Jesu o ka synagogeng Kapernauma ’me o bolella batho hore ke eena bohobe bo tsoang leholimong. O ile a buisana ka taba ena le batho bao a ileng a ba fepa mahobe li litlhapi ha ba ne ba le ka bochabela ho Leoatle la Galilea. Kamoo ho bonahalang kateng, seo a se buang ke ntšetso-pele ea litaba tseo.

Jesu o tsoela pele ka puisano ena o re: “Baholo-holo ba lona ba ile ba ja manna lefeelleng ’me leha ho le joalo ba shoa.” Joale Jesu o bontša phapang ka ho re: “Ke ’na bohobe bo phelang bo theohileng leholimong. Haeba leha e le mang a ja bohobe bona o tla phela ka ho sa feleng, ’me, kannete, bohobe boo ke tla fana ka bona ke nama ea ka bakeng sa bophelo ba lefatše.”​—Johanne 6:​48-51.

Ka selemo sa 30, Jesu o ile a bolella Nikodemase hore Molimo o ratile batho hoo a ba fileng Mora oa hae hore a ba pholose. Jesu o hatisa hore tsela feela ea hore batho ba fumane bophelo bo sa feleng ke ka hore ba je nama ea hae, ka mantsoe a mang, ba behe tumelo sehlabelong seo a tla se etsa.

Leha ho le joalo, batho ha ba lumellane le mantsoe ana a Jesu. Ba re: “Ke joang monna enoa a ka re fang nama ea hae hore re e je?” (Johanne 6:​52) Jesu o batla hore ba utloisise hore taba ena ke mokhabo-puo.

Mantsoe a hae a latelang aa bontša hore na o bolela’ng. O re: “Ntle le hore le je nama ea Mor’a motho le ho noa mali a hae, ha le na bophelo ka ho lona. Ea jang nama ea ka le ho noa mali a ka o na le bophelo bo sa feleng, . . . etsoe nama ea ka ke lijo tsa ’nete, le mali a ka ke seno sa ’nete. Ea jang nama ea ka le ho noa mali a ka o lula bonngoeng le ’na.”​—Johanne 6:​53-56.

U se u ka inahanela feela hore na Bajuda ba utloa mantsoe ana a ba khopisa hakae. E ka ’na eaba ba nahana hore Jesu o re e be malimo kapa o batla ba tlole Molao oa Molimo o khahlanong le ho ja mali. (Genese 9:4; Levitike 17:​10, 11) Leha ho le joalo, Jesu ha a bue ka ho ja nama le ho noa mali ka tsela ea sebele. O bontša hore batho bohle ba batlang ho fumana bophelo bo sa feleng ba lokela ho bontša tumelo sehlabeng seo a tla fana ka sona ha a nehelana ka ’mele oa hae o phethahetseng, le ha mali a hae a tšolloa. Leha ho le joalo, esita le barutuoa ba hae ba bangata ha ba utloisise hore na o bolela’ng. Ba bang ba re: “Puo ena ea tšosa, ke mang ea ka e mamelang?”​—Johanne 6:60.

Jesu oa hlokomela hore barutuoa ba bang ba hae ba ntse ba korotla, kahoo o re ho bona: “Na see sea le khopisa? Ka hona, ho thoe’ng haeba le ka bona Mor’a motho a nyolohela moo a neng a le teng pele? . . . Lipolelo tseo ke le boleletseng tsona ke moea ’me ke bophelo. Empa ho na le ba bang ba lona ba sa lumeleng.” Ka mor’a hore a cho joalo, barutuoa ba bang baa tsamaea ’me ba khaotsa ho mo latela.​—Johanne 6:​61-64.

Joale Jesu o re ho baapostola ba hae ba 12: “Le lona ha le batle ho tsamaea, na ha ho joalo?” Petrose o araba ka ho re: “Morena, re tla tloha re ee ho mang? Ke uena ea nang le lipolelo tsa bophelo bo sa feleng, ’me re lumetse ’me rea tseba hore u Mohalaleli oa Molimo.” (Johanne 6:​67-69) Petrose o bontša botšepehi ka tsela e tsotehang le hoja ka nako ena, eena hammoho le baapostola ba bang ba e-sʼo utloisise hore na ha e le hantle Jesu o bolela’ng.

Le hoja Jesu a thabetse karabo ea Petrose, o re: “Ke khethile lona ba leshome le metso e ’meli, na ha ho joalo? Empa leha ho le joalo e mong oa lona ke moetselletsi.” (Johanne 6:​70) Jesu o bua ka Judase Iskariota. Ho ka etsahala hore ebe ka nako ena Jesu oa bona hore Judase o se a qalile mekhoa e mebe.

Leha ho le joalo, Jesu o thabisoa ke ho tseba hore Petrose le baapostola ba bang ba ntse ba mo khomaretse ebile ba ntse ba ikemiselitse ho etsa mosebetsi oa bohlokoa oo a o etsang.