Ehuviso lya Sesusi liokuavela okulia ovanthu ovanyingi liahuvisile unene ovanthu. Avapopi okuti: “Tyotyili ou oe Omuuli ankho una okuya mouye” Mesiya, iya oe omutumini ovanthu aveho vahanda. (Suau 6:14; Deuteronômio 18:18) Ngotyo, ovanthu avasoko okukuata Sesusi, opo vemulinge ohamba.

Mahi, Sesusi anoñgonoka etyi ankho vahanda okulinga. Alekela ovanthu aveho, apopila ovalongwa vae valonde mowato wavo. Ankho vaya napi? Ankho vaya ko Betesata, konyima avaende ko Kafalanau. Sesusi, aende aike komphunda opo ekelikuambele otyinthiki otyo.

Mokonda yotyitei tyohanyi, etyi kuakamba katutu opo kutye, Sesusi amonena kokule owato. Ankho kuna omphepo onene ikahi nokukatula epuku-puku enene melunga, iya ono apositolu ankho ‘kavetyivili okuendesa owato mokonda omphepo itunda oku vaya nako.’ (Maluku 6:48) Sesusi alauka komphunda, ahimbika okueenda kombanda yomaande, okuenda no kuvo. Ankho ‘vaenda-le onokilometu ononthano ine epandu.’ (Suau 6:19) Ovalongwa avamono ngoti Sesusi ukahi nokuya no kuvo, avahimbika okuliyavela okuti: “Otyo oityi tyiya ngotyo?” — Maluku 6:49.

Sesusi evepameka, ati: “Kolei omutima! Ame; muhatilei owoma.” Mahi Petulu ati: “Tatekulu, inkha ove umwe, eta ndyiye no kuove okuendela kombanda yomaande.” Sesusi akumbulula okuti: “Endyu!” Moluotyo, Petulu atuluka mowato, ahimbika okueendela kombanda yomeva, okuenda no ku Sesusi. Mahi etyi Petulu atala kepuku-puku, akala nowoma, ahimbika okunyingila kohi. Iya eliyavela okuti: “Tatekulu ndyovole!” Sesusi atandaveka okuvoko kwae, akuate Petulu iya ati: “Ove wekolelo lihehi, omokonda yatyi wakalela nondima?” — Mateusi 14:27-31.

Petulu na Sesusi avanyingila mowato, omphepo aitulu. Ovalongwa avahuvu. Mahi okuti ankho vesukisa umwe okuhuva? Inkha vanoñgonokele “etyi ehuviso lionombolo lilekesa,” ehuviso ankho Sesusi alinga onoola mbehehi konyima, etyi aavela okulia ovanthu ovanyingi-nyingi, ñgeno kavahuvile vali etyi vemumona weendela kombanda yomaande, netyi atulisa omphepo. Pahe avelipetamena ku Sesusi, avati: “Ove, tyili-tyili Umona wa Huku.” — Maluku 6:52; Mateusi 14:33.

Konyima, avehiki mohika ongwa yovinyango mo Senesalee kokumbili kwo Kafalanau. Avahake owato wavo, avatundu-mo. Ovanthu avaimbuka Sesusi, iya kumwe na vakuavo vo kononthele ambuho mbotyilongo, avemuetela ovavei. Tyina ovavei ankho vakuata vala kovikutu vya Sesusi, avaveluka.

Pomuvo oo, ovanthu ovanyingi vamuene etyi Sesusi aavela okulia ovanthu ovanyingi kehuviso, avaimbuka okuti Sesusi wapita. Moluotyo, etyi onowato mbumwe mbo ko Timbeliyade mbehika-po, ovanthu avalondo-mo, avaende ko Kafalanau opo vakaovole Sesusi. Etyi vemuvasa, avapulu okuti: “Mulongesi, onalupi weya kuno?” (Suau 6:25) Sesusi eveviyula, ngetyi matulilongesa.