Koutundilo Welunga lyo Ngalileya, Sesusi waavelele okulia ovanthu ovanyingi kehuviso, konyima aende nkholo mokonda ankho vahanda okumulinga ohamba. Otyinthiki otyo aendela kombanda yomeva melunga muna epuku-puku, ayovola Petulu tupu ankho weendela kombanda yomaande, mahi mokonda yondima ine ohuhunya ahimbika okunyingila kohi. Tupu, Sesusi atulisa omphepo, tyafuile ayovola ovalongwa vae opo vahankhile momeva.

Pahe Sesusi akondoka koutakelo welunga, ko Kafalanau. Vana aavelele okulia kehuviso avemuvasi iya avemupulu okuti: “Onalupi weya kuno?” Sesusi eveviyula, evepopila okuti ankho vekahi nokumuovola mokonda vahanda eveavele vali okulia. Evelondola okuti: “Undapelei okulia kutualako, kueeta omuenyo wahapu.” Moluotyo, avapulu okuti: “Oityi onthue tuna okulinga opo tufuisepo ovilinga vya Huku?” — Suau 6:25-28.

Tyafuile ankho vasoka kovilinga viahonekwa Movitumino, mahi Sesusi ankho upopia ovilinga viokuna vali esilivilo, ati: “Ovilinga vya Huku okukala nekolelo mu una atuma.” Mahi, ovanthu ankho vetupu ekolelo olio mu Sesusi, namphila ankho alinga ovipuka ovinyingi. Avemuiti evelingile ehuviso opo vemutavele. Avapulu okuti: “Ovilinga patyi ove ukahi nokulinga? Ovakuaukulu vetu valile omanaa moluhandya, ngetyi ovihonekwa vipopia okuti: ‘Weveavelele ombolo yo keulu opo valie.’” — Suau 6:29-31; Salmo 78:24.

Konthele yehuviso vaita, Sesusi evepopila Una upondola okuavela ovanthu kehuviso etyi vesukisa, ati: “Tyotyili ndyimupopila okuti, Moisesi kemuavelele ombolo yo keulu, mahi Tate yange umuavela ombolo yotyotyili yatunda keulu. Mokonda ombolo ya Huku, oyo ina yatunda keulu, aiya okuava omuenyo mouye.” Mokonda kavanoñgonokele etyi apopia, avaiti okuti: “Tatekulu, apeho tuavele ombolo oyo.” (Suau 6:32-34) Mahi “ombolo” patyi Sesusi ankho ekahi nokupopia?

Sesusi ati: “Ame, ame mbolo yomuenyo. Una uya ku ame, kamakala-kala vali nondyala iya una ukala nekolelo mu ame, kamakala-kala vali nohunga. Mahi ngetyi nemupopila, onwe muamona ame, mahi no ngotyo kamutavela. . . . Ame natunda keulu, hapala ndyilinge ehando liange muene, mahi opala ndyilinge ehando lya una wanthuma. Ehando lya una wanthuma o liokuti, pu vana ampha nawike una okupeseka-po, mahi ndyikevetutilise monthiki yahulilila. Mokonda eli olio ehando lya Tate yange, liokuti ovanthu aveho vanoñgonoka Omona avakala nekolelo mwe, mavakamona omuenyo wahapu.” — Suau 6:35-40.

Otyo atyinumanesa ovanthu, iya ova Sundeu avahimbika okulondovola konthele yae. Oñgeni apopia okuti oe “mbolo yatunda keulu?” (Suau 6:41) Kuvo, Sesusi ankho omona vala wovanthu vomo Ngalileya, mepunda-umbo lyo Nasalee. Ovanthu avapulu okuti: “Ou ha Sesusi omona wa Suse? Tyati umwe he tumwii ina tumwii.” — Suau 6:42.

Sesusi akumbulula okuti: “Yekei-po okulondovola poyenyi. Nawike upondola okuya ku ame, Tate wanthuma ehemuetele ku ame iya ame mandyikemututilisa monthiki yahulilila. Ovauli vahoneka okuti: ‘Iya aveho ovo mavakalongeswa na Siovaa.’ Kese una utehelela etyi Tate alongesa, etyitavela, uya ku ame. Petupu omunthu wamuene Tate, ame vala natunda kwe. Ame, ame vala namuene Tate. Tyotyili ame ndyimupopila okuti, una utavela makakala nomuenyo wahapu.” — Suau 6:43-47; Isaías 54:13.

Onthiki apopile na Nikondemu, Sesusi watile omuenyo wahapu welikuata kumwe nekolelo Momona womulume, ati: ‘Kese omunthu ukala nekolelo [Momona wongunga wa Huku] kamakahanyua-ko, mahi makakala nomuenyo wahapu.’ (Suau 3:15, 16) Mahi pahe Sesusi ankho ukahi nokupopila ovanthu ovanyingi vali, okuti opo vakamone omuenyo wahapu, oe una otyilinga otyinene, tyihapondola okulingwa nomanaa nii nombolo ilingwa nohinde mo Ngalileya. Ngotyo, oñgeni omunthu apondola okukamona omuenyo wahapu? Sesusi awane vali onondaka mbae, ati: “Ame, ame mbolo yomuenyo.” — Suau 6:48.

Etompho olio konthele yombolo yatunda keulu alitualako, avapopi vali unene konthele yotyo pu etyi Sesusi ankho alongesila mondyuo yokufendela mo Kafalanau.