Yesu ya kpe he ɔ ngɛ Kapernaum, nɛ e ya tsɔɔ ni ɔmɛ ní konɛ a na kaa lɛ ji abolo nitsɛnitsɛ nɛ je hiɔwe ɔ. E ngɛ heii kaa nɔ́ nɛ Yesu de ngɛ kpe he ɔ ji nɔ́ nɛ e de nihi nɛ e ha mɛ niye ní ngɛ Galilea Wo ɔ se ngɛ beleku je ɔ nɔ tsami.

Yesu tsa e munyu ɔ nɔ ke: “Nyɛ nɛmɛ ɔmɛ ye mana ngɛ nga a nɔ, nɛ a gbo.” Se e tsɔɔ mɛ kaa lɛɛ e ngɛ slɔɔto ngɛ mana a he. Lɔ ɔ he ɔ, e de mɛ ke: “Imi ji abolo nɛ je hiɔwe nɛ haa nɔ wami. Nɔ nɛ maa ye kikɛmɛ a abolo nɛ ɔ eko ɔ maa hi si kɛ maa ya neneene. Abolo nɛ ma ha lɛ ɔ ji imi nitsɛ ye he lo nɛ i ngɔ kɛ ha, bɔ nɛ pee nɛ je ɔ tsuo yi nɛ ná wami.”​​—Yohane 6:48-51.

Ngɛ jeha 30 ngɛ gbiɛ be mi ɔ, Yesu de Nikodemo kaa Mawu suɔ je ɔ saminya, nɛ lɔ ɔ he ɔ, e ngɔ e Bi ɔ kɛ ha kaa Yi Wami Helɔ. Enɛ ɔ he ɔ, nɔ́ nɛ Yesu ngɛ tsɔɔe nɛ ɔ ngɛ nɔ mi mae kaa e sa nɛ a ná hemi kɛ yemi ngɛ afɔle nɛ e maa sã a mi, nɛ lɔ ɔ lɛ maa tsɔɔ kaa a ye e he lo. Ja a gu blɔ nɛ ɔ nɔ loko a ma ná neneene wami.

Se ni ɔmɛ kɛ Yesu kpa we gbi. A bi ke: “Kɛ nɔmlɔ nɛ ɔ maa ngɔ e he lo ha wɔ nɛ waa ye kɛɛ?” (Yohane 6:52) Yesu ngɛ hlae nɛ a nu sisi kaa nɔ́ nɛ e de ɔ ji okadi peemi nɔ́ ko, se pi kaa a maa ye e he lo nitsɛnitsɛ. Nɔ́ nɛ e de kɛ tsa nɔ ɔ ha nɛ wa na nɔ́ nɛ e ngɛ hlae nɛ e maa tsɔɔ tutuutu.

E de ke: ‘Ke nyɛ yi Nɔmlɔ Bi ɔ he lo, nɛ́ nyɛɛ nu e muɔ ɔ, nyɛ be wami náe. Nɔ tsuaa nɔ nɛ maa ye ye he lo, nɛ e maa nu ye muɔ ɔ ma ná neneene wami. Ejakaa ye he lo ɔ ji niye ní nɛ sa nɛ a ye, nɛ ye muɔ ɔ, nɔ́ nɛ sa nɛ a nu. Nɔ tsuaa nɔ nɛ yeɔ ye he lo, nɛ e nuu ye muɔ ɔ hii ye mi, nɛ imi hu i hii e mi.’​​—Yohane 6:53-56.

Mo susu bɔ nɛ nɔ́ nɛ Yesu de ɔ maa pee Yuda bi nɛ a ngɛ lɛ tue bue ɔ tai ha a he nɛ o hyɛ! Eko ɔ, a ma susu kaa Yesu ngɛ tsɔɔe kaa a ye nɔmlɔ lo, aloo a pee nɔ́ ko nɛ teɔ si kɛ woɔ Mawu mlaa nɛ tsɔɔ kaa a ko ye muɔ ɔ. (1 Mose 9:4; 3 Mose 17:10, 11) Se pi nɛ Yesu ngɛ tsɔɔe kaa a ye nɔmlɔ lo loo a nu muɔ nitsɛnitsɛ. Nɔ́ nɛ e ngɛ tsɔɔe kɛkɛ ji kaa, e sa nɛ nɔ tsuaa nɔ nɛ e suɔ kaa e ma ná neneene wami ɔ nɛ e ná hemi kɛ yemi ngɛ e nɔmlɔ tso nɛ ye mluku nɛ e kɛ maa sã afɔle, kɛ e muɔ nɛ a ma kpa pue si ɔ mi. Se e kaseli ɔmɛ a kpɛti nihi fuu po nui nɔ́ nɛ e dee ɔ sisi. A kpɛti ni komɛ de ke: ‘Ei! Tsɔɔmi nɛ ɔ he wa. Mɛnɔ maa bu tue?’​​—Yohane 6:60.

Akɛnɛ Yesu na kaa e kaseli ɔmɛ a kpɛti ni komɛ a ngɛ munyu huitihuiti tue he je ɔ, e bi mɛ ke: “Anɛ enɛ ɔ maa wo nyɛ nine mi nyu lo? Lɛɛ ke nyɛ na Nɔmlɔ Bi ɔ nɛ kpale kɛ yaa hiɔwe he nɛ e je kɛ ba a nɛɛ? Munyuhi nɛ i kɛ nyɛ tu nɛ ɔ ma ha nyɛ Mawu mumi nɛ haa nɔ wami ɔ. Se kɛ̃, nyɛ ti ni komɛ he we yi.” Benɛ e de jã a, e kaseli ɔmɛ a kpɛti nihi fuu a je, nɛ a nyɛɛ we e se hu.​​—Yohane 6:61-64.

Lɔ ɔ he ɔ, Yesu bi e bɔfo 12 ɔmɛ ke: “Nyɛ hu nyɛ suɔ kaa nyɛ maa je lo?” Petro he nɔ ke: “Nyɔmtsɛ, mɛnɔ ngɔ wa maa ya? Mo lɛ o ngɛ neneene wami munyu ɔmɛ. Amlɔ nɛ ɔ, wɔɔ lɛɛ wa he ye, nɛ wa ná le hulɔ kaa mo ji Mawu Nɔ Klɔuklɔu ɔ nɛ.” (Yohane 6:67-69) Anɔkuale yemi nitsɛnitsɛ ji nɛ ɔ nɛ. E ngɛ mi kaa Petro kɛ bɔfo kpa amɛ hu nui níhi nɛ Yesu tsɔɔ nɛ ɔ sisi mohu lɛɛ, se a kpa we e se nyɛɛmi!

Yesu bua jɔ heto nɛ Petro ha a he, nɛ e bi mɛ ke: “Anɛ pi imi nɛ i hla nyɛ ni nyɔngma kɛ enyɔ ɔmɛ lo? Lɛ kɛ pee kɛɛ nɛ nyɛ ti nɔ kake peeɔ Abosiami ɔ.” (Yohane 6:70) Yuda Iskariot he munyu Yesu ngɛ tue ɔ nɛ. E ma nyɛ maa pee kaa Yesu to he hɛ kaa Yuda bɔni nane yaya hiami.

Se kɛ̃ ɔ, Yesu bua jɔ kaa Petro kɛ bɔfo kpa amɛ pee we a juɛmi kaa a maa kpale ngɛ e se, loo kaa a ma kpa yi wami hemi ní tsumi nɛ a kɛ lɛ ngɛ tsue ɔ tsumi.