Nunakunaqa alläpam espantakuyarqan Jesus milagruta rurarnin, mëtsikaqta mikutsishqa kanqanta rikarnin. “Pëqa nunakunaman shamunampaq kaq Diospa willakoqnin” o Diospa Akrashqan kaptinmi alli Rey kanampaq kaqta pensayarqan (Juan 6:14; Deuteronomiu 18:18). Tsëmi rey kananta munar mälas apakïta munayarqan.

Tsëta musyarninmi Jesusqa tsëchö këkaqkunata despacharirnin, qateqninkunata barcuman lloqarkur Betsaidaman y Capernaumman kutikuyänampaq nirqan. Peru pëqa Teytanman mañakoqmi juk jirkaman witsarqan.

Patsa manaraq waraptin y killa atsikyarëkaptinmi, Jesusqa karuchö barcu këkaqta rikärirqan. Y contrankunaman alläpa vientuptinmi barcuta avanzatsita mana puëdiyanqanta rikärirqan (Marcus 6:48). Tsë höram, Jesusqa jirkapita uräramur laqcheqsäkïkaq qocha janampa purir pëkuna kaqman ëwar qallëkurqan. Tsë hörayaqqa “pitsqa o joqta kilömetrutanö[nam]” avansashqa kayarqan (Juan 6:19). Y qateqninkunaqa rikäriyarqan yaku janampa purir barcu kaqman Jesus ëwëkaqtam, y alläpa mantsakarmi kënö niyarqan: “¿Imataq taqë shamïkan?” (Marcus 6:49).

Tsëmi Jesusqa kënö nirqan: “¡Kallpata tsariyë! Noqam kä; ama mantsakäyëtsu”. Pëdrunam kënö nirqan: “Teytë, qam karninqa yaku janampa qam kaqman shamunäpaq mandamë”. Tsënam “¡shamï!” nirqan. Y Pëdruqa barcupita yarpurirmi, yaku janampa purir Jesus kaqman ëwarqan. Peru feyupa vientïkaqta rikëkurmi alläpa mantsakarnin hundikar qallëkurqan. Tsënam “¡teytë, salvëkallämë!” nirnin qayarïkurqan. Tsë höram Jesusqa makipita tsarirkamurnin kënö nirqan: “Markäkïnin pisheq nuna, ¿imanirtaq segürutsu karqunki?” (Mateu 14:27-31).

Pëdruwan Jesus barcuman lloqarkuyaptinnam feyupa vientïkaq pärarirqan. Peru ¿imanirtaq qateqninkunaqa espantashqa këkäyarqan? Porqui “manam käyishqatsu kayarqan tantawan milagruta rurar imata rikätsikunqanta”. Käyishqa karninqa manachi alläpa espantakuyanmantsu karqan, Jesus yaku janampa purikanqanta ni feyupa vientuta päraratseqta rikarnin. Peru puntanman qonqurïkurmi kënö niyarqan: “Qamqa rasumpam Diospa Tsurin kanki” (Marcus 6:52; Mateu 14:33).

Tsëpitaqa, alläpa shumaq Genesaret markamanmi kutikuyarqan. Anclata jitarkurmi barcupita yarpuriyarqan. Y tsëchö këkaqkunaqa rasmi Jesusta reqiriyarqan, y qeshyëkaqkunatam kachakätsinampaq apayarqan. Y Jesuspa röpampa kuchunta yatarninllam llapan qeshyëkaqkuna chipyëpa kachakäriyarqan.

Milagruta rurar mikutsinqan waranqëpayan nunakunaqa, Jesus ëwakushqana kanqantam cuentata qokuriyarqan. Tsëmi Tiberïadis markapita chaq barcukunaman lloqarkur nunakunaqa Jesusta asheq ëwayarqan Capernaumyaq. Taririrninnam kënö niyarqan: “Maestru, ¿imëtaq këman chämurqunki?” (Juan 6:25). Tsënam Jesusqa piñaparqan y tsëtaqa qateqnin kaq yachatsikïchömi yachakushun.