Ngöne la sunago e Kaperenauma, Iesu a qaja ka hape, nyidrë la nyipi falawa qa hnengödrai. Iesu a qaja la itre trengewekë cili, pine la itre ka xötrethenge nyidrë qa ngöne la ketre götrane la Hnagejë Ne Galilaia, lo itre ka xeni lo falawa me öni ie.

Iesu a sisedrëne me hape: “Hnene la itre qaaqaa i nyipunie hna xeni la mana ngöne la hnapapa, ngo meci pi kö angatr.” Ngo öni nyidrë: “Eni hi la falawa ne mel ka uti qaa hnengödrai. Nge maine tro la ketre a xeni la falawa cili, tro hë angeic a mel epine palua; ke ame la falawa hnenge hna troa hamën, tre, ngönetreing nyine amelene la fen.”—Ioane 6:48-51.

Ngöne lo Paseka 30 M.K., hnei Iesu lo hna qaja koi Nikodremo ka hape, atraqatre la ihnimi Akötresie kowe la fen, matre hnei nyidrëti hna upe la Nekö i nyidrë troa Atre Iamele. Enehila, öni Iesu ka hape, nyipiewekë troa öni la ijöne i nyidrë, ene la troa lapaun kowe la huuj i nyidrë. Aqane tro hi a kapa la mele ka pë pun.

Ngo xele kö itre atre ma drei Iesu, ke öni angatr: “A hnauëne la angeic a troa hamë së la ijöne i angeic matre tro sa öni?” (Ioane 6:52) Aja i Iesu tro angatr a trotrohnine ka hape, nyidrë a hamë ceitun. Nge maine ju, tro hi angatr a canga trotrohnin ke öni nyidrë:

“Pëkö mel thei nyipunie e tha pane öni kö nyipunie la ijön ne la Nekö i atr, me iji la madra i angeic. Haawe, ame la atre öni la ijöneng me iji la madrang, tre tro hë angeic a kapa la mele ka pë pun, . . . nyipi xeni la ngönetreing, nge nyipi zane la madrang. Nge ame la atre öni la ijöneng, me iji la madrang, ce angeice pala hi me eni.”—Ioane 6:53-56.

Pane mekune jë la ejolene la itre trengewekë cili koi angetre Iudra! Ma angatre jë a mekune ka hape, Iesu a upi angatr troa öni atr, me ena la wathebo i Akötresie göi madra. (Genese 9:4; Levitiko 17:10, 11) Ngo tha Iesu kö a upe troa öni la nyipi ijöne i nyidrë, maine ije la madra i nyidrë. Nyidrëti pe a amamane laka, maine ketre a ajane la mele ka pë pun, nyipiewekë tro angeic a lapaun kowe la ngönetrei i nyidrë ka pexej hna troa huujën, me madra hna troa anenin. Ngo eje hi laka, ala nyimu thene la itre atre drei nyidrë ka tha trotrohnine la ini celë. Matre öni itre xan: “Jole catre tro sa kapa la itre trenge ithanata i nyidrë. Drei la ka pi dreng?”—Ioane 6:60.

Öhne hi Iesu ka hape, hetre itre xa atre dreng ka iqej, matre öni nyidrë: “Kolo kö a ajolëne la lapaune i nyipunie? Ngo tune kaa ju hë e tro nyipunieti a öhne la Nekö i atr a elë kowe lo göhne i angeic ekö? . . . Matre ame la itre trengewekënge koi nyipunie, tre qaathene la ua nyine mel. Ngo hetre itre xan thei nyipunie ka tha mejiun.” Pine lai, nyimutre la itretre dreng ka trotriji nyidrë.—Ioane 6:61-64.

Matre Iesu a hnyinge jë kowe la ala 12 ka hape: “Nyipunieti fe a hane pi tro?” Sa jë hi Peteru ka hape: “Joxu, thei nyipëti la itre trengewekë ne mele ka pë pun, matre tro pe kö huni a tro ië? Nge hne huni hna mejiun me kapa laka, nyipëti hi la Atre Ka Hmitrötre i Akötresie.” (Ioane 6:67-69) Drei la ketre aqane inyipicikeu ka tru! Ke tha trotrohnine pala kö Peteru me itre xa aposetolo la ini hnei Iesu hna hamën.

Ngacama madrine catre Iesu la aqane sa i Peteru, ngo öni nyidrë: “Eni lo ka ië nyipunie ala Truelof, eje hi? Ngo hetre atre inyizö thei nyipunie.” (Ioane 6:70) Iesu a qeje Iudra Isakariota. Ma öhne hë Iesu ka hape, Iudra ha nyiqaane jol.

Ngo eje hi laka, kola akeukawanyi Iesu laka, tro pala kö Peteru me itre xa aposetolo a xötrethenge nyidrë, me eatrëne la huliwa ne iamele i nyidrë.