Kane Yesu ni yo wuok-chieng’ mar Nam Galili, nopidho ji gana mang’eny, kendo ne oringo ka jogo ne dwaro kete obed ruoth gi thuon. Ka nochopo gotieno, nowuotho e wi nam ma apaka ne gerie kendo noreso Petro ma bende ne owuotho e wi pi. Petro nochako nimo nikech kiawa ma nomiyo yiene obedo matin. Bende, Yesu nokueyo yamo mager. Nyalo bedo ni kueyo yamono noreso jopuonjrene kik nim.

Koro Yesu oduogo yo podho-chieng’ mar Nam Galili e alwora mar Kapernaum. Joma nyocha opidho e yor hono yude kendo gipenje niya: “A ichopo kae sa adi?” Yesu kwerogi konyisogi ni gimanye mana mondo opidhgi kendo. Ojiwogi ni giti, “ok ne chiemo ma tow, to ne chiemo ma siko nyaka chieng’.” Omiyo, gipenje kama: “Ang’o ma nyaka watim mondo wati tije Nyasaye?”​—Johana 6:25-28.

Nyalo bedo ni giparo tije manie Chik ma ne omi Jo-Israel. Kata kamano, Yesu nyisogi wach tich moro maduong’ moloyo. Owachonegi niya: “Tij Nyasaye e ma, ni unyis yie kuom Jal ma nooro.” Jogo to ok nyis yie kuom Yesu kata bang’ neno gik moko duto mosetimo. Gidwaro ni otimnegi ranyisi eka giyie kuome. Gipenje kama: “En tich mane ma itimo? Kwerewa nochamo manna e thim, mana kaka ondik niya: ‘Ne omiyogi makate moa e polo mondo gicham.’”​—Johana 6:29-31; Zaburi 78:24.

Ka jogo osekwayo Yesu mondo otimnegi ranyisi, Yesu konyogi ng’eyo kama teko motimogo honni ae. Okonegi kama: “Awachonu ni, Musa ne ok omiyou makate moa e polo, to Wuora miyou makate madier moa e polo. Nimar makate mar Nyasaye e mano ma lor koa e polo kendo ochiwo ngima ne piny.” Nikech ok giwinj tiend wachno, gisayo Yesu niya: “Ruoth, kinde duto miwa makateno.” (Johana 6:32-34) Kata kamano, “makate” ma Yesu wuoyoe en mane?

Yesu lero wachno kama: “An e makate mar ngima. Ng’ato ang’ata ma biro ira ok nobed gi kech ngang’, kendo ng’at ma nyiso yie kuoma riyo ok nomake ngang’. To kaka asewachonu, un use kata mana nena to e ma pod ok uyie. . . . Aselor ka awuok e polo mondo atim, ok dwacha awuon, to dwach ng’at ma noora. Ma eri e dwach ng’at ma noora, ni mondo kik alal ng’ato ang’ata kuom jogo duto mosemiya, to mondo achiergi e chieng’ giko. Nikech dwach Wuora e ma, ni mondo ng’ato ka ng’ato mong’eyo Wuod Nyasaye kendo ma nyiso yie kuome, onego obed gi ngima ma nyaka chieng’.”​—Johana 6:35-40.

Wachno miyo ji bedo gi mirima, kendo Jo-Yahudi chako ng’ur e wi Yesu. Ere kaka onyalo wacho ni en “e makate ma ne olor koa e polo”? (Johana 6:41) Gin gineno Yesu mana kaka ng’at monyuol e taon mar Nazareth e alwora mar Galili. Jogo penjo kama: “Donge mani en Yesu wuod Josef, ma wuon mare kod min mare wang’eyo?”​—Johana 6:42.

Yesu wachonegi niya: “Weuru ng’ur e kindu uwegi. Onge ng’at ma nyalo biro ira mak mana ka Wuora ma noora e ma oywaye, kendo abiro chiere e chieng’ giko. Ondik e weche Jonabi niya: ‘Jehova biro puonjogi giduto.’ Ng’ato ang’ata mosewinjo Wuora kendo mosepuonjore, biro ira. Ok ni nitie dhano moro amora moseneno Wuoro, to mak mana jalo moa kuom Nyasaye; jalo oseneno Wuoro. Adier, adier, awachonu ni, ng’ato ang’ata ma nyiso yie nigi ngima ma nyaka chieng’.”​—Johana 6:43-47; Isaiah 54:13.

Kinde motelo, kane Yesu wuoyo gi Nikodemo, nowacho kama: ‘Ng’ato ang’ata ma nyiso yie kuom Wuod Nyasaye ma miderma kik keth, to obed gi ngima ma nyaka chieng’.’ (Johana 3:15, 16) Wechenego nyiso ni mondo ng’ato oyud ngima ma nyaka chieng’, nyaka oket yie kuom  Wuod dhano. Kata kamano, sani to owuoyo gi oganda maduong’ kowachonegi ni en gi migawo mar miyo giyud ngima ma nyaka chieng’. To onge manna kata makate moro molos gi lwet dhano ma yudore Galili ma nyalo miyo giyud ngimano. Kare ere kaka ng’ato nyalo yudo ngima ma nyaka chieng’? Yesu nwoyo weche mosewacho motelo niya: “An e makate mar ngima.”​—Johana 6:48.

Mbaka e wi makate moa e polono dhi nyime, kendo Yesu medo lero mbakano sama opuonjo e sunagogi man Kapernaum.