Le milagro tu beetaj Jesús utiaʼal u tséentik u milesil máakoʼoboʼ tu beetaj u péek u yóoloʼob. Letiʼobeʼ joʼopʼ u yaʼalikoʼob: «Jach tu jaajileʼ, lelaʼ letiʼe profeta aʼalaʼan kun taal way yóokʼol kaabaʼ», letiʼe Mesíasoʼ, letiʼeʼ jach maʼalob utiaʼal u beetik u gobernanteil (Juan 6:14; Deuteronomio 18:18). Ka joʼopʼ u tuklik u bin u machoʼob Jesús utiaʼal u tsʼáaʼob u beet u reyil.

Baʼaleʼ Jesuseʼ tu tsʼáaj cuenta baʼax ku tuklik u beetkoʼob. Ka lukʼ yéetel u disipuloʼob yiknal le máakoʼoboʼ ka binoʼob tu barcoʼob. ¿Tuʼux túun binoʼob ka tsʼoʼoki? Betsaida, ka tsʼoʼokeʼ binoʼob Capernaum. Baʼaleʼ ka áakʼabchajeʼ Jesuseʼ bin tu juunal teʼ puʼuk oraroʼ.

Desde teʼ puʼukoʼ páajchaj u yilik le barco tu sáasilil le lunaoʼ. Le barcooʼ joʼopʼ u woʼoltaʼal tumen u olasil le kʼáaʼnáaboʼ yéetel jach kʼaʼam le iikʼoʼ. Le apostoloʼoboʼ «istikyaj u binoʼob yéetel le barcooʼ tumen aktáan tiʼob ku jaatsʼ le iikʼoʼ» (Marcos 6:48). Jesuseʼ éem teʼ puʼukoʼ ka joʼopʼ u xíimbal yóokʼol le kʼáaʼnáab utiaʼal u bin tu yiknaloʼoboʼ. Baʼaleʼ «tsʼoʼok u náachtaloʼob kex cinco wa seis kilómetros yéetel le barcooʼ» (Juan 6:19). Le disipuloʼoboʼ tu yiloʼob u chíikpajal Jesús táan u bin tu yiknaloʼob, ka sajakchajoʼobeʼ joʼopʼ u yaʼalikoʼob: «¡Juntúul jaʼasaj óol!» (Marcos 6:49).

Jesuseʼ tu yaʼalajtiʼob: «¡Maʼ a sajaktaleʼex! Teen; maʼ a chʼaʼikeʼex saajkil». Baʼaleʼ Pedroeʼ tu yaʼalaj: «Yuumtsil, wa jaaj teecheʼ, aʼalten ka taalaken ta wiknal tu yóokʼol le jaʼoʼ». Jesuseʼ tu yaʼalajtiʼ: «¡Koʼoten!». Pedro túuneʼ éem teʼ barcooʼ ka káaj u xíimbal yóokʼol le jaʼoʼ ka joʼopʼ u bin tu tojil Jesús. Baʼaleʼ ka tu yuʼubaj jach kʼaʼam le iikʼoʼ sajakchaji, ka joʼopʼ u búulul. Ka joʼopʼ u yaʼalik: «¡Yuumtsil, salvarteniʼ!». Ka tu tichʼaj u kʼabeʼ ka tu machaj, ka tu yaʼalajtiʼ: «Jach túun junpʼíit a fe, ¿baʼaxten kaʼapʼéelchaj a tuukul?» (Mateo 14:27-31).

Pedro yéetel Jesuseʼ naʼakoʼob teʼ barcooʼ ka jéetsʼ le iikʼoʼ. Le disipuloʼoboʼ jaʼakʼ u yóoloʼob, baʼaleʼ ¿unaj wa kaʼach u jaʼakʼal u yóoloʼob? Letiʼobeʼ «maʼ u naʼatoʼob baʼax unaj u kankoʼob kaʼach tiʼ le milagro» tu beetaj Jesús le ka tu tséentaj u milesil máakoʼoboʼ. Wa páajchaj u beetkeʼ jeʼel xan u páajtal u xíimbal yóokʼol le jaʼ yéetel u beetik u jéetsʼel le iikʼoʼ. Ka xolajoʼob tu táan utiaʼal u yeʼeskoʼob tsiikil tiʼ yéetel joʼopʼ u yaʼalikoʼob: «Jach tu jaajil u Paalech Dios» (Marcos 6:52; Mateo 14:33).

Maʼ sáam tiʼ leloʼ náatsʼoʼob tu jatsʼuts táax luʼumil Genesaret, naatsʼ tiʼ Capernaum. Tu kʼaxoʼob le barcooʼ ka éemoʼob yóoʼ luʼum. Le máakoʼob teʼeloʼ tu kʼaj óoltoʼob Jesús, bey xan uláakʼ máakoʼob tiʼ uláakʼ kaajoʼob yanoʼob naatsʼoʼ, ka tu taasoʼob le kʼojaʼanoʼob utiaʼal ka tsʼaʼakakoʼoboʼ. Le ken u machoʼob u chiʼ u nookʼ Jesuseʼ ku yutstaloʼob.

Le máaxoʼob aʼalaʼabtiʼob bix úuchik u tséentaʼal u milesil máakoʼob tumen Jesusoʼ tu yiloʼobeʼ tsʼoʼok u bin. Le oʼolal ka kʼuch u barcoiloʼob Tiberíadeseʼ naʼakoʼobeʼ ka binoʼob Capernaum u yiloʼob Jesús. Ka tu yiloʼobeʼ tu kʼáatoʼobtiʼ: «J-Kaʼansaj, ¿baʼax kʼiin ka kʼuchech wayeʼ?» (Juan 6:25). Baʼaleʼ kʼeʼeyoʼob tumen Jesús, jeʼex ken k-il tuláakʼ xookoʼ.