Ngöne lo ketre götrane la Hnagejë Ne Galilaia, hnei Iesu hna thuane la ka ala nyim, me kötre angatr lo kola thele troa acili nyidrë joxu. Nge ngöne la jidri cili, hnei nyidrëti hna tro hune tim ka holehol, me amele Peteru. Hnei Peteru fe hna tro hune tim, ngo ame ju hi la angeic a nyiqaane luelu, nunucile pi hi angeic. Hnei Iesu fe hna hane apëne la eny, nge ma tha lö kö la he hnei nyidrë.

Enehila, bëeke hë Iesu kowe la götrane kuë ne la Hnagejë, ezine Kaperenauma. Matre ame ju hi la kola öhnyi nyidrë hnene lo itre hnei nyidrëti hna thuan, öni angatr: “Traqa nyipëti eue e celë?” Iesu a wesitrë angatr ju ke atre hi nyidrë ka hape, angatr a thele nyidrë göi xen. Matre öni nyidrë: “The huliwa kö thatraqane la falawa ka canga patr, ngo thatraqane la xeni ka hamëne la mele ka pë pun.” Nge öni angatr: “Nemene kö la nyine tro huni a kuca matre eatrëne jë la huliwa i Akötresie?”—Ioane 6:25-28.

Ma angatre jë a mekune la itre huliwa hna qaja hnine la Trenge Wathebo, ngo Iesu pe a qeje huliwa ka sisitria. Öni nyidrë: “Huliwa i Akötresie troa amamane la lapaune i nyipunie kowe la atr hnei nyidrëti hna up.” Ngazo pe, patre kö la lapaune cili thei angatr, ngacama hnei Iesu hna kuca la itre huliwa ka tru. Nge goi sipo iamamanyikeu fe angatr matre troa mejiun koi nyidrë. Öni angatr: “Nemene la huliwa hnei nyipëti hna troa kuca?” Öni angatre fe: “Hnene lo itre qaaqaa huni ekö hna xeni la mana ngöne la hnapapa, ke kola hape: ‘Hnei nyidrëti hna thue falawa i angatre qaa hnengödrai matre tro angatr a xen.’ ”—Ioane 6:29-31; Salamo 78:24.

Pine la sipo i angatr, Iesu a xatua angatre jë troa öhne la sipu qaane la iamamanyikeu, öni nyidrë: “Tha hnei Mose kö hna thue falawa i nyipunie qaa hnengödrai, ngo Kakati pe la ka hamë nyipi falawa koi nyipunie qaa hnengödrai. Ke ame la falawa i Akötresie, tre ene la atr ka uti qaa hnengödrai nge ka amelene la fen.” Ngo tha trotrohnine kö angatr, matre angatr a catre fë ka hape: “Joxu, epi tro pala hi a hamë huni la falawa cili.” (Ioane 6:32-34) Nemene “falawa” la hna qaja hnei Iesu?

Öni Iesu: “Eni hi la falawa ne mel. Ame la atre traqa koi ni, tha tro hmaca kö angeice lai a hane pi xen, nge ame la atre amamane la lapaune i angeice koi ni, tha tro hmaca kö angeice lai a hane pi ij. Ngo tune lo hnenge hna qaja koi nyipunie, öhnyi ni hë hnei nyipunie ngo tha mejiune kö nyipunie. . . . tha uti kö ni qaa hnengödrai matre troa kuca la mekunang, ngo tro pe a kuca la aja ne la Atre upi ni. Nge celë hi aja ne la atre upi ni, ene laka, tha tro kö ni a aluzine la mele ne la ketre atr hna nue koi ni, ngo tro pe ni a amele angatr asë elany. Ke aja i Kakati lai tro la nöjei atr a wangatrehmekune la Nekön, me amamane la lapaune i angatr koi angeic, matre kapa jë la mele ka pë pun.”—Ioane 6:35-40.

Elëhni jë hi la itre atr, nge angatr a nyiqaane qeje nyidrë. Drei pena angeic troa qaja ka hape, angeic “la falawa ka uti qaa hnengödrai”? (Ioane 6:41) Ame koi angatr, Iesu hi la nekö ne la lue trefën qa Nazareta, traon e Galilaia. Matre öni angatr: “Tha Iesu kö angeic, lo nekö i Iosefa, nge atre hi së lo keme me thine i angeic?”— Ioane 6:42.

Ngo sa jë hi Iesu ka hape: “Loi ju hë hnei nyipunie hna iqej. Ke pëkö atr ka traqa koi ni e tha hna pane ee angeice kö hnei Kaka, lo Atre upi ni; nge tro hë ni a amele angeice hmaca elany. Nge hna cinyihan ngöne la itre hna perofetan ka hape: ‘Troa ini angatr asë hnei Iehova.’ Matre ame la itre ka drenge la Kem, me kapa la ini  i nyidrë, angatre hi la itre ka traqa koi ni. Nge pëkö atr ka hane öhne la Kem, ngo hnene hmekuje hi la atre hna up hnei Akötresie. Angeice hi la atre öhne la Kem. Nyipici, eni a qaja hnyawa koi nyipunie, ame la atre mejiun, tro hë angeic a kapa la mele ka pë pun.”—Ioane 6:43-47; Isaia 54:13.

Ame lo Iesu a ithanata me Nikodremo, hnei nyidrë hna amamane ka hape, ka ce tro la mele ka pë pun memine la troa lapaun kowe la Nekön, ke öni nyidrëti lo: “Tro hë la itre ka mejiune koi nyidrë [Nekö hnimina i Akötresie ka cas] a kapa la mele ka pë pun . . . [ngo] tha tro kö a mec.” (Ioane 3:15, 16) Ngo enehila, nyidrë a ithanata kowe la ka ala nyim. Nyidrëti a hape, hnëqa i nyidrë troa aijijë angatr troa kapa la mele ka pë pun, lo hna thatreine hamën hnene la mana, me falawa hna itön e Galilaia. Nga troa kapa tune kaa la mele ka pë pun? Öni Iesu jë: “Eni hi la falawa ne mel.”— Ioane 6:48.

Nge angatr pala hi a qeje falawa ka uti qaa hnengödrai, uti hë traqa pi la ketre ewekë hnine la sunago e Kaperenauma.