Mushamaiso wa Jesu wo kuhisa mbungano, wakava no muviyo wakanaka kuno vandhu. Ivona vanozivadi kamare kuti Jesu ndiyena “muporofeti anodika kuza mu nyika yo pasi,” Mesia, zve kuti ndiyena mutongi anodiwa ngo vandhu vese. (Johani 6:14; Deuteronòmio 18:18) Ngo kudaro vandhu vanoeja kumubata kuti vamuite mambo.

Asi Jesu anozvivona zvaidari kuithwa ngo vandhu. Ngo kudaro iyena anopindisa vandhu zve wobvunja vajiji vake kuti vaende mu ngarava yavo. Vari kwenda kwapi? Vari kwenda ku Kafarnaume asi vanopinda ngo ku Bhetsaidha. Jesu, anobuda woenda ku dundhu kooita mukumbiro ari ega cousiku.

Mu ziejera ro mweji kucito kwaeja, Jesu anovona ngarava yeciviya ngo ndhambo. Zibepo rainga recimusa mavimbi mujombe zve vapostori “vainga varemba ngo kuvutha, ngokuti mbhepo yainga yo maringwa.” (Marco 6:48) Jesu anoderuka pa dundhu wotanga kufamba panyezuru po kumwa ecienda kovari. Ivona vainga vabvutha ngarava pa mumango uno makirometro mashanu kana matandhatu. (Johani 6:19) Vajiji vanovona Jesu inga ari kuda kuvapindirija, vanotanga kurija mbhere ngo kuthya veciti: “I gira!”—Marco 6:49.

Jesu anovanyaraja eciti: “Gondanyi, ndini. Mucathya.” Asi Pedhru anoti: “Tenji, kudari muri imwimwi, ndibvunjenyi, ndifambe ngo panyezuru po kumwa, kuza komuri.” Jesu anopingura kuti: “Izai!” Ngo kudaro Pedhru anobuda mungarava wotofambadi kamare ngo panyezuru po kumwa ecienda kuna Jesu. Asi paakasotesesa zibvungu-bvungu riya, Pedhru anothya wotanga kundondomera. Iyena anokhuwa eciti: “Tenji ndiponesenyi!” Jesu anotambanuja nyara yake wobata Pedhru perepo woti: “Mundhu wo kutenda padoko, warangarija ngenyi?”—Mateu 14:27-31.

Pedhru na Jesu vanonghwina mungarava, zve zibepo rakapera. Vajiji vanokahamara ndizvona. Asi avacaidikanepi kukahamara. Ngenyi vanokahamara? Ngo kuti “avazivi kuzwisa muxamaiso wo mukate” wainga wabva kuithwa ndi Jesu wo kuhisa mbungano. Avacaidikana kukahamarazve ngo kumuvona ecifamba ngo panyezuru po kumwa pomwe no kunyaraja zibepo. Wari ivona vomugwadamira veciti: “Mbzokadi kuti muri Mwana wa Mwari.”—Marco 6:52; Mateu 14:33.

Tevere ivona vanoguma mubani rakaseja, rinondimo maningi ro Genezareti ngo kakusi ko Kafarnaume. Vanocevesa ngarava yavo zve vobzuka. Vandhu vanomuziva Jesu, zve vese pamutundhupo vanoviisa vaihwaja kwaari. Vaihwajari vairapika ngo kubata ciuruji co pura-pura yake basi.

Mbungano yainga yakavona mushamaiso waakaita wo kuhisa mbungano, vanovona kuti Jesu aacipo apa, wapinda. Waro cingarava cidoko caibva ku Tibheria pacakaguma, vandhu vanocipakira voenda ku Kafarnaume koopsaka Jesu. Pavanomuwana vanomubvunjisa kuti: “Rabi, maguma rini kuno?” (Johani 6:25) No thangwe rakanaka, Jesu anovashora inga zvatinozovona.