E milager ku Hesus a kaba di efektuá, perkurando alimento pa míles di hende, a hasi un gran impakto riba e hendenan. Nan a yega na e konklushon ku Hesus “realmente ta e Profeta [òf e Mesías] ku mester a bini na mundu” i ku lo e por a bira un bon gobernante. (Huan 6:14; Deuteronomio 18:18) P’esei, nan a plania pa gar’é i hasié rei.

Sinembargo, Hesus tabata sa ki plan nan tabatin. P’esei, el a despedí di e multitut i a instruí su disipelnan pa bai bèk den e boto i subi laman. Ki rumbo nan a kue, i unda nan tabata bai? Nan mester a kue rumbo pa Bètsaida pa despues nan bai Kapernaum. Pero Hesus a bai su so den seru pa hasi orashon e anochi ei.

Tabatin luna kla. P’esei, ora di dia tabata serka di habri, Hesus a mira e boto ku tabata na un distansia. E apòstelnan “tabata rema ku basta difikultat” pasobra bientu tabata fuerte i kontrali i laman tabata brutu. (Marko 6:48) P’esei, Hesus a baha for di e seru i a kana riba laman bai serka nan. Nan tabatin ‘un sinku pa seis kilometer ta rema.’ (Huan 6:19) Anto nan a mira Hesus, kende a hasi komo si fuera e tabata bai pasa nan forbei. Yen di miedu nan a grita: “Ta un vishon!”—Marko 6:49.

Hesus a trankilisá nan, bisando: “Keda trankil! Ta ami; no tene miedu.” Pedro a bis’é: “Señor, si ta abo, laga mi kana riba awa bini serka bo.” Hesus a bis’é: “Bini!” Anto Pedro a baha for di e boto i a kana riba awa bai den direkshon di Hesus. Pero ora el a wak e tormenta, el a haña miedu i a kuminsá senk. El a kuminsá grita: “Señor, salba mi!” Hesus a saka man kue Pedro tene i bis’é: “Hòmber di poko fe, pakiko bo a kuminsá duda?”—Mateo 14:27-31.

Pedro i Hesus a subi den e boto i e bientu a baha. E disipelnan a keda asombrá. Pero, nan mester a keda asombrá? Wèl, si nan a kapta “nifikashon di e pannan ku el a parti,” esta, di e milager ku Hesus a hasi algun ora promé alimentando míles di hende, nan lo no a keda asombrá ku e por a kana riba awa ni ku e por a kalma bientu. Despues di a mira e último milager akí, nan a bùig Hesus su dilanti i a bisa: “Di bèrdat bo ta Yu di Dios.”—Marko 6:52; Mateo 14:33.

Poko despues, nan a yega Genesarèt, un lugá bunita i fruktífero ku tabata keda zùit di Kapernaum. Nan a tira anker i a subi tera. E hendenan a rekonosé Hesus i a trese nan enfermonan serka dje. Hende den tur e áreanan ei banda a bini ku nan enfermonan. Ora e personanan enfermo akí a djis mishi ku zòm di Hesus su paña, nan a kura kompletamente.

Mientrastantu, e multitut di hende ku Hesus a alimentá milagrosamente a haña sa ku Hesus a bai. P’esei, ora algun boto chikitu a bini for di Tiberias, nan a abordá nan i a nabegá rumbo pa Kapernaum pa bai buska Hesus. Ora nan a hañ’é, nan a puntr’é: “Rabi, ki ora bo a yega akinan?” (Huan 6:25) Pero, manera nos lo mira despues, Hesus a skual nan i ku bon motibu.