Capernaum markapa Diosta adorayänan wayichö këkarmi, Jesusqa ciëlupita rasumpa kaq tanta kanqanta yapë yachatsikurqan. Itsa tsëtaqa yachatsikurqan, Galilëa qocha ëwëchö tantata y pescäduta mikushqa kaqkunata yachatsinqanllapita.

Jesusmi kënö nirqan: “Qamkunapa unë kastëkikunaqa tsunyaqchömi manäta mikuyarqan, tsënö kaptimpis wanuyarqanmi”. Manäpita jukläya kanqantam, kënö nir entienditsikurqan: “Noqam ciëlupita urämushqa kawëkaq tanta kä. Pipis kë tantapita mikoq kaqqa imëyaqpis kawanqam; y rasumpa kaqchöqa, noqa qoyänaqpaq kaq tantaqa nunakunapa kawëninrëkur qonäpaq kaq ëtsämi” (Juan 6:48-51).

Tamya tiempu pasariptin 30 watachömi, Jesusqa Nicodëmuta nirqan nunakunata alläpa kuyarnin Diosqa Tsurinta qonqanta. Y kananqa, imëyaqpis kawëyoq kayänampaq imata rurayänampaq kaqtam nikarqan. Tsëpaqqa ëtsanta mikï precisanqantam nirqan, juk parlakïchöqa, pë wanunqanman markäkuyänan precisanqantam.

Tsërëkurmi nunakunaqa kikinkunapura discutir qallëkuyarqan, y kënömi tapukuyarqan: “¿Imanötaq kë nunaqa ëtsanta mikunapaq qomashwan?” (Juan 6:52). Ëtsanta mikuyänan ima ninan kanqanta alleq entiendiyänantam Jesusqa munarqan. Tsëta rikätsikunampaqmi kënö nirqan:

“Nunapa Tsurimpa ëtsanta mana mikur, y yawarninta mana upurqa, manam kawëta tariyankitsu. Ëtsäta mikoq kaq y yawarnïta upoq kaqqa imëyaqpis kawëyoqmi kanqa, [...] porqui ëtsämi rasumpa kaq mikïqa, y yawarnïmi rasumpa kaq upunaqa. Ëtsäta mikoq kaq y yawarnïta upoq kaqqa, juknöllam noqawan imëpis këkan” (Juan 6:53-56).

Judïukunaqa alläpachi piñakuyarqan tsënö ninqampita. Itsa pensayarqan, nuna mayinkunapa ëtsanta mikuyänampaq Jesus nikanqanta o Diospa Leynin yawar asuntupaq mandakunqanta mana cäsukuyänampaq kaqta (Genesis 9:4; Levïticu 17:10, 11). Peru Jesusqa manam rasumpa ëtsanta mikuyänampaqtsu ni yawarninta upuyänampaqtsu nikarqan. Tsëwanqa rikätsikïkarqan jutsannaq cuerpunta qonqanman y yawarninta wanurnin ramanqanman markäkoq kaqkunaqa, imëyaqpis kawëta tariyänampaq kaqtam. Peru mëtsika qateqninkunam yachatsikïkanqanta entiendiyarqantsu. Tsëmi kënö niyarqan: “Kë yachatsikïqa mana wiyëpaqnömi; ¿piraq tsëta wiyanman?” (Juan 6:60).

Qateqninkuna pëpaq mana allita parlëkäyanqanta cuentata qokurirmi, kënö tapurqan: “¿Tsëku ishkitsiyäshunki? Tsëqa, ¿imanöraq kariyankiman nunapa Tsurinta unë kanqanman witsëkaqta rikarnäqa? [...] Noqa parlapäyarniki niyanqaqqa santu espïritupitam shamun y kawëtam qokun. Peru qamkunapita wakinnikikunaqa manam creiyankitsu”. Tsënö ninqanta wiyarninmi, wakinqa ewkuyarqan y qateqnin këta munayarqannatsu (Juan 6:61-64).

Tsëmi Jesusqa 12 apostolninkunata kënö tapurqan: “¿Qamkunapis manaku ëwakïta munayanki?”. Pëdrunam kënö contestarqan: “Teytë, ¿pimanraq ëwayäshaq? Qamtaq imëyaqpis kawëta qokoq palabrakunataqa katsinki. Noqakunaqa creiyarqömi y Diospa Santu Tsurin kanqëkitam alleq musyayarqö” (Juan 6:67-69). ¡Pëdruqa alläpa markäkoq kanqantam rikätsikurqan! Jesus yachatsikïkanqanta pë y wakinkuna alleq mana entiendirpis manam jaqiyarqantsu.

Pëdru tsënö ninqan kushitsiptimpis, Jesusqa,  “¿manaku qamkunata, chunka ishkëkikunata (12) noqa akrayarqoq? Tsënö kaptimpis qamkunapita juknikikunam chikikur tumpakoq” kanqa nirqan (Juan 6:70). Tsënö nirqa Jüdas Iscariötipaqmi parlëkarqan. Itsa Jesusqa cuentata qokushqana karqan, Jüdasqa mana alli rurëkunamanna ishkikanqanta.

Tsënö kaptimpis, Pëdruwan wakin qateqninkuna wakin nunakunanö mana jaqiriyaptinmi Jesusqa kushikurqan. Manam pëta ni nunakunata yachatsitapis jaqirita munayarqantsu.