Pa nyengu yo Yesu wenga musinagogi ku Kaperenao, wangusambiza ŵanthu kuti iyu ntchiŵandi chayichu chakutuliya kuchanya. Iyu wanguŵasambiza fundu zinyaki kusazgiyapu fundu zo wangusambiza ŵanthu wo anguluta kuvuma kwa Nyanja ya Galileya, wo angurya viŵandi ndi somba vo angupaskika kwenuku.

Yesu wangulutirizga kukamba kuti: “Apapi ŵinu akali angurya mana muchipululu kweni akufwa.” Mwakupambana ndi vo vinguchitikiya ŵanthu ŵenaŵa, iyu wangukonkhoska kuti: “Ini ndini chiŵandi chakupaska umoyu chakutuliya kuchanya. Weyosi yo waturya chiŵandi ichi wazamuja ndi umoyu wamuyaya. Liŵavu langu ndilu chakurya cho ndipereka kuti ŵanthu wosi asaniyi umoyu.”—Yohane 6:48-51.

Mu mwezi wa March pamwenga April mu chaka cha 30 C.E., Yesu wangukambiya Nikodimu kuti Chiuta wakuchiyanja ukongwa charu ndipu wakupereka Mwana waki nge Mutaski. Yapa, Yesu wangulongo kukhumbika kwa kurya liŵavu laki, ko kung’anamuwa kulongo chivwanu mu sembi yo watingi waperekengi. Yeniyi ndiyu nthowa yo munthu wangazisaniriya umoyu wamuyaya.

Chinanga kuti ve viyo, ŵanthu angususka vo Yesu wangukamba, ndipu afumbananga kuti: “Munthu uyu wangatipaska wuli liŵavu laki kuti tiryi?” (Yohane 6:52) Yesu wakhumbanga kuwovya ŵanthu kuvwisa kuti vo wakambanga vang’anamuwanga kurya liŵavu laki chayilu cha. Ndipu pavuli paki, iyu wangukonkhoska vo wang’anamuwanga.

Yesu wangukamba kuti: “Nditikuneneskiyani kuti kwambula kuti mwarya liŵavu la Mwana wa munthu ndi kumwa ndopa zaki mwazakuwusaniyapu cha umoyu. Weyosi yo waturya liŵavu langu ndi kumwa ndopa zangu wazamulonde umoyu wamuyaya, . . