Owerya Yesu aarina awe wa waalyiha atthu ikonto sinceene, waahaatikiniha atthu anceene. Awo yaahihimya wira: “Vekekhai, ola ti Profeta yole ontthuna orwa molumwenkuni-mu”, eyo piiyo, Mesiya. Tivonto yaahiphavela omukhaliha namalamulela aya. (Yohani 6:14; Otumererya 18:18) Tthiri atthu ale yaahimpaka palano oomukhaliha Yesu mwene.

Masi Yesu, aahoona wira atthu ale yaaphavela omukhaliha mwene. Nto aahaamwarya atthu ale ni aahaalakiherya awiixutti awe okela mukalawani. Yaarowa opuro xeeni? Awo yaaronwe oBethisaida, nuumala-vo oKafarnawu. Nto ohiyu ole Yesu aahirowa omwaako ovekela mekhawe.

Mweeri waaryaka, nlelo vahinatthi oxa, Yesu aahiweha ekalawa eri ene ottaiwene. Mawimpi yaahikumiherya epheyo yuulupale, nto arummwa “wanalipela olapuwa, okhala wira epheyo yanavelaveliha”. (Marko 6:48) Yesu aahikhuruwa omwaako oneetta vasulu va maasi. Masi awiixutti ale yaaheettiha ekalawa “mpakha ikilomo thanú walá thanu na mmosá”. (Yohani 6:19) Awiixutti ale yoona wira Yesu amwaavikana, nto yoovaka yaahikhuwela ariki: “Munepa”.​—Marko 6:49.

Aamaalihaka, Yesu aahiwaakhula wira: “Khurunuwani murima: ti miyano. Muhòvé!” Masi Pedru aahimwaakhula wira: “Pwiya, mwàri nyuwo, kirumeni kiphiye varyanyu, kettaka vasulu va màsi”. Yesu aahimwaakhula wira: “Murweke pahi!” Vano Pedru aahikhuma mukalawani oneetta orowaka waari Yesu. Masi vaavo aaweha awe epheyo, Pedru aahoova, onapacerya osama. Nto aahikhuwela oriki: “Pwiya, mukòpole”. Omookolelaka ntata, Yesu aahinvara Pedru khumuleela wira: “Nyuwo, mulopwana òwamini vakhani: muhoveryenle-ni?”—Matheyo 14:27-31.

Yesu ni Pedru yaahiwela mukalawani nto epheyo yaahimaala. Awiixutti ale yaahitikinihiwa. Masi niireke yahaana otikinihiwa? Nnaari. Maana vaakhanle wira yaahiiwexexa mwiiriirya “wa iphau” Yesu aapanke awe iwoora vakhaani, khiyaarowa otikinihiwa wira Yesu onniwerya weetta vasulu va maasi ni omaaliha epheyo. Vano, yaahikokhora ohoolo wa Yesu yiiraka: “Vekekhai, nyuwo mwá Mwana a Muluku!”—Marko 6:52; Matheyo 14:33.

Moohipisa, awo yaahiphiya opuro wooreera ni woowunttelana oGenesare, mpantta onikhuma epheyo wa oKafarnawu. Yaaheemexa ekalawa aya anakhumela ota. Nuumala onweha Yesu, awo ni atthu akina a mittetthe sa elapo ele, yaahimuruuhela aretta aya. Nto vaavo atthu yaavara aya nlaya na Yesu, awo yaanivona.

Okathi omosaru, muttitthi yoole waamoonale Yesu aalyihaka mwa mwiiriirya atthu ikonto sinceene, waahisuwela wira Yesu aahikhuma. Tivonto, okathi saaphiyale aya ikalawa saakhuma oTiberiyade, atthu ale yaahiwela anarowa oKafarnawu wira yakumane ni Yesu. Nuumala omphwanya yaahimukoha wira: “Mwixuttihi, mphiyalé lini nno?” (Yohani 6:25) Yesu aahaapwapwela ntoko ninrowa ahu oweha.