E telē se aafiaga ua oo i tagata, ona o le auala faavavega ua fafagaina ai e Iesu le faitau afe o tagata. Ua latou faapea ane, “e moni lava o le perofeta lenei na valoia e sau i le lalolagi,” o ia o le Mesia, ma o le a avea o se pule e sili ona fiafia i ai tagata. (Ioane 6:14; Teuteronome 18:18) O lea, ua taumafai ai tagata e puʻe Iesu ina ia fai o ia ma tupu.

Ua silafia e Iesu le mea o loo taumafai tagata e fai. Ua ia tuu atu le motu o tagata e ō, ma faatonu ona soo e toe foʻi i le vaa. O lea o le a latou ō atu i Petesaita, ma agaʻi atu ai i Kapanaumi. Peitaʻi, ua alu Iesu na o ia i le mauga e tatalo ai i le pō.

A o leʻi tafa mai ata, ua iloa atu e Iesu mai i se mea mamao le vaa o loo ō ai ona soo ona o le malamalama o le masina. Ua matuā sousou le vasa, ma ua faigatā i le ʻauaposetolo ona alo le vaa “auā ua agi malosi mai le matagi.” (Mareko 6:48) O lea ua alu ifo ai Iesu mai i le mauga, ma savali atu iā i latou i luga o le sami. O le taimi lea pe “tusa ma le tolu i le fā maila” le mamao ua latou alo ese atu ai. (Ioane 6:19) Ua iloa atu e le ʻausoo Iesu, ma e foliga mai o le a ia sopoloa i latou. O lea, ua latou fefefe ai ma feʻei leotetele e faapea: “E uiga ese lenei mea!”—Mareko 6:49.

Peitaʻi ua faapea atu ma le māfana Iesu iā i latou: “O aʻu lenei, ia outou lototetele ma aua tou te fefefe.” Ae ua tali mai Peteru: “Le Alii e, afai o oe, ia e fai mai iā te aʻu ou te alu atu iā te oe i luga o le vai.” Ua fetalai atu Iesu: “Inā sau ia!” O le taimi lava lea ua oso ai i lalo Peteru mai i le vaa, ma savali atu iā Iesu i luga o le sami. Ae ina ua vaai atu o ia i le matagi malosi, ona fefe ai lea o ia ma ua amata ona magoto ifo. Ua ia alaga atu: “Le Alii e, ta fia ola!” Ua faaloaloa atu le aao o Iesu, ua taofi iā te ia ma faapea atu: “O oe lenā o lē e faatuatua itiiti, aiseā ua e masalosalo ai?”—Mataio 14:27-31.

Ua ō aʻe nei Iesu ma Peteru i luga o le vaa, ma ua toʻa foʻi le matagi. Ua maofa le ʻausoo i lenei mea. Ae pe e tatau ona latou maofa? Pe ana faapea na latou malamalama i “le uiga o falaoa” ia na faavavega ona fafagaina ai e Iesu le faitau afe o tagata, semanū e latou te lē maofa i le mafai e Iesu ona savali i luga o le sami ma faatoʻafilemu le matagi. O lea ua latou ifo ai iā te ia ma faapea atu: “E moni o oe lava o le Alo o le Atua.”—Mareko 6:52; Mataio 14:33.

E leʻi umi ae latou taunuu i Kenesareta, o se fanua laugatasi e matagofie ma fua tele mai, lea e i le itu i saute o Kapanaumi. Ua taula ai i inā le vaa, ma latou ō atu i luga o le matafaga. Ua iloa atu e tagata Iesu, ma ua latou ō atu ma isi tagata mai i nuu tuaoi ma avatu iā te ia ē ua mamaʻi. Ina ua papaʻi atu nei tagata mamaʻi i le pito o le ofu tele o Iesu, ona toe malolosi ai lea o i latou.

Ua iloa e le motu o tagata na vāaitino i le fafagaina faavavega e Iesu o le faitau afe o tagata, ua maliu ese o ia mai i se nofoaga lea e i tala atu o Petesaita. O lea, ina ua taunuu ane tamaʻi vaa mai i Tiperia ona latou ō ai lea i nei vaa, ma folau atu ai i Kapanaumi e saʻili iā Iesu. Ina ua latou maua o ia, ona latou fesili atu lea: “Le Aʻoaʻo e, o anafea na e maliu mai ai i inei?” (Ioane 6:25) Peitaʻi ua matuā aʻoaʻia i latou e Iesu, ma o le a tatou iloiloina le māfuaaga ua ia faia ai faapea.