Jesús ancha askha runakunaman mijuchisqanta rikuspankun runakunaqa ninakuranku: “Kay runaqa kay pachaman jamunan karan chay profetapunin kanman”, nispa (Juan 6:14; Deuteronomio 18:18). Paykunaqa repararankun Jesús Mesías kasqanta, chaymi jap’iyta munasharanku reyta churanankupaq.

Chayta yachaspan Jesusqa runakunata kachapuran, discipulonkunatataq kamachiran boteman seqaspa Betsaida llaqtaman ñaupashanankupaq, chaymantataq Capernaum llaqtaman rinanku karan. Jesusmi ichaqa sapallan orqota riran chay tuta Diosmanta mañakuq.

Chay tuta killataq kasharan chayqa, karumantan Jesusqa discipulonkunata rikuran “boteta ñak’ayta suchuchishaqta, ñaupankumanta sinchita wayramusqanrayku” (Marcos 6:48). Chaymi orqomanta uraykuspa unu patanta puriyta qallariran paykuna ladoman. Chaypaqqa ñan paykunaqa “pisqa otaq soqta kilometrota jinaña botepi risharanku” (Juan 6:19). Jesusta rikuspankutaq paykunaqa sinchita mancharikuspa qapariranku: “¡Imataq jaqayri!”, nispa (Marcos 6:49).

Jinan Jesusqa paykunata niran: “¡Kallpachakuychis! Ama mancharikuychischu, noqan kani”, nispa. Jinan Pedroqa niran: “Señor, qanpuni kanki chayqa, kamachiway unu patanta qanman jamunaypaq”, nispa. Jesustaq: “¡Jamuy!” niran. Jinan Pedroqa botemanta uraykuspa unu patanta puriran. Ichaqa sinchi wayramusqanta rikuspan mancharikuran, unuman chinkaykushaspataq qapariran: “¡Señor, aysaruway!”, nispa. Jesustaq makinta jaywarispa jap’iran, jinaspa niran: “Pisi iñiyniyoq runa, ¿imanaqtinmi iskayaranki?”, nispa (Mateo 14:27-31).

Boteman seqaqtinkutaq wayraqa thanipuran. Jesuspa discipulonkunaqa ancha admirasqan kasharanku. Chaymi payman k’umuykuspa niranku: “Cheqaqtapunin qanqa Diospa Churin kanki”, nispa (Marcos 6:52; Mateo 14:33). Ichaqa, rikurankutaq waranqanpi runakunaman mijuchisqanta chayqa, manan admirakunankupaqchu karan Jesuspa unu patanta purisqanqa, wayrata thanichisqanpas.

Chaymantan paykunaqa chayaranku Capernaum llaqtaq cercanpi kaq munay Genesaret pampaman. Chaypin boteta wataspanku qocha pataman uraykuranku. Chaypi kaq runakunataq Jesusta rikuruspanku muyuriqpi kaq runakunapiwan payman apamuranku askha onqosqa runakunata, llapankutaq qhaliyapuranku Jesuspa p’achanta llamiykuspalla.

Chaykaman Jesuspa mijuchisqan runakunaqa manaña Jesusta rikuspanku Tiberíades ladomanta chayamuq botechakunaman seqaranku Capernaum ladopi Jesusta maskhanankupaq. Chay chimpapi tarispankutaq niranku: “Yachachikuq, ¿jayk’aqtaq kaymanri chayamuranki?”, nispa (Juan 6:25). Jinan Jesusqa paykunata anyaran. Chaymantan qatimuq capitulopi astawan yachasun.