YESU WAFUnjishenga mu nshinagoga yajinga mu Kapenama pa mambo a kajo ka kine kafumine mwiulu. Kyamweka byambo byo aambile byajinga bya kununga pa byo abuujile bantu bamutaaine bafumine ku musela wa Kalunga ka Ngalilea ko bajiijile bashinkwa ne masabi mu jishinda ja kukumya.

Yesu watwajijile kwamba’mba: “Bashakulu benu bajiilenga manna mu kiselebwa, bino bafwile.” Kupusanako na manna, aye walumbulwile’mba: “Amiwa yami kajo komi kafumine mwiulu. Inge muntu waja kano kajo ukekala myaka ne myaka; kabiji kajo ko nkapana, ye mubiji wami ye nkapaina ba pano pa ntanda kuba’mba bakekale na bumi.”—Yoano 6:48-51.

Mu 30 C.E. kimye kya mwela wa mebele, Yesu wabuujile Nikodema amba Lesa byo ebatemwishe ba pano pa ntanda wapaine Mwananji kwikala Mupulushi. Onkao mambo, Yesu wamwesheshenga’mba yense uji pano pa ntanda uja mu kifwanyikizho mubiji wanji kupichila mu kwitabila mu kitapisho kyo apaine. Jino jo jishinda ja kwikelamo na bumi bwa myaka ne myaka.

Nangwa byonkabyo, bantu bakaine byaambile Yesu. Bashikishe’mba: “Uno muntu wakonsha kwitupa byepi mubiji wanji amba tuje?” (Yoano 6:52) Yesu wakebelenga bantu bo aambilengako kukwatakanya amba kuja mubiji wanji kwafwainwe kubiwa mu kifwanyikizho. Jishinda jo aambijilemo jamwesheshe byo alumbulwilenga.

“Umvwe mwabula kuja mubiji wa Mwana muntu ne kubula kutoma mashi anji, kechi mukekala na bumi ne. Yense uja mubiji wami ne kutoma mashi ami, ukekala na bumi bwa myaka ne myaka, . . . mambo mubiji wami ko kajo ka kine, ne mashi ami byo bya kutoma bya kine. Yense uja mubiji wami ne kutoma mashi ami uji ne amiwa, ne amiwa nji ne aye.”—Yoano 6:53-56.

Lufunjisho lwa kwa Yesu lwakonsheshe kufichisha Bayudea ku muchima. Mambo balangulukilenga’mba Yesu watundaikilenga kuja bantu kabiji walajilenga muzhilo wa Lesa waamba pa kuja mashi. (Ntendekelo 9:4; Bena Levi 17:10, 11) Pano bino, Yesu kechi waambilenga pa kuja mubiji yenkawe nangwa kutoma mashi onkae ne. Aye wakoseshengatu kishinka kya kuba’mba bonse bakatambula bumi bwa myaka bafwainwa kwitabila mu kitapisho kyo apaine kya mubiji wanji walumbuluka ne mashi aichikile apana bumi. Nangwatu baana banji ba bwanga bavula kechi baumvwine mwatajile luno lufunjisho lwanji ne. Onkao mambo, bamo baambile’mba: “Bino byambo byakatazha bingi; ñanyi usakwibyumvwa?”—Yoano 6:60.

Bino Yesu byo ayukile’mba baana banji ba bwanga banyinyichilenga pa mambo a kino, wibashikishe’mba: “Nanchi kino kimutuntwisha nyi? Pano kikekala byepi umvwe mukamone Mwana muntu saka aya ko afumine? . . . Byambo byo nemwambila byo bya mupashi kabiji byo bipana bumi. Pakuba kuji bamo mwi anweba babula kwitabila.” Na mambo a kino, baana banji ba bwanga bavula balekele kumulondela.—Yoano 6:61-64.

Onkao mambo, Yesu washikishe batumwa 12 amba: “Nanchi ne anweba mukeba kuya nyi?” Petelo wakumbwile’mba: “Nkambo, tukaya kwi ñanyi? Anweba muji na byambo bipana bumi bwa myaka ne myaka. Twaitabila ne kuyuka’mba anweba mwi Wazhila wa Lesa.” (Yoano 6:67-69) Kine bino byambo byamwesheshe bukishinka nangwa kya kuba Petelo ne batumwa bakwabo kechi baumvwishishe mwatajile lufunjisho lwa kwa Yesu pa uno mutwe ne.

Nangwa kya kuba byakumbwile Petelo byamutokeshe ku muchima, Yesu waambile’mba: “Nanchi amiwa kechi nemusajile anweba batumwa jikumi na babiji nenyi? Bino umo mwi anweba ye wa luntepentepe.” (Yoano 6:70) Waambilenga pe Yudasa Isakaliota. Kampe pa kyokya kimye Yesu wamwene’mba Yudasa watatula kwikala na byubilo byatama.

Pano bino, kino kyamusangajikile Yesu pa kuyuka kuba’mba Petelo ne batumwa bakwabo bakebelenga kumulondela aye ne kwingilako mwingilo wa kulenga baana ba bwanga ye aingijilenga.