Yesu ubeponjo i kacokiri mi Kapernaum nia en etie kwen m’uai i polo. Ubenen kamaleng’ nia ebemedo ku wec m’elar eyero ni dhanu ma gicaku nilubo toke niai yo nyangu mi dhu nam Galilaya, man ma gicamu cam m’enyayu igi kuca.

Yesu umedere asu ku ponji pare, ewacu kumae: “Yang’ wegwu camu mana i yamba, man githo.” Edok emedo lembe m’ukoc ku maeno, eyero kumae: “An a kwen mi kwo m’uai i polo loro piny: tek ng’atu moko camu kwen maeni, ebibedo rondo ku rondo: eyo kwen de m’abimio en e ring’ kuma, pi kwo mi ng’om.”​—Yohana 6:48-51.

I saa mi Kadhukuwijo mi oro 30 R.M., kinde ma Yesu ubino weco ku Nikodem, eyero nia mer ma Mungu umaru ko ng’om re m’ucwale nimio Wode kara ubodh dhanu. Kawoni Yesu ubenyutho nia ukwayu nicamu ring’ kume, niwacu nibedo ku yioyic i lam m’ebithiero. Eno re m’utie yo mi nwang’u kwo ma rondo ku rondo.

Re dhanu gicaku ng’ur pi wec pa Yesu giwacu kumae: “Ng’atu maeni copo mio ring’ kume iwa ya wacam nenedi?” (Yohana 6:52) Yesu ubemito ginyang’ nia ebeweco ngo iwi ring’ kume mandha, ento iwi ring’ kume mi lapor. Wec m’edok emedo re m’ukoro i lembe m’emito niyero.

Emedo kumae: “Tek wucamu ring’ kum Wod dhanu ngo, wumadhu rimbe de ngo, wumbe ku kwo i iwu giwu. Ng’atu m’ucamu ring’ kuma m’umadhu rimba de ebedo ku kwo ma rondo ku rondo . . . kum ring’ kuma en e cemo mandha, rimba de en e giramadha mandha. Ng’atu m’ucamu ring’ kuma m’umadhu rimba de, ebedo i ia.”​—Yohana 6:53-56.

Juyahudi ma giwinjo wec maeno ginwang’u nia ebeyero lembe ma timere ngo. Giparu nia Yesu ubemito gicak camu ring’ dhanu man gitur cik ma Mungu umio iwi rimo. (Thangambere 9:4; Lembe mi Julawi 17:10, 11) Yesu ubemito ngo niyero nia gicam ring’ kume mandha man gimadh rimbe de mandha. Ebenyutho nia dhanu ceke ma gimito ginwang’ kwo ma rondo ku rondo, gicikiri ninyutho yioyic i lam mi gony m’ebithiero, kinde m’ebimio ring’ kume m’umbe ku dubo man kinde ma rimbe bicwir. Julub pare mapol ginyang’ ungo i ponji maeno, pieno, jumoko m’ikindgi giyero kumae: “Maeni lembe ma tek ng’a ma copo winje?”​—Yohana 6:60.

Kinde ma Yesu unyang’ nia julub pare moko gibeng’ur, ewacu kumae: “Maeni ketho wukieri? Ka kumeno ang’o tek wubineno Wod dhanu beidho ka m’elar ebedo i ie? . . . Lembe m’adaru yero iwu gi tipo, gi kwo de. Ento jumoko nuti i kindwu m’uyio ngo.” Nikum wec maeno ju mapol giweko nilubo toke man giloko.​—Yohana 6:61-64.

Yesu ugam upenjo jukwenda pare 12 kumae: “Wun bende wuyenyo wucidhi?” Petro udwoko ire kumae: “Rwoth, wabicidho ba ng’a? In i won lembe mi kwo ma rondo ku rondo. E wadaru yio wang’eyo de nia in i Ng’atu Maleng’ pa Mungu.” (Yohana 6:67-69) Petro ku juwagi ginyutho gwoko bedoleng’ mandha, kadok nwang’u gin de ginyang’ ungo i ponji maeno ma Yesu uponjo.

Petro udwoko wec m’unyang’u Yesu, re asu ewacu igi kumae: “Agoyo wiwu an ungo wun apar wi ario, man kindwu acel en e wonabali?” (Yohana 6:70) Karaman Yesu ubeweco pi Yuda. Copere Yesu udaru ng’io nia Yuda ucaku pidho awanya marac i ie.

Yesu utie kud anyong’a ning’eyo nia Petro ku juwagi giweko ngo nilubo toke man nitimo bende tic ma bodho kwo ma en de ebetimo.