Miracle so Jésus asara si lo mû kobe na gbâ ti azo so apika lani bê ti azo ni mingi. Ala tene na nda ni so “biani, koli so ayeke prophète so a fa kozoni awe so lo yeke ga na dunia so,” so ti tene Messie, na ala bâ so tongana lo duti fade gbia, ka ayeke nzoni mingi (Jean 6:14; Deutéronome 18:18). Tongaso, azo ni aleke ti tene ala sara si Jésus aga gbia.

Me, Jésus ahinga ye so ala ye ti sara so. Lo ngbâ lo tene na azo ni ti kiri, nga lo tene na adisciple ti lo ti gue ti monté na yâ ti ngö. Ti gue na ndo wa? Ala mû lege ti gue na Bethsaïda nga na Capernaüm. Me ti Jésus, lo zi tere ti lo, lo gue na ndo ti mbeni hoto lo oko, ti tene lo sambela na bï ni so kue.

Ngoi kete kozoni na yanga ti kota ndapre, wâ ti nze amû lege na Jésus ti bâ ngö ti adisciple ti lo ni ayo kâ. Amapo alondo na lê ti ngu ni mingi ndali ti so kota pupu asara. Abazengele ni ayeke ‘na kpale ti gbï kâî ndali ti so pupu ni ayeke ga gi gango na mbage ti ala.’ (Marc 6:48). Jésus adescend na li ti hoto ni na lo komanse ti tambela na ndo ti amapo ti ngu ni ti gue na mbage ti ala. Adisciple ni akpe na ngö ni “nduru na kilomètre oku wala omene tongaso awe”. (Jean 6:19). Tongana adisciple ni abâ so Jésus aye ti hon ala hongo, ala dekongo ngangu, na mbeto kue na yâ ti ala, ala tene: “So mbeni yingo la!”—Marc 6:49.

Jésus adë bê ti ala, lo tene: “Ala gi bê ti ala ape! Mbi la. Ala sara mbeto ape.” Me Pierre atene: “Seigneur, tongana a yeke mo la, mû yanga na mbi ti tambela na ndo ti ngu ni ti gue na tere ti mo.” Na Jésus atene na lo: “Mo ga!” Tongaso, Pierre asigi na yâ ti ngö ni na lo komanse ti tambela na ndo ti ngu ni ti gue na tere ti Jésus. Me tongana lo bâ kota pupu ni, mbeto ahon ndo ti lo na lo komanse ti linda ngu. Lo dekongo, lo tene: “Seigneur, sö mbi!” Hio Jésus ayôro maboko ti lo, lo gbu lo na lo tene na lo: “Mo zo ti kete mabe, mo zia si kite ahon ndo ti mo ngbanga ti nyen?”—Matthieu 14:27-31.

Tongana Jésus na Pierre amonté na yâ ti ngö ni, pupu ni akaï. Li ti adisciple akpe kue. Me, eskê a doit ti duti tongaso? En-ën, tongana ala gbu “nda ti ye ti kpene so lo sara fade ti mû na azo mapa so”, so ade a sara nga l’heure mingi ape so, ka fade li ti ala apeut ti kpe ape tongana ala bâ Jésus so ayeke tambela na ndo ti ngu na lo kaï pupu. Na pekoni, ala kuku na gbe ti lo, ala tene: “Mo yeke Molenge ti Nzapa biani.”—Marc 6:52; Matthieu 14:33.

Kete na pekoni, Jésus na adisciple ti lo ague na Gennésareth, mbeni pendere ndo so ayeke na mbage ti sud ti Capernaüm na so alê ti keke asi singo dä mingi. Ala zia ngö ni na lê ti ngu ni, na ala descend na sese. Azo ti ndo ni kâ ahinga Jésus, tongaso, ala nga na ambeni zo so ayeke na tere ti kodro ti ala aga na Jésus azo ti kobela ti ala. Na ngoi so azo ni ayeke ndu lani gi yanga ti bongo ti Jésus, droit ala wara sava.

Na oko ngoi ni, azo so abâ miracle so Jésus asara, ti mû kobe na azo saki mingi, abâ so Jésus ayeke dä ape. Tongaso, tongana akete ngö so alondo na Tibériade aga, ala mû ni na ala gue na peko ti Jésus na Capernaüm. Tongana ala si kâ, ala hunda ndo atene: “Rabbi, mo si ge lawa?” (Jean 6:25). Me, Jésus asuku na ala. Ngbanga ti nyen? E yeke bâ ni ande.