Ngasempumalanga yoLwandle LwaseGalile uJesu wenza isimangaliso sokupha izinkulungwane ukudla wasebaleka sebefuna ukumenza inkosi. Ngobusuku lobo wahamba phezu kolwandle olwalulesiphepho wasehlenga uPhetro owahamba phezu kwamanzi kodwa waqalisa ukucwila ukholo lwakhe seluxega. UJesu wathulisa lomoya, njalo lokhu kungabe kwanceda abafundi bakhe ukuthi bangabhidlikelwa ngumkhumbi.

Khathesi usephendukile eKhaphenawume entshonalanga yoLwandle LwaseGalile. Abantu abaphe ukudla ngendlela eyisimangaliso bamthola khonapho bambuze bathi: “Ufike nini lapha?” UJesu uyabakhuza ebatshela ukuthi bamdingela ukuthi aphinde abaphe ukudla. Ubakhuthaza ukuthi ‘bengasebenzeli ukudla okubolayo kodwa basebenzele ukudla okungaboliyo okunika impilo engapheliyo.’ Yikho bayabuza bathi: “Kumele senzeni ukuze senze imisebenzi kaNkulunkulu?”​—UJohane 6:25-28.

Kungenzakala ukuthi abantu laba bacabanga ngemisebenzi ebhalwe eMthethweni. Kodwa uJesu ubatshela ngomsebenzi oqakatheke ukwedlula leyo, esithi: “Umsebenzi kaNkulunkulu liwenza ngokutshengisa ukuthi lilokholo kulowo amthumileyo.” Abantu laba sebebone uJesu esenza izimangaliso kodwa balokhu bengamkholwa. Bacela ukuthi abenzele esinye isimangaliso ukuze bamkholwe. Bathi: “Uzakwenzani? Okhokho bethu badla imana enkangala, njengoba nje kubhaliwe ukuthi: ‘Wabapha isinkwa esasivela ezulwini ukuze badle.’”​—UJohane 6:29-31; IHubo 78:24.

Bathi sebecele isibonakaliso uJesu abachasisele ngalowo owenza izimangaliso zokuthi abantu bathole abakudingayo empilweni. Uthi: “Ngithi kini, uMosi kazange aliphe isinkwa esivela ezulwini kodwa uBaba ulipha isinkwa seqiniso esivela ezulwini, ngoba isinkwa sikaNkulunkulu ngulowo oyehla ezulwini anike umhlaba ukuphila.” Kodwa bona kabazwisisi ukuthi ukhuluma ngani, besebesithi: “Nkosi, siphe isinkwa leso zikhathi zonke.” (UJohane 6:32-34) Yisiphi “isinkwa” uJesu akhuluma ngaso?

Uyabachasisela athi: ‘Ngiyisinkwa sokuphila. Loba ngubani oza kimi kasoze afa alamba, njalo loba ngubani otshengisa ukuthi ulokholo kimi kasoze ome loba sekutheni. Kodwa lilokhu lingakholwa lanxa selingibonile, njengoba nje ngangitshilo kini. Ngehle ezulwini ukuze ngizokwenza intando yalowo ongithumileyo hatshi eyami. Intando yalowo ongithumileyo yikuthi ngingalahlekelwa langoyedwa kubo bonke angiphe bona, kodwa ngibavuse kwabafileyo ngelanga lokucina, ngoba intando kaBaba yikuthi wonke umuntu owamukela iNdodana futhi otshengisa ukuthi ulokholo kuyo athole ukuphila okungapheliyo.’​—UJohane 6:35-40.

Esetsho njalo amaJuda ayacaphuka futhi aqalise ukukhonona ngaye. Kawazwisisi ukuthi kungani ezithi ‘uyisinkwa esehla ezulwini.’ (UJohane 6:41) Wona akwaziyo yikuthi wazalelwa edolobheni leNazaretha eliseGalile, lapho okulabazali bakhe khona. Ayabuzana athi: “Kanti lo kayisuye yini uJesu indodana kaJosefa? Angithi uyise lonina siyabazi?”​—UJohane 6:42.

UJesu uthi: “Yekelani ukukhonona khonapho. Kakho ongeza kimi engazange adonswe nguBaba ongithumileyo, futhi mina ngizamvusa kwabafileyo ngelanga lokucina. Kubhaliwe kubaPhrofethi ukuthi: ‘Bonke bazafundiswa nguJehova.’ Wonke umuntu omlalelayo uBaba afunde, uyabuya kimi. Kodwa kakho owake wabona uBaba ngaphandle kwalowo ovela kuNkulunkulu; lo nguye ombonileyo uBaba. Ngiqinisile sibili ngithi kini, loba ngubani okholwayo ulokuphila okungapheliyo.” ​—UJohane 6:43-47; U-Isaya 54:13.

UJesu wayeke wakhuluma loNikhodemu emtshela ukuthi abantu kumele bakholwe kuyo iNdodana yomuntu ukuze bathole ukuphila okungapheliyo. Wathi: “Ukuze wonke umuntu otshengisa ukuthi ulokholo kuyo [iNdodana kaNkulunkulu ezelwe yodwa] angabhujiswa, kodwa abe lokuphila okungapheliyo.” (UJohane 3:15, 16) Kodwa khathesi usekhuluma labantu abanengi ebatshela ukuthi kumele bakholwe kuye ukuze bathole ukuphila okungapheliyo. Imana loba isinkwa abasijayeleyo eGalile akungeke kubenze bathole ukuphila lokho. Pho kutholakala njani ukuphila okungapheliyo? UJesu uphinda amazwi akhe athi: “Mina ngiyisinkwa sokuphila.”​—UJohane 6:48.

Uqhubeka ngayo indaba yesinkwa sokuphila esefundisa esinagogeni eliseKhaphenawume.