, ayile kupili kwaukawenyi ufuku nakulomba.

Ufuku vene uze shimbu kanda kulungulungu lyakucha, Yesu amwene wato hahasuku uli nakwiza. Hakalungalwiji hapwile makimba mwomwo yapeho yayinene yapwile nakuhuhwa, kaha vaposetolo vapwile “nakupindasana chikuma hakuvuwa mwomwo yapeho yize yapwile nakuvapekumuna.” (Mako 6:48) Yesu ashikumukile kufuma hapili, kaha aputukile kutambuka hamakimba nakuya kuze kwapwile tumbaji twenyi. Halwola kana “hivanavuu lyehi jimayilo kafwe jitatu chipwe jiwana.” (Yowano 6:19) Tumbaji vamwene Yesu ali nakwiza, kaha vashinganyekele nge mwavahambakana, ngocho vevwile woma nakutetumuka ngwavo: “Chipukupuku!”—Mako 6:49.

Jino Yesu avavendejekele hakwamba ngwenyi: “Likolezezenu. Yami. Kanda namwivwa womako.” Oloze Petulu ambile ngwenyi: “Ove Mwata, kachi nge yove vene, ngulweze ngwizenga kuli ove hameya.” Yesu amukumbulwile ngwenyi: “Twaya!” Hahaze vene, Petulu afumine muwato nakuputuka kutambuka hameya nakuya kuli Yesu. Oloze omu amwene peho yanyamanganda evwile woma, kaha aputukile kulondomana. Atambakanyine ngwenyi: “Ove Mwata, ngulwile.” Kaha Yesu olwele livoko lyehi nakukwata Petulu, amwambile ngwenyi: “Ove muka-lufwelelo lwalundende, ikaze wahuhwasanyinanga?”—Mateu 14:27-31.

Petulu naYesu vengilile muwato, kaha peho yechele kuhuhwa. Tumbaji valikomokelele hachuma kana. Kutala vatelele kulikomokela tahi? Kachi nge valinangwile vimwe ‘kuchuma chakukomwesa chajimbolo’ chize alingile hajiola jajindende jahichilemo hakulisa makombakaji avatu, kachi kavalikomokelele omu atambukile hameya nakuunjisa pehoko. Kutwala muze, valifukwile kuli ikiye nakwamba ngwavo: “Chikupu vene ove uMwanaKalunga.”—Mako 6:52; Mateu 14:33.

Kaha vahetele kuchana chamwaza chaNgenesaleta kusulo yaKapelenau. Vasulikile wato nakukanduka kutunda. Vatu vosena kulifuchi kana vamumwene Yesu, kaha vamunehelele vaveji javo. Omu vaze vaveji vakwachile kujizombo jauvwalo waYesu, vosena vahindukile.

Liyongomena lyavatu vaze alishile Yesu mujila yakukomwesa vatachikijile ngwavo Yesu nayi. Omu ahetele mato amandende aze afumine kuChivelya, vatu vengilile mumato kana nakukava Yesu kuKapelenau. Kahomu vamuwanyine kuze, vamwihwile ngwavo: “Ove Lapi, lwola muka wezanga kuno.” (Yowano 6:25) Yesu amwene ngwenyi chakutamo kuvahanjikila, nganomu natumona muchihande chinakavangizaho.