An abilidad ni Jesus ha pagpakaon hin yinukot ha milagroso nga paagi may daku nga epekto ha mga tawo. Naghunahuna hira nga “ini gud an propeta nga igintagna nga makanhi ha kalibotan,” an Mesias, ngan sigurado nga magigin maopay gud hiya nga magmarando. (Juan 6:14; Deuteronomio 18:18) Salit nagplano an mga tawo nga piriton hi Jesus nga magin hadi.

Pero maaram hi Jesus han plano han mga tawo. Ginpabaya niya hira ngan ginsugo an iya mga disipulo nga bumalik ha baluto. Makain man an mga disipulo? Makadto hira ha Betsaida, ngan katapos ha Capernaum. Pero hi Jesus kumadto ha bukid basi mag-ampo nga nag-uusahan hito nga gab-i.

Han kaagahon, samtang malamrag an bulan, gin-inobserbaran ni Jesus an baluto tikang ha hirayo. Tungod han makusog nga hangin, nandagku an mga balud, ngan an mga apostol ‘nakurian pagbugsay kay nasungsong hira ha hangin.’ (Marcos 6:48) Lumugsad hi Jesus ha bukid ngan naglakat ha bawbaw han mabalud nga dagat tipakadto ha ira. Hito nga takna, “sobra lima ka kilometro na an ira kahirayo.” (Juan 6:19) Nakita han mga disipulo nga baga hin lalabyan hira ni Jesus, salit gumuliat hira tungod ha kahadlok: “Urusahon gud ini nga bisyon!”—Marcos 6:49.

Ginpasarig hira ni Jesus ha pagsiring: “Magmaisugon kamo! Ako ini, ayaw kamo kahadlok.” Pero hi Pedro siniring: “Ginoo, kon ikaw ito, palakta ako ngada ha imo ha bawbaw han tubig.” Hi Jesus binaton: “Kadi!” Salit hinaw-as hi Pedro ha baluto ngan naglakat ha bawbaw han tubig tipakadto kan Jesus. Pero han ginkinita ni Pedro an makusog nga subasko, nahadlok hiya ngan nagtikalunod. Gumuliat hiya: “Ginoo, talwasa ako!” Ginkaptan dayon hiya ni Jesus ngan ginsidngan: “Kagutiay han imo pagtoo. Kay ano nga nagruruhaduha ka?”—Mateo 14:27-31.

Sumakay hira Pedro ngan Jesus ha baluto, ngan an hangin kumalma. Nahipausa gud an mga disipulo, pero angay gud ba hira mahipausa? Kon nasantop nira an “leksyon han milagro may kalabotan han tinapay” nga ginhimo ni Jesus mga pipira pa la ka oras an naglabay basi pakaunon an yinukot, diri unta hira mahipapausa nga nakakalakat hiya ha tubig ngan nakakapakalma han hangin. Katapos yinukbo hira ha iya, ngan nagsiring: “Ikaw gud an Anak han Dios.”—Marcos 6:52; Mateo 14:33.

Waray pag-iha inabot hira ha Genesaret, usa nga maopay nga lugar nga may mabungahon nga kapatagan, ha sur han Capernaum. Ira gin-angklahan an baluto ngan kinadto ha baybayon. Nakilala han mga tawo hi Jesus, ngan upod han iba tikang ha kahigrani nga lugar, gindara nira ha iya an mga may sakit. Han nakaptan hini nga mga may sakit an sidsid han pantungbaw nga panapton ni Jesus, nag-opay hira.

Hito liwat nga takna, an mga nakakita han milagroso nga pagpakaon ha yinukot nga tawo nahibaro nga bumaya hi Jesus. Salit han umabot an gudtiay nga mga baluto tikang ha Tiberias, an mga tawo sumakay hito ngan nagbiyahe ngadto ha Capernaum basi bilngon hi Jesus. Han nakita nira hi Jesus, hira nagsiring: “Rabbi, kakan-o ka inabot dinhi?” (Juan 6:25) Sugad han aton mahibabaroan, may maopay nga hinungdan nga ginsaway hira ni Jesus.