Yootikhiniha ya Yesu ya waavakulela achu macikhwi macikhweene yaahaatikhiniha achu ancipale. Awo aaphiyerya wuupuwela wi Yesu “mulipa a miririmu,” Mesiya, nave owo aahaala okhala mwene oophwanelela. (Yohani 6:14; Malamulo 18:18) Mwawiihiiha, achu annachuna omweera Yesu okhala mwene.

Nave Yesu, onnasuwela yeeyo achu anachunaaya weera. Owo onnaarowiha achu navetho onnaaleela amuhuserya awe wi ekookele mmwaaceyani. Yaahaala oya woowi? Yesu onnaaleela wi eye o Petisaita nave ohoolo waya o Kafarnau. Nave Yesu mukhateiye, onnawela omwaako ohiyu yoole wi avekele.

Oyaaka nuuxa, mweeri nlelo waaryaka, Yesu onnamoona mwaaceya ari woorakamawo. Macumuxa a eniya annaaceereryeya nthowa na echeku, nave amuhuserya ‘yànaviliwa olapuwa wa nthowa na etxheku yakòkiherya otxuli.’ (Marko 6:48) Yesu onnakhuruwa omwaako nave onnapacerya weeca vasulu va maahi ayaaka weiwo ariwo amuhuserya awe. Nyenya elukuluku yeela awo ‘ahotowela mahi istádyo makhumi meli ni thanu nari makhumi mararu.’ (Yohani 6:19) Amuhuserya emoonaka Yesu ahaalaka ovira, awo annakhuwela mwawoova eriki: “Namunepa!”—Marko 6:49.

Yesu onnaamaaliha ariki: “Khurumuwani, ti miyo. Muhòve!” Nyenya Petro onnaloca: “Warì weyano, Pwiya, kirume kirwe wa weyo ketxaka vasulu va mahi.” Yesu onnaakhula: “Rwaka!” Elukuluku yeele, Petro onnakhuma mmwaaceyani nave onneeca vasulu va maahi amuthikireryaka Yesu. Nyenya vaavaa Petro onaweheiye echeku, onnakhala awoova nave onnapacerya oneela. Owo onnakhuwela: “Pwiya, kivuluse!” Yesu onnookola ntata nawe, onnamphara Petro nave onnaloca: “Okhweleleni minikwa, mulopwana a nroromelo vakhani?”—Mateu 14:27-31.

Petro vamoha ni Yesu annavolowa mmwaaceyani, nave echeku ennamaala. Amuhuserya annatikhiniheya, apwanne awo yaanaphwanela otikhina? Hooye. Waakhanle wi yaasuwela yootaphulela ya “ntikiniho na iphau,” yootikhiniha yeeyo Yesu eenreiyeno ya waavakulela achu ancipale, awo hiyi etikhine omoona Yesu eecaka vasulu va maahi naari omaaliha echeku. Vano awo annalekecheya nave annaloca masu ala: “Epariparyene we wa Mwana a Muluku.”—Marko 6:52; Mateu 14:33.

Moohilekela awo annaphiya elapo yooreera ya Xenesareti, ohico wa Kafarnau. Awo annakhuruwa mmwaaceyani. Achu annamoona Yesu, nave vamoha ni achu a muceche yoole, annaaruuha areca aya. Vaavaa areca ale anapharaaya niveru na yoowara ya Yesu pahiru, awo annapenuwa moomalela.

Elukuluku ene yeele, muloko yoowo woonne yootikhiniha ya Yesu ya waavakulela achu ancipale, annasuwela wi Yesu oopwaha. Nave vaavaa amwaaceya oorweela o Tiperiyu anaphiyaaya, achu annaawela eyaaka o Kafarnau wi emphwanye Yesu. Vaavaa anamphwanyaaya, awo annamukoha: “Muhusiha ophiyalewo lini wenno?” (Yohani 6:25) Ni mathowa oophwanelela Yesu onnaasamela, ntoko nnahaalaahu woona mmwaha onacharela.