Kɛ Zezi o Galile Jenvie’n i bue ng’ɔ o wia afiliɛ lɔ’n su’n, ɔ yili atrɛ mannin sran kpanngban be aliɛ. I sin’n, ɔ wanndili be. Afin be waan bé trɛ́ i naan bé síe i famiɛn. Cɛn kunngba sɔ’n nun’n, kɔnguɛ’n, ɔ nantili nzue’n su. Kɛ ɔ́ yó sɔ’n, nn aunmuan’n su fita dan kpa. Blɛ sɔ nun’n, ɔ deli Piɛli m’ɔ su nanti nzue’n su wie’n. Sanngɛ kɛ Piɛli i akunndan’n wa yoli nɲɔnnɲɔn’n, ɔ mlɔnnin. I sin’n, Zezi yoli maan aunmuan’n yacili fitalɛ. Sɛ Zezi w’a yoman sɔ’n, nn atrɛkpa i sɔnnzɔnfuɛ’m be alie’n sacili.

I sin’n, Zezi sɛli i sin jenvie’n i wia atɔliɛ bue liɛ’n su, Kapɛɛnaɔmun asa’n su lɔ-ɔ. Be nga ɔ yili atrɛ mannin be aliɛ’n, be ko toli i lɔ naan b’a usɛ i kɛ: “?Blɛ onin nun yɛ a juli wa-ɔ?” Zezi ijɔli be. Ɔ seli be kɛ aliɛ dilɛ ti yɛ be su kunndɛ i-ɔ. Ɔ wlali be su nun kpa kɛ be “di junman aliɛ m’ɔ saciman m’ɔ man nguan m’ɔ leman awieliɛ’n, i ti.” Yɛ be usɛli i kɛ: “?Ngue yɛ ɔ fata kɛ e yo naan Ɲanmiɛn i klun w’a jɔ e wun-ɔn?”​—Zan 6:25-28.

Atrɛkpa’n, be bu i kɛ ndɛ ng’ɔ o Moizi Mmla’n nun yɛ ɔ fata kɛ be fa su naan Ɲanmiɛn i klun w’a jɔ be wun-ɔn. Sanngɛ Zezi kannin mmla uflɛ ndɛ. Mmla sɔ’n i su dilɛ’n ti kpa trɛ i ngba. Ɔ seli kɛ: “Like nga Ɲanmiɛn klo kɛ amun yo’n yɛ ɔ o yɛ: Maan amun kle kɛ amun lafi sran m’ɔ sunmɛnnin i’n i su.” Zezi yili atrɛ kpanngban, ɔ nin i sɔ ngba’n, sran sɔ’m b’a kleman kɛ be lafi i su. I sɔ’n ti’n, be seli i kɛ ɔ yi atrɛ kun, i liɛ’n bé láfi i su. Ɔ maan be usɛli i kɛ: “?Like onin yɛ á yó-ɔ?” Be kan guali su kɛ: “E nannan’m be dili manin aawlɛ flɛnnɛn’n nun lɔ. Afin be klɛli i kɛ: ‘Ɔ mannin be kpanwun m’ɔ fin ɲanmiɛn su lɔ’n kɛ be di.’”​—Zan 6:29-31; Jue Mun 78:24.

Zezi seli be kɛ sran kunngba cɛ yɛ ɔ kwla fa like ng’ɔ mian sran’m be sa’n, ɔ man be-ɔ. I waan: “Nanwlɛ, ń kán klé amun kpa kɛ Moizi w’a manman amun kpanwun m’ɔ fin ɲanmiɛn su’n. Sanngɛ min Si yɛ ɔ man amun kpanwun kpafuɛ’n m’ɔ fin ɲanmiɛn su’n niɔn. Afin Ɲanmiɛn i kpanwun’n yɛle sran m’ɔ fin ɲanmiɛn su m’ɔ man mɛn nunfuɛ’m be nguan’n.” Sanngɛ sran sɔ’m b’a wunman Zezi i ndɛ sɔ’n i wlɛ kaan sa. Ɔ maan be seli kɛ: “E Min, man e kpanwun sɔ’n titi.” (Zan 6:32-34) ?“Kpanwun” benin yɛ su Zezi kɛn i ndɛ-ɔ?

