wa mwiiriirya, Yesu aahaalyiha atthu ikonto sinceene mpantta onikhuma nsuwa wa Ephareya ya oGalileya. Nave aahikhuma nuumala osuwela wira atthu ale yaaphavela omukhaliha mwene. Ohiyu ole, Yesu aaheetta vasulu va maasi ni aahimoopola Pedru, vaavo aasama awe mwaha woohaamini. Nave-tho, Yesu aahimaaliha epheyo, wira owoopole awiixutti yaari ekalawa yaasama.

Vano Yesu aahitthikela mpantta onikela nsuwa wa ephareya, muttetthe wa oKafarnawu. Atthu ale Yesu aalyinhe awe mwa mwiiriirya, yaahimphwanya khumukoha wira: “Mphiyalé lini nno?” Yesu aahaaleela wira yaamwaavya mwaha woowi yaaphavela ovahiwa-tho iphaawu. Nto aahaatumererya wira: “Muhivareleké muteko yolya enimala: nvareleke yolya enikhala, envaha ekumi ehimmala”. Tivonto yaahimukoha wira: “Nìreke exeni, wira netteke ntoko sintthunawe Muluku?”—Yohani 6:25-28.

Pooti wira atthu ale yuupuwela miteko saalempwale Munlamuloni. Masi Yesu aahihimya muteko wootepa otthuneya, oriki: “Entthunawe Muluku t’ila: omwamini yowo Muluku omurummyawe”. Atthu ale khiyaamwaaminni Yesu nnaamwi yoonale itthu aapaka awe. Masi yanvekela wira opake mwiiriirya wira amwaaminiki. Vano yaahimukoha wira: “Nto nyuwo, ethonyeryo xeni enìranyu, wira hiyo nòne, niwaminini? Axitith’ihu yahilya emaná mothakoni, ntoko silempwaya wira: ‘Ahavaha okhura ephau erwiye wirimu’”.​—Yohani 6:29-31; Esalimo 78:24.

Yesu aahiwaakhula owooniheryaka Ole aakumiherya mwa mwiiriirya yoolya ele, oriki: “Kinolèlani ekhweli wira: khahiyó Moise òvahaleni ephau enkhuma wirimu. Atithi aka t’anovahani ephau y’ekekhai, enkhuma wirimu. Ephau enivahawe Muluku t’ile enkhuruwa wirimu, enavaha atthu ekumi”. Okhala wira khiyiiwexenxe saana, awo yaahimuxonttela ariki: “Pwiya, mahiku othene munivaheke ephau ene yeyo!” (Yohani 6:32-34) “Ephau” xeeni Yesu aahimya awe?

Yesu aatthokihenrye wira: “Miyo ka ephau y’ekumi. Ole onkirwela khanrowa-tho ovoliwa etala: ole onkamini khanrowa-tho ovoliwa ntthona. Nto miyo kihohimeryani wira: nyuwo mokòna, masi khamunkamini. . . . Miyo nkikhurunwe wirimu wira kìreke otthuna waka: kikhuruwenlé wira kìreke otthuna wawe Ole okirumme. Vano, otthuna wawe Ole okirumme ti nno: wira ahikirimelé mutthu w’ale akivahalyawe, nto kahihimuxe mokhwani nihiku nokiserya. Tthiri, etthu entthunaya Atithi t’ila: mutthu ti mutthu onimona Mwana, anamwamini yowo, akhalane ekumi yohimala”.​—Yohani 6:35-40.

Moolumo a Yesu, yaahiwiiriha atthu onanariwa. Nto aYuda yaahipacerya omwaapa ahimyaka wira: Vaaniweryaneya sai, Yesu ohimya wira “miyo ki ephau ekhurunwe wirimu”? (Yohani 6:41) Atthu ale, yaamoona Yesu okhala mwaana aapinaatamu a oGalileya epooma ya oNazarethi. Nto yaahimukoha wira: “Ola khahiyó Yesu, mwana a Yosefe? Hiyo ninnasuwela atithi awe n’ame awe”.—Yohani 6:42.

Yesu aahiwaakhula wira: “Muhàpeké yenyuru! Khavo onwerya okirwela, ahithanliwe n’Atithi akirumme: vano miyo kinomuhihimuxa mokhwani nihiku nokiserya. Maprofeta yahilepa wira: ‘Atthu othene animwixuttihiwa ni Muluku’. Othene ale aniwiwa Atithi ni anixuttihiwa ni yawo, anokirwela miyo. Nto khavo owonne Atithi ahikhanle ole okhumme w’Atithi: yowo t’uwonne Atithi. Kinolèlani ekhweli wira: ole onikamini, òkhalana ekumi yohimala”.—Yohani 6:43-47; Yesaya 54:13.

Okathi Yesu aalavunle awe ni Nikodemo, aahihimya ovarihana okhanle eriyari ya okumi woohimala ni omwaamini Mwaana a mutthu,  oriki: “Othene ale animwamini yowo [Mwaana mmoseene a Muluku], ehirimelé, masi ekhalane ekumi ehinimala”. (Yohani 3:15, 16) Okathi ola Yesu aalavula ni atthu anceene. Nto aahaaleela wira onniwerya waaphwanyiha atthu okumi woohimala, yoowo nnakhala emana aahiiso ephaawu ya oGalileya sahaawerya aya ovaha. Nto yaarowa ophwanya sai okumi woohimala? Yesu aahitthikela moolumo awe oowi: “Miyo ka ephau envaha ekumi”.​—Yohani 6:48.

Mwaha ola wa ephaawu yaakhumme wiirimu, Yesu aahitthikela olavula vanceene okathi iixuttiha awe esinagoga ya oKafarnawu.