Achkallay-achka runakunatam Jesusqa mikuchirqa, chayta qawaspam chay runakunaqa ima niytapas mana atirqakuchu. Hinaspam sunqunkupi kaynata ninakurqaku: “Payqa chiqaptapunim runakunaman hamunanpaq Diosmanta willakuq runa”, nispa. Hinaspam piensarqaku Jesusqa allin kamachiq kananmanta (Juan 6:14; Deuteronomio 18:18). Chaymi imaynanpapas kamachiqninku kananta munarqaku.

Chayta yacharuspanmi Jesusqa chay runakunata aviarurqa, hinaspam qatiqninkunatapas nirqa botewan Betsaida llaqtaman rinankupaq, chaymantañataq Capernaum llaqtaman rinankupaq. Hinaspam Jesusqa sapallan taytanta mañakuq chay tuta urquman rirqa.

Chaymantam Jesusqa manaraq achikyachkaptin killallawan karullay-karupi kaq boteta rikururqa. Chay botetam lamar qucha kallpawan aytinyachichkasqa. Apostolninkunañataqmi tukuyta ruwallachkasqaku wayramusqanrayku mana wichiykunankupaq (Marcos 6:48). Chaymi Jesusqa chay urqumanta utqayllamanña uraykamuspan yakupa hawanta purirqa apostolninkunapa kasqanman. Chaykamaqa ñam lamar quchapa chawpinpiña apostolninkunaqa kachkarqaku (Juan 6:19). Hinaspam Jesusta rikuruspanku mancharisqallaña qaparispa nirqaku: “¡Imataq wakqa!”, nispa (Marcos 6: 49).

Jesusñataqmi hawkayachispan nirqa: “¡Ama manchakuychikchu! Ñuqam kani, kallpanchakuychikyá”, nispa. Ichaqa Pedrom nirqa: “Señorlláy qam kaspaykiqa, kamachiwayá yakupa hawanta qanman hamunaypaq”, nispa. Jesusñataqmi nirqa: “Hamuy”, nispa. Hinaptinmi Pedroqa botemanta lluqsiykuspan yakupa hawanta rirqa Jesuspa kasqanman. Ichaqa llumpa-llumpay wayramusqanta qawariykuspam mancharikurqa, hinaspam yaku ukuman chinkaykuyta qallaykuspan kaynata qaparirqa: “¡Señorlláy salvaykullawayyá!”, nispa. Jesusñataqmi makinmanta hapiruspan nirqa: “Pisi iñiyniyuq runa, ¿imanasqataq iskayrayarqanki?”, nispa (Mateo 14:27-31).

Boteman qispiruptinkuñataqmi wayraqa hawkayarurqa. Chaywanmi qatiqninkunaqa mana ima niytapas atirqakuchu. Ichaqa ‘tantawan milagro ruwasqanpa’ ima ninan kasqanta yachaspankuqa, manam yakupa hawanpi Jesus puriptinpas qawanakunmankuchu karqa. Chaywanpas Jesuspa ñawpaqninpi kumuykuspankum nirqaku: “Chiqaptapunim qamqa Diospa churin kanki”, nispa (Marcos 6:52; Mateo 14:33).

Capernaum llaqtapa wak lawnin Genesaret lawman chayaruspankuñataqmi botenkuta qucha patanman wataykurqaku. Runakunañataqmi chaylla Jesusta riqsirurqaku, hinaspam imaymana unquyniyuq runakunata apamurqaku. Chay unquq runakunaqa Jesuspa pachanpa patanta llachpaykuspallankum chaylla allinyarurqaku.

Chaykamaqa Jesuspa mikuchisqan achkallaña runakunam musyarurqaku Jesusqa huk lawmanña pasakusqanta. Chaymi Tiberiades lawmanta botekuna chayaruptin chay botekunaman qispispanku Capernaum llaqtaman Jesusta maskaq rirqaku. Tariruspankuñataqmi nirqaku: “Yachachikuq, ¿haykapitaq kaymanqa chayaramurqanki?”, nispa (Juan 6:25). Jesusñataqmi paykunata qaqcharurqa. ¿Imanasqa? Qatiqninpim chaymanta yachachkasun.