Zezi seli be kɛ: “Min yɛ n ti kpanwun m’ɔ man nguan’n niɔn. Sran kwlaa ng’ɔ ba min sin’n, awe su kunmɛn i kun mlɔnmlɔn. Yɛ sran kwlaa ng’ɔ kle kɛ ɔ lafi min su’n, nzuewe su kunmɛn i kun le. Sanngɛ kɛ nga n kan kleli amun’n sa’n, amun wunnin min, ɔ nin i sɔ ngba’n, amun lafiman su. [...] Afin nán min klun sa yolɛ ti yɛ n fin ɲanmiɛn su lɔ n bali-ɔ. Sanngɛ n bali sran ng’ɔ sunmannin min’n, i klun sa yolɛ. Sran ng’ɔ sunmannin min’n i klun sa’n yɛ: Ɔ fataman kɛ n mlin be kwlaa ng’ɔ fali be mannin min’n be nun kun sa, sanngɛ ɔ fata kɛ n cɛn be blɛ kasiɛn’n nun. Afin min Si i klun sa’n yɛ: Maan sran kwlaa ng’ɔ sɔ Sran wa’n i nun’n, m’ɔ kle kɛ ɔ lafi i su’n, ɔ ɲan nguan m’ɔ leman awieliɛ’n. Kpɛkun blɛ kasiɛn’n nun’n, ń cɛ́n i.”​—Zan 6:35-40.

Ndɛ nga Zezi kannin’n w’a yoman Zuifu’m be fɛ kaan sa. Ɔ maan be ijɔli be konviabo. Be waan ngue ti yɛ ɔ kwla se kɛ i yɛ ɔ ti “kpanwun m’ɔ fin ɲanmiɛn su’n” niɔn. (Zan 6:41) Afin be waan klɔ sran yɛ ɔ wuli Zezi-ɔ, naan i si nin i nin be fin Nazarɛti m’ɔ o Galile mɛn’n nun lɔ’n su. Ɔ maan be seli kɛ: “?Nán Zezi m’ɔ ti Zozɛfu i wa’n niɔn? E si i si nin i nin. ?Nɛ́n i-ɔ?”​—Zan 6:42.

Zezi tɛli be su kɛ: “An yaci amun konviabo ijɔlɛ’n. Sɛ Siɛ’n m’ɔ sunmannin min’n, w’a faman sran kun w’a baman min sin’n, sran fi kwlá baman min sin. Yɛ blɛ kasiɛn’n nun’n ń cɛ́n sran sɔ’n. Be klɛli i Ɲanmiɛn nuan ijɔfuɛ’m be fluwa’n nun kɛ: ‘Zoova wá klé be like.’ Sran kwlaa ng’ɔ tili Siɛ’n i ndɛ’n m’ɔ sɔli like ng’ɔ kle’n nun’n, ɔ ba min sin. Nán kɛ sran wie wunnin Siɛ’n ti-ɔ. Saan sran ng’ɔ fin Ɲanmiɛn i wun lɔ’n yɛ ɔ wunnin Siɛ’n niɔn. Nanwlɛ, ń kán klé amun kpa kɛ sran kwlaa ng’ɔ lafi min su’n, ɔ le nguan m’ɔ leman awieliɛ’n.”​—Zan 6:43-47; Ezai 54:13.

I nun nga Zezi nin Nikodɛmun bé kókó yalɛ’n, Zezi seli kɛ sran ng’ɔ lafi Sran wa’n su’n yɛ ɔ́ ɲán nguan m’ɔ leman awieliɛ’n niɔn. I waan: “Sran kwlaa ng’ɔ kle kɛ ɔ  lafi [Ɲanmiɛn i Wa kunngba cɛ’n] i su’n [ɔ su] mlinman, sanngɛ [ɔ́ ɲán] nguan m’ɔ leman awieliɛ’n.” (Zan 3:15, 16) Siɛn’n, Zezi su kan like ng’ɔ yo naan sran’m b’a ɲan nguan m’ɔ leman awieliɛ’n i ndɛ kle sran kpanngban. Ɔ su se be kɛ i manin-o, i Galile mɛn’n nun lɔ kpanwun mun-o, be wie fi be kwlá manman sran nguan m’ɔ leman awieliɛ’n. ?Yɛ nn wafa sɛ yɛ sran’m be kwla ɲan nguan m’ɔ leman awieliɛ’n niɔn? Zezi kannin ndɛ kunngba’n ekun. Ɔ seli kɛ: “N ti kpanwun m’ɔ man nguan’n.”​—Zan 6:48.

Zezi kannin kpanwun m’ɔ fin ɲanmiɛn su lɔ’n i ndɛ Kapɛɛnaɔmun lɔ Ɲanmiɛn sulɛ sua kun nun wie.