A wondru di Yesus du fu gi dusundusun sma nyanyan abi furu krakti tapu den sma. Den kon si taki en na a Mesias, „a profeiti di ben o kon na grontapu” (Yohanes 6:14; Deuteronomium 18:18). Den kon si tu taki a o de wan bun tiriman trutru. Dati meki den sma wani grabu Yesus fu poti en leki kownu.

Ma Yesus sabi san den sma wani du. A e seni den sma gowe èn a e taigi den disipel fu en fu go baka na ini a boto fu den. Pe den o go? Den musu go na Betsaida èn baka dati den o go na Kaperna-um. Ma Yesus e go na tapu wan bergi fu begi en wawan a neti dati.

Syatu bifo dei broko te a mun e skèin ete, Yesus e si a boto fu den farawe. A winti e wai bun tranga èn a watra e seki hebi. Dati meki a „hebi gi den disipel fu tyari a boto” (Markus 6:48). Yesus e saka komoto fu a bergi èn a bigin waka na tapu a watra go na den. Now den „pari sowan feifi kilometer” kaba (Yohanes 6:19). Den disipel e si wani sani e waka kon, ma den no sabi taki na Yesus. Fu di den frede, den e bari: „San na a sani dati?”​—Markus 6:49.

Fu no meki den frede moro, Yesus e taigi den: „Abi deki-ati, na mi. No frede.” Ne Petrus piki en: „Masra, efu na yu, dan taigi mi fu waka kon na yu na tapu a watra.” Yesus e taki: „Kon!” Te a taki dati, Petrus e komoto na ini a boto èn a e waka na tapu a watra go na Yesus. Ma te Petrus e si fa a bigi winti e wai, a e kon frede èn a e bigin sungu. A e bari: „Masra, yepi mi!” Yesus e langa en anu grabu Petrus, èn a e taki: „Yu no e bribi nofo. Fu san ede yu bigin tweifri?”​—Mateyus 14:27-31.

Petrus nanga Yesus e go na ini a boto èn a winti e kon tiri. Den disipel no man bribi. Ma a sani disi musu fruwondru den? Wan tu yuru na fesi, Yesus ben du wan wondru fu gi dusundusun sma nyanyan. Efu den ben frustan san „a wondru fu den brede ben wani taki”, dan den no ben o abi fu fruwondru taki a ben man waka na tapu a watra èn taki a ben man meki a winti kon tiri. Now den e boigi gi Yesus èn den e taki: „Yu na trutru a Manpikin fu Gado.”​—Markus 6:52; Mateyus 14:33.

A no langa baka dati, den e doro a moi lagipresi fu Geneisaret, na a zuidsei fu Kaperna-um. Den e ankra a boto èn baka dati den e go na syoro. Te den sma e si taki Yesus doro, dan den nanga tra sma fu den foto èn fu den boitipresi drape e tyari siki sma kon na en. Te den e fasi a franya fu en dyakti nomo, dan a heri siki fu den e gowe.

Ma den sma di si fa Yesus du wan wondru fu gi dusundusun sma nyanyan, kon si taki Yesus gowe. Fu dati ede, di pikin boto fu Tiberias doro drape, den sma go na ini den boto èn den seiri go na Kaperna-um fu go suku Yesus. Te den feni en, dan den e aksi en: „Leriman, o ten yu kon dya?” (Yohanes 6:25) Yesus o piri-ai gi den, soleki fa wi o si.