Pa nyengu yo wenga kuvuma kwa Nyanja ya Galileya, Yesu wanguryisa ŵanthu anandi mwakuziziswa, kweni wangutuwaku pa nyengu yo ŵanthu ŵenaŵa akhumbanga kumuvwalika ufumu. Usiku wa zuŵa lenili, Yesu wangwenda panyanja po penga chimphepu ndipu wangutaska Peturo yo wangwamba kubira chifukwa wenga ndi chivwanu chimana pa nyengu yeniyi. Yesu wangulekeska so chimphepu. Panyaki venivi vinguwovya kuti boti lo akusambira ŵaki angukweramu lileki kusweka.

Pa nyengu iyi, Yesu wenga ku Kaperenao, kuzambwi kwa Nyanja ya Galileya. Ŵanthu wo wanguŵaryisa mwakuziziswa angumufumba kuti: “Mwaza zuŵanji kunu?” Kweni Yesu wanguŵachenya ndipu wanguŵakambiya kuti amupenjanga kuti waŵapaski chakurya chinyaki. Iyu wanguŵakambiya kuti atenere ‘cha kugwira ntchitu chifukwa cha chakurya cho chinangika, kweni atenere kugwiriya ntchitu chakurya chambula kumala cho chipaska umoyu wamuyaya.’ Mwaviyo, yiwu angumufumba kuti: “Sonu titenere kuchitanji kuti tigwiri ntchitu zaku Chiuta?”—Yohane 6:25-28.

Panyaki ŵanthu yaŵa aŵanaŵananga kuti Yesu wakambanga vinthu vo vingulembeka mu Dangu, kweni Yesu wakambanga ntchitu yakukhumbika ukongwa. Iyu wangukamba kuti: “Iyi ndi ntchitu yaku Chiuta, kuti muje ndi chivwanu mwaku yo wakumutuma.” Kweni ŵanthu ŵenaŵa ŵengavi chivwanu mwaku Yesu chinanga kuti wanguchita vinthu vinandi. Yiwu angumukambiya kuti waŵalongo chisimikizgu kuti ayambi kumugomezga. Ndipu angumufumba kuti: “Ndi ntchitu niyi yo muchitengi? Apapi ŵidu akali angurya mana muchipululu nge mo vikulembeke kuti: ‘Wanguŵapaska viŵandi vakutuliya kuchanya kuti ŵaryi.’”—Yohane 6:29-31; Sumu 78:24.

Ŵanthu yaŵa ŵati apempha Yesu kuti waŵalongo chisimikizgu, Yesu wanguŵawovya kuti aziŵi Yo wamupaskanga nthazi zo wachitiyanga vakuziziswa. Iyu wanguti: “Nditikuneneskiyani, Mozesi wangukupaskani viŵandi vakutuliya kuchanya cha, kweni Ada atikupaskani chiŵandi chayichu chakutuliya kuchanya. Chifukwa mweniyo wasika kutuliya kuchanya ndi kupereka umoyu pacharu chapasi, ndiyu chiŵandi chaku Chiuta.” Chifukwa chakuti anguvwisa cha fundu yo iyu wangukamba, ŵanthu wo angumupempha kuti: “Ambuya, mutipaskengi chiŵandi chenichi nyengu zosi.” (Yohane 6:32-34) Kumbi Yesu wakambanga za “chiŵandi” wuli?

Yesu wangukamba kuti: “Ini ndini chiŵandi chakupaska umoyu. Weyosi yo watuza kwaku ini wazamuvwapu nja cha, ndipu weyosi yo we ndi chivwanu mwaku ini, wazamuvwapu nyota cha. Kweni nge mo ndakukambiyani kali, ini mwaja muchindiwona kweni mugomezga cha. . . . Ndasika kutuliya kuchanya kuzichita khumbu langu cha, kweni kuzichita khumbu laku yo wakundituma. Khumbu laku yo wakundituma ndakuti ndileki kutayapu weyosi wa ŵanthu wo wandipaska, kweni kuti ndiziŵayuski pa zuŵa lakumaliya. Chifukwa khumbu la Ada ndakuti weyosi yo waziŵa Mwana ndipuso waja ndi chivwanu mwaku iyu walonde umoyu wamuyaya.”—Yohane 6:35-40.

Yesu wati wakamba venivi, Ayuda angukwiya ukongwa ndipu angwamba kudinginyika. Yiwu akambanga kuti ntchifukwa wuli munthu mwenuyu wangakamba kuti iyu ndiyu “chiŵandi chakutuliya kuchanya”? (Yohane 6:41) Ŵanthu ŵenaŵa awonanga ŵaka kuti Yesu ndi munthu yo apapi ŵaki aja mutawuni ya Nazareti ku Galileya. Mwaviyo, angwamba kufumbana kuti: “Asi uyu ndi Yesu mwana waku Yosefi yo awisi ndi anyina titiŵaziŵa?”—Yohane 6:42.

Yesu wanguŵamuka kuti: “Lekani kudinginyika. Palivi munthu yo watuza kwaku ini kwambula kuti Ada wo akundituma amuguza, ndipu ndazakumuyuska pa zuŵa lakumaliya. Kukulembeka mu Vakulemba va Achimi kuti: ‘Wosi azamusambizika ndi Yehova.’ Weyosi yo wavwisiya kwa Ada ndi kusambira, watuza kwaku ini. Palivi munthu yo wakuwonapu Ada, kupatuwaku yumoza pe yo wakutuliya kwaku Chiuta, mwenuyu ndiyu wakuwona Ada. Nditikuneneskiyani kuti weyosi yo wagomezga wazamulonde umoyu wamuyaya.”—Yohane 6:43-47; Yesaya 54:13.

Kumbukani kuti nyengu yinyaki kuvuli, Yesu wangukonkhoske Nikodimu kukoliyana kwa umoyu wamuyaya ndi kugomezga Mwana wa munthu. Yesu wangukamba kuti: “Weyosi wakuvwana [mwa Mwana wapade  waku Chiuta] waleki kunangika, kweni waje ndi umoyu wamuyaya.” (Yohane 3:15, 16) Kweni pa nyengu iyi, Yesu wakambanga ndi ŵanthu anandi ndipu waŵakambiyanga kuti iyu wenga ndi udindu wakuŵawovya kuti azisaniyi umoyu wamuyaya. Umoyu wenuwu atingi awusaniyengi cha chifukwa chakurya mana pamwenga kurya viŵandi vo vasanirikanga ku Galileya. Sonu, kumbi ŵanthu ŵenaŵa atingi awusaniyengi wuli umoyu wamuyaya? Yesu wanguwerezapu so mazu ngo wanguŵakambiya kuti: “Ini ndini chiŵandi chakupaska umoyu.”—Yohane 6:48.

Yesu wangukonkhoska so nkhani yakukwaskana ndi chiŵandi chakutuliya kuchanya pa nyengu yo wasambizanga musinagogi ku Kaperenao.