Jesusqa uj milagronejta may chhika runasta mikhucherqa. Chayta rikojkunataj mayta tʼukorqanku, nerqankutaj: “Kay runaqa kay mundoman jamunan karqa, chay Profetapuni”, nispa. Chayta nispaqa, Jesús sumaj kamachej Mesías kasqanta nisharqanku (Juan 6:14; Deuteronomio 18:18). Chayrayku runasqa, munajta mana munajta Jesusta reyninku kananpaj churayta munarqanku.

Chayrayku Jesusqa runasta kachaporqa. Yachachisqasnintataj nerqa canoaman wicharinankuta. Chantá paykunaqa Betsaidaman rinanku karqa, chaymantataj Capernaumman. Jesustajrí orqoman riporqa, sapallan orakunanpaj.

Chay chʼiseqa killa pʼunchay kasharqa. Jesustaj niraj sutʼiyamushajtin, yachachisqasninpa canoankuta orqomantapacha rikorqa. Paykunaqa ‘ñakʼayllata canoata apasharqanku, ñaupaqenkumanta sinchʼita wayramusqanrayku’ (Marcos 6:48). Chayta rikuspa, Jesusqa orqomanta uraykamorqa, yaku patantataj yachachisqasninpaman rerqa. “Paykunaqa phishqa chayri sojta kilometrosta jinaña canoapi” risqanku (Juan 6:19). Jesusta yaku patanta purishajta rikuspataj, qhaparerqanku: “¿Imataj jamushanri?”, nispa (Marcos 6:49).

Jesustaj nerqa: “Noqa kani, ama manchachikuychejchu”, nispa. Pedrotaj kuticherqa: “Señor, qanchus kanki chayqa, niway kay yaku patata qanman jamunayta”, nispa. Paytaj “¡jamuy!”, nerqa. Pedrotaj canoamanta uraykuytawan, yaku patanta Jesusman rerqa. Sinchʼita wayrashasqanta reparaspataj mancharikorqa, yakuman chinkaykushaspataj qhaparerqa: “¡Señor, aysariway ari!”, nispa. Chantá Jesusqa, makinmanta aysarispa nerqa: “Pisi creeyniyoj runa. ¿Imaraykutaj iskayrayankiri?”, nispa (Mateo 14:27-31).

Jesuswan Pedrowan canoaman wicharisqankutawan, wayraqa thañiporqa. Yachachisqasnintaj tʼukulla kasharqanku. Chantá Jesuspa ñaupaqenpi kʼumuykukuspa nerqanku: “Qanqa Diospa Wawanpuni kanki”, nispa (Marcos 6:52; Mateo 14:33). Jesuspa yachachisqasnenqa manaraj entienderqankuchu, “Jesús tʼantawan milagrota ruwasqan imachus niyta munasqanta”. Chaytachus entiendenkuman karqa chayqa, mana tʼukunkumanchu karqa Jesús yaku patanta purisqanmanta, wayratapis thañichisqanmanta.

Chantá paykunaqa qochata chimpaspa Genesaretman chayarqanku. Chay lugarqa kʼachitu karqa. Tukuy imataj sumajta poqoj. Paykunaqa chaypi canoankuta wataykorqanku. Canoamanta uraykusqankutawantaj, runasqa Jesusta rejserqankupacha. Chantá onqosqasninkuta Jesusman apamorqanku. Onqosqastaj Jesuspa ropanpa waychʼasninta llankharispalla sanoyaporqanku.

Chaykamataj, Jesús ashkha runasman mikhuchisqanta rikoj runasqa, repararqanku pay ripusqanta. Ajinallapitaj Tiberiadesmanta canoas chay lugarman chayarqanku. Chay runastaj, chay canoasman wichariytawan Capernaumman Jesusta maskʼaj rerqanku. Jesusta tariytawantaj taporqanku: “Yachachejníy, ¿maykʼajtaj kayman chayamorqankiri?”, nispa (Juan 6:25). Jesustajrí paykunata kʼamerqa, chaymantataj qhepanta yachakusunchej.