KAPITE 53
He Hau ʼe Feala Ke Ina Puleʼi Te ʼu Malohi ʼo Te Natula
MATEO 14:22-36 MALEKO 6:45-56 SOANE 6:14-25
-
ʼE FIA FAKANOFO E TE HAHAʼI IA SESU KO HE HAU
-
ʼE HAʼELE IA SESU ʼI TE FUGA TAI, ʼE INA FAKAGONA TE MATAGI
Neʼe malave ʼaupito ki te hahaʼi te lava fafaga fakamilakulo e Sesu ia te toko lauʼi afe hahaʼi. Neʼe natou ui ai “ ʼe ko ia moʼoni te Polofeta ʼae neʼe tonu ke haʼu ki te malamanei,” te Mesia, pea neʼe natou manatu ai ʼe feala anai ke liliu ko he hau ʼe lelei ʼaupito. (Soane 6:14; Tetelonome 18:18) Koia neʼe fakatuʼutuʼu ai e te hahaʼi ke natou toʼo ia Sesu pea natou fakanofo ia ia ko he hau.
Kaʼe neʼe iloʼi e Sesu tanatou fakatuʼutuʼu ʼaia. Neʼe ina fakaliliu te hahaʼi pea ina fakatotonu ki ʼana tisipulo ke natou toe liliu ʼi te vaka. Kaʼe ke natou olo kifea? Neʼe tonu ke natou olo muʼa ki Petesaita, pea ki muli age leva ki Kapenaume. Kaʼe ko Sesu, neʼe hake tokotahi ia ki te moʼuga ʼo faikole ai ʼi te po ʼaia.
ʼI te malama ʼo te mahina ʼi muʼa ʼo te ha ʼo te laʼa, neʼe sioʼi mai mamaʼo e Sesu ia te vaka. Neʼe hou ia te tai he neʼe malohi te agi ʼa te matagi, pea ‘neʼe faigataʼa ki te kau apositolo tanatou aʼalo, he neʼe fakatau matagi te vaka.’ (Maleko 6:48) Neʼe hifo Sesu mai te moʼuga pea neʼe kamata haʼele ʼi te fuga tai ʼo alu kia natou. Neʼe kua natou “tau aʼalo ia teitei kilometa ʼe nima peʼe ono.” (Soane 6:19) Neʼe sisio te ʼu tisipulo kia Sesu kaʼe neʼe hage neʼe fia fakalaka ia natou, pea ʼi tanatou matataku neʼe natou kalaga fenei: “ ʼE ko te laumalie!”—Maleko 6:49.
Neʼe tali fenei age e Sesu moʼo fakafimalieʼi ʼo natou: “ ʼE ko au, ʼaua naʼa kotou matataku.” Kaʼe, neʼe tali fenei age e Petelo kia te ia: “ ʼAliki, kapau ko koe, fakatotonu mai ke au alu atu ʼi te fuga tai.” Neʼe ui fenei age e Sesu: “Haʼu!” Neʼe hifo leva ia Petelo ʼi te vaka ʼo haʼele ʼi te fuga tai ʼo alu kia Sesu. Kaʼe ʼi tana tokagaʼi te malohi ʼo te matagi, neʼe mataku ai ia Petelo pea kamata mou ai. Neʼe kalaga fenei: “ ʼAliki, haofaki au!” Neʼe faoʼi atu aipe e Sesu tona nima ʼo ina puke ia Petelo, pea ina ui fenei age: “Tagata tui vaivai, he koʼe kua ke lotolotolua?”—Mateo 14:27-31.
Neʼe heheka ia Petelo mo Sesu ki te vaka, pea neʼe malū ifo leva te matagi. Neʼe punamaʼuli te kau tisipulo, kaʼe neʼe tonu koa ke natou punamaʼuli? Ka na pau la neʼe natou mahino ki te “fakaʼuhiga ʼo te ʼu foʼi pane,” ia te milakulo ʼae neʼe fai e Sesu ʼi he ʼu kiʼi hola pe ʼi muʼa atu ʼi tana fafaga te toko lauʼi afe hahaʼi, ka na ʼaua la neʼe mole natou punamaʼuli ki te lava haʼele ʼa Sesu ʼi te fuga tai pea mo tana fakagona te matagi. Neʼe natou hu kia te ia ʼo natou ui fenei: “ ʼE ko koe moʼoni te ʼAlo ʼo te ʼAtua.”—Maleko 6:52; Mateo 14:33.
Mole tuai, pea neʼe natou tau atu ki Senesaleti, ko te koga meʼa matalelei mo mahu ʼe tuʼu ovi ki Kapenaume. Neʼe natou li te foʼi tau pea natou hihifo ʼi te vaka. Neʼe iloʼi e te hahaʼi ia Sesu, pea fakatahi mo te tahi atu hahaʼi mai te ʼu tafaʼaki, neʼe natou ʼaumai kia te ia natou ʼae neʼe mahahaki. ʼI te fa atu pe ʼa natou ʼaia ki te tapaʼi kofu tuʼa ʼo Sesu, neʼe natou malolo ai.
Lolotoga te temi ʼaia, ko te hahaʼi ʼae neʼe natou sisio ki te fafaga fakamilakulo e Sesu te toko lauʼi afe hahaʼi, neʼe natou tokagaʼi kua alu ia Sesu. Koia ʼi te temi ʼae neʼe tau mai ai te ʼu kiʼi vaka mai Tipeliate, neʼe heheka te hahaʼi ki ai pea natou olo ki Kapenaume ʼo kumi ia Sesu. ʼI tanatou maʼu ia Sesu, neʼe natou fehuʼi fenei age kia te ia: “Lapi, neʼe ke haʼu ʼanafea ki heni?” (Soane 6:25) ʼE tou vakaʼi anai, neʼe fakatonutonuʼi natou e Sesu he neʼe ʼi ai tona tupuʼaga lelei.