Hakhalele Yesu gu khanda ya esti ya Kianga gia Galile, wadishile athu avula mu luholo lua gushimana. Gungima walengele tangua athu atshiginyile gumubuisa fumu. Mu phipha yene wawendele holu dia meya, nu wahuluishile Phetelo tangua gasendesele gushiwuga mukunda wakhalele nu gutshigina guazonda. Luko, Yesu wahenesele funji mu kianga. Yajiya gukhala egi wahuluishile alandudi hagula abundugago mu muta.

Gungima, Yesu wavutugile ha sambua dia kianga gu khanda ya westi, mu dimbo dia Kaphelenauma. Athu adishile muene mu luholo lua gushimana amumonele, amuhudile egi: ‘Mulongeshi, kumbi ditshi wahetshi gugu?’ Yesu wasendele guawamba, waalezele egi akhalele gumukamba hagula a ahane luko ima ya gudia. Yesu wawambelele egi: ‘Mutshitshigo mudimo mukunda nu ima ya gudia idi mubola, uvi tshitshenu mudimo mukunda nu ima ya gudia idi musala hugo dia leha nu idi muhana monyo wa ivo nu ivo.’ Gungima ene amuhudile egi: “Tutshita gutshi ha gutshitshila Nzambi mudimo?”—Yone 6:25-28.

Yajiya gukhala egi akhalele mutangiza midimo ya sonegewe mu Mukhuala; uvi Yesu waalezele mudimo wabalega ndando, wazuelele egi: ‘Mudimo wa Nzambi udi egi, mushe gutshigina guenu gudi muthu gatumine muene.’ Uvi athu amoneselego gutshigina guene gudi Yesu, ngatshima watshitshile ndaga jia gushimana. Amuwambelele ha guahana gijiyishilo hagula ashe giwa gutshigina guawo gudi muene. Amuhudile luko egi: “Mudimo utshi udi mukalagala? Akhakha etu adile mana mu temu gifua idi ya gusonegewa egi: ‘Muene waahuile mapha a mu dilu ha gudia.’”—Yone 6:29-31; Ngimbo 78:24, NW.

Luholo amutogele gijiyishilo, Yesu waamonesele muthu wana guhana ima ya gudia mu luholo lua gushimana, wazuelele egi: ‘Ngudi gumiwambela giamatshidia egi, Moise gamihuilego mapha a mu dilu, uvi tata wami udi gumihua mapha a diago a mu dilu. Handaga dipha dia Nzambi didi muthu yonyi wakatugile mu dilu ha guza ha mavu, udi muhua athu a ha mavu monyo.’ Luholo akoteleselego ndaga yazuelele Yesu, amutogele egi: ‘Fumu, tuhue dimpha diene masugu agasue.’ (Yone 6:32-34) Yesu wakhalele muzuelela “dimpha” dia luholo lutshi?

Yesu waakotelesele egi: ‘Ame ngudi dipha dia monyo. Muthu waza gudi ame mbagavuigo nzala nga hazonda. Luko, muthu washa gutshigina guenji gudi ame mbagakhadigo nu luhungu nga hazonda. Uvi gifua luholo ngamiwambela egi, muangumonyi uvi muashilego gutshigina guenu gudi ame. . . . Ngakatugile mu dilu ha guza mutshita gutshigina gua muthu wangutumine, uvi guami ndo. Gutshigina gua muthu wangutumine guenyogu: ‘Ngutotesago nga muthu mumoshi mukatshi dia athu anguhuile muene. Uvi muene wana gutshigina egi nguaafuzumune mu gufua mu lusugu lua gisugishilo. Gutshigina gua tata wami gudi egi, muthu wagasue udi mujiya Mona nu udi musha gutshigina guenji gudi muene, ahete monyo wa ivo nu ivo.’—Yone 6:35-40.

Ndaga yene yahanele enya Yuda khabu, hene asendesele guzuela muabola mukunda nu Yesu. Luholo lutshi wajiya guzuela egi muene udi ‘dipha dia katugile mu dilu?’ (Yone 6:41) Gudi ene, Yesu wakhalele muthu, luko mvuaji jienji jidi enya gu Galile, mu dimbo dia Nazaleta. Athu azuelele egi: ‘Muene gashigo Yesu mun’a Yozefe, tushigo mujiya sh’enji nu gin’enji ba?’—Yone 6:42.

Yesu waawambelele egi: “Bembienu guzuela muabola mukatshi dienu. Gushigo nu muthu wajiya guza gudi ame, gula Tata wangutumine gamunanelego. Ame mbangumufuzumuna mu lusugu lua gisugishilo. Ngambi jia Nzambi jiasonegele egi: ‘Agasue mbalongesewa gudi Yehowa.’ Muthu wagasue wategelela Tata nu walonguga ndaga jienji, udi muza gudi ame. Gushigo nu muthu wamuenene gale Tata, khuta muthu wajile gudi Nzambi; muene wamonene gale Tata. Ngudi gumiwambela giamatshidia egi: muthu wagasue udi musha gutshigina, udi nu monyo wa ivo nu ivo.”—Yone 6:43-47; Yeshaya 54:13, NW.

Hakhalele Yesu muta maga nu Nikodemo, wamonesele gudivua gudi mukatshi dia gumonesa gutshigina gudi Mun’a muthu nu guheta lujingu lua ivo nu  ivo. Wazuelele egi: ‘Muthu wagasue wamonesa gutshigina gudi [Mun’a Nzambi mumoshi ha mumoshi] gafuigo uvi ahete monyo wa ivo nu ivo.’ (Yone 3:15, 16) Uvi mu tangua dinyi wakhalele muzuela nu athu avula, waawambelele egi udi nu mudimo wa gukuatesa athu ha guheta monyo wa ivo nu ivo. Mapha a gu Galile nga mana ajiyilego guahana monyo wa luholo luene. Hakiene, luholo lutshi athu ajiya guheta monyo wa ivo nu ivo? Yesu wazuelele luko mbimbi jiazuelele muene ha thomo egi: ‘Ame ngudi dipha dia monyo.’—Yone 6:48.

Lumene lua dipha dia katugile mu dilu, luakolele luko tangua Yesu wakhalele mulongesa mu sinagoga mu dimbo dia Kaphelenauma.