A Zeezi sẽn tõog n maan yel-solemd n dɩlg neb tusa wã yɩɩ nebã noog hal wʋsgo. Rẽ kɩtame tɩ b yeel tɩ sɩd yaa yẽ la “Wẽnnaam no-rɛɛs ning sẽn da tog n wa-a dũni pʋgẽ wã,” rat n yeel tɩ Mesi wã, la t’a na n yɩɩ na-sõngo. (Zã 6:14; Tõodo 18:18) Rẽ n so tɩ b sɩɩg taab noor n na n kɩt t’a lebg b rĩma.

A Zeezi bãnga nebã sẽn da rat n maan bũmb ningã. A kuilsa kʋʋngã la a yeel a karen-biisã tɩ b lebg n kẽ koom koglgã tao-tao n looge. Yɛ la b na n kẽnge? B teesa Betsayɩda sẽnese, n debd Kapɛrnawom. La a Zeezi kẽnga tãngã zug yẽ a yembr ne yʋngã, n na n tɩ pʋʋse.

Zĩigã sẽn wa n kolgd yẽegrã, ki-peelã yĩnga, a Zeezi yãa koglgã sẽn be yɩɩga, tɩ sob-kẽeng rãmbd mogrã tɩ ko-wĩisã pemd koglgã, tɩ tʋm-tʋmdbã namsd wʋsg n gaad koomã ne b pãng fãa, sobgã sẽn da segd-bã yĩnga. (Mark 6:48) A Zeezi siga tãngã, n kell n kẽnd koomã zug n teesd a karen-biisã sẽnẽ. Rẽ tɩ b ra zoe n zãaga “sẽn zems kɩlo a nu bɩ a yoobe.” (Zã 6:19) A maana wa a na n yõsg-b lame. La b kelma ne rabeem n yeele: “Yaa kɩɩma!”—Mark 6:49.

Sẽn na yɩl n keng-b pelse, a Zeezi yeel-b lame yaa: “Keng-y y sũyã la y ra zoe rabeem tɩ yaa maam.” La a Pɩyɛɛr leokame yaa: “Zu-soaba, sã n sɩd yaa yãmb bɩ y yeel-m tɩ m kẽn koomã zug n wa yãmb nengẽ.” A Zeezi yeel-a lame t’a wa. A Pɩyɛɛr sɩd yii koglgẽ wã n kẽn koomã zug n debd a Zeezi nengẽ. La a wa n gesa sobgã sẽn yaa wʋsgã, tɩ rabeem yõk-a, t’a sɩng bõrbo. A kelmame n yeele: “Zu-soaba, fãag-y-ma!” Tao-tao bala, a Zeezi tẽega a nug n gãd-a, la a yeel-a woto: “Tẽeb bilf soaba, yaa bõe tɩ fo yam yoaada?”—Matye 14:27-31.

A Pɩyɛɛr ne a Zeezi sẽn kẽ koglgã, sobgã yõkame. Linga karen-biisã. La rẽ yĩnga ra segd n ling-b lame sɩda? Sẽn nan zems lɛɛr a wãn bala, a Zeezi maana yel-solemd n dɩlg neb tusa ne bur a nu. Karen-biisã pa wʋm “burã bõn-bãndã võor” ye. Sã n pa rẽ, a Zeezi sẽn tõe n kẽn koom zug la a kɩt tɩ sobg yõkã ra pa na n ling-b ye. Masã, bõe la b maan-yã? B wõgemda a Zeezi taoore, n yeele: “Yãmb sɩd yaa Wẽnnaam Bi-ribla.”—Mark 6:52; Matye 14:33.

Masã, b taa Zenezarɛt sẽn be Kapɛrnawom goabgã. Yaa zĩig sẽn be rasãnde, n sakd kood sõma. Be la b yalse, n sig n loe koglgã. B sẽn sigã bala, nebã bãnga a Zeezi. La bãmb ne tẽn-yagsã neb talla b bãad-rãmb n wa a Zeezi nengẽ. Bãad-rãmbã sã n sɩɩs a Zeezi zugẽ fuugã noor bala, b paamda laafɩ.

Rẽ tɩ kʋʋngã a Zeezi sẽn da maan yel-solemd n dɩlgã bãngame masã t’a loogame. B kẽe kogend bõones sẽn yi Tiberyaad n wa, n na n kẽng Kapɛrnawom n tɩ gẽes a Zeezi. B sẽn wa n yã-a wã, b sok-a lame yaa: “Karen-saamba, yãmb waa ka rabʋre?” (Zã 6:25) A Zeezi zab-b lame, la a bee bʋʋm. D na n yãa rẽ sak ning sẽn pʋgdã.