Ocikomo Yesu a linga coku tekula omanu valua, ca komõhisa calua omanu vaco. Ovo va kuata elomboloko liokuti, “eye Uprofeto wa laikele oku iya voluali,” okuti Mesiya, kuenda eye ombiali omanu vosi va yongola oku kuata. (Yoano 6:14; Esinumuĩlo 18:18) Omo liaco, omanu va seteka oku u kuata oco vo lingise osoma.

Yesu o limbuka eci omanu va kasi oku sokiya. Noke o sapuila omanu oco va ende, kuenje o tuma olondonge viaye oco vi tiukile vowato. Pi olondonge vi kasi oku enda? Vienda ko Betesaita, noke vienda ko Kafarinau. Vuteke waco, Yesu o londa komunda likaliaye oco a likutilile.

Osimbu ka kuacile okuti osãi ya tua, Yesu o muila ocipãla owato. Ofela yalua yi lingisa okuti akimba okalunga a livokiya, kuenje ovapostolo va “tatayala oku [tapula] omo liofela yalua.” (Marko 6:48) Yesu o loka komunda kuenje o fetika oku endela kilu liovava oco a pitĩle kokuavo. Pole, cilo ovapostolo ‘va tapula ale owato ci soka olokilometulu vitãlo ale epandu.’ (Yoano 6:19) Ovo va mola Yesu kuenje va sima okuti o va pitahãla, yu va fetika oku kaluka lusumba vati: “Eci ocinjoinjoi!”—Marko 6:49.

Yesu o va lembeleka poku va sapuila hati: “Kuati utõi! Ame; ko ka kuati usumba.” Pole, Petulu o popia hati: “A Ñala, nda ove muẽle, mañinye oku endela kilu liovava toke kokuove.” Yesu u tambulula hati: “Enju!” Petulu o loka vowato, kuenje o fetika oku endela kilu liovava oco a lisange la Yesu. Pole, Petulu poku vanja kehunguhungu liofela, o kuata usumba walua kuenje o fetika oku vomba. Omo liaco, o kaluka hati: “A Ñala, mopele!” Yesu oku olõla eka liaye o kuata Petulu kuenje u sapuila hati: “Okuekolelo litito, momo lie wa kuatela atatahãi?”—Mateo 14:27-31.

Petulu kumue la Yesu va londa vowato kuenje ofela yi tulumuha. Olondonge vi komõha. Anga hẽ vi kuete esunga lioku komõha? Nda ovio via kuatele “elomboloko liolombolo” okuti ocikomo Yesu a linga eci a tekula omanu valua, ovo nda ka va komõhele poku mola Yesu oku endela kilu liovava kuenda oku tulumula ofela. Pole, cilo, vo kekamẽla kuenda va popia vati: “Ocili, ove Vumõla a Suku.”—Marko 6:52; Mateo 14:33.

Noke va pitĩla ko Genesarete kombuelo yo Kafarinau okuti, ocitumãlo cimue ca posoka haiko ovikũla vima ciwa. Noke va kapa onjundo kowato kuenje va loka. Omanu va limbuka Yesu kuenje ovo kumue lomanu vo kolonepa vikuavo, va nena kokuaye omanu va vela. Omanu vaco va sakuiwa poku lamba lika kolunjenje yuwalo wa Yesu.

Noke owiñi una wa mola Yesu oku linga ocikomo coku tekula omanu valua, wa limbuka okuti, Yesu wa enda. Omo liaco, eci awato o ko Tiberia a pitĩla, omanu va londa kuenje va enda ko Kafarinau oco va ka sange Yesu. Eci vo sanga vo pula vati: “A Rambei, eteke lipi weya kulo?” (Yoano 6:25) Yesu o va pisa, pole, o kuete esunga lioku ci linga, ndomo tu ka ci konomuisa vocipama ci kuãimo.