Maleele ngaacita Jesu aakusanina zyuulu zyabantu abagambya kapati bantu. Bazyiba kuti “ooyu ncobeni ngo Musinsimi wakasinsimwa kuti uyooboola munyika,” nkokuti Mesiya, alimwi babona kuti inga waba mweendelezi mubotu. (Johane 6:14; Deuteronomo 18:18) Aboobo bantu bapangana kuti bamujate Jesu akumubikka kuba mwami.

Pele Jesu wacizyiba ncobakanza kucita bantu. Wamwaya makamu aabantu akwaambila basikwiiya bakwe kuti bapiluke mubwato. Balainda kuli alimwi ino nkuli nkobaya? Balainda ku Betesaida mpoonya baunke ku Kapernauma. Pele walo Jesu, waunka kucilundu kuyoopaila kali alikke busiku oobo.

Mumumuni wamwezi kubucedo, Jesu wabona bwato kulaale. Muwo uubbubbula canguzu wanyamuna mayuwe aamulwizi, eelyo baapostolo ‘cabakatazya kukwasula, nkaambo guwo libbubbula kuletezya nkobaya.’ (Marko 6:48) Jesu waselemuka kuzwa acilundu akutalika kweenda atala aamayuwe kugama kulimbabo. Lino bali kukwasula bwato “musinzo wamakkilomita aatandila kuli osanwe naa cisambomwe.” (Johane 6:19) Basikwiiya bamubona Jesu keenda mbuli kuti uyanda kubaindilila, eelyo akaambo kakuyoowa bakwiila balaamba: “Ncilengaano!”—Marko 6:49.

Cakubakkazika moyo Jesu wabaambila kuti: “Amukkazike myoyo! Ndime; mutayoowi pe.” Pele Petro waamba kuti: “Mwami, ikuti naa nduwe ncobeni, kondaambila ndiboole kulinduwe kandeenda atala aamaanzi.” Jesu wavwiila kuti: “Koboola!” Naamvwa boobo, Petro waseluka mubwato akutalika kweenda atala aameenda kuya kuli Jesu. Pele naalanga guwo, Petro wayoowa akutalika kubbila. Wakwiila wati: “Mwami, kondivwuna!” Mpoonya Jesu watambika janza lyakwe, wamujata Petro akumwaambila kuti: “Yebo osilusyomo luniini, nkaambo nzi ncoodooneka?”—Matayo 14:27-31.

Petro a Jesu batanta mubwato, alyalo guwo lyaleka. Basikwiiya bagambwa, pele sena mubwini baleelede kugambwa? Ikuti nobazimvwisya ‘ncozyali kwaamba zinkwa,’ imaleele ngaazwa akucita Jesu mawoola masyoonto buyo aainda ciindi naasanina zyuulu zyabantu, nobatagambwa pe kubona kuti weenda atala aameenda akuumuzya muwo. Lino baile kumufwugamina buyo, balaamba: “Masimpe uli Mwana wa Leza.”—Marko 6:52; Matayo 14:33.

Muciindi buyo cisyoonto basika kucibanda cibotu alimwi icijisi nyika mbotu ca Genesarete, icili kumusanza aamunzi wa Kapernauma. Ooko babwiimika bwato akuseluka. Bantu bamuzyiba Jesu, eelyo antoomwe abantu bambi ibazwa muminzi yeengelede, baleta balwazi kulinguwe. Balwazi aaba mbobagumina buyo moombe wacisani ca Jesu caatala, baponesyegwa cakumaninina.

Aciindi eeci, nkamu yabantu abaya ibakalibonena makamu aabantu mbwaakasaninwa munzila yamaleele bazyiba kuti Jesu waunka. Aboobo mato masyoonto-syoonto aazwa ku Tiberiya naasika, bantu batanta mulingawo akuunka ku Kapernauma kuyakuyandaula Jesu. Nobamujana, bamubuzya kuti: “Rabbi, ino wasika lili kuno?” (Johane 6:25) Kajisi kaambo kalimvwisya, Jesu wabasinsa mbubonya mbotutiibone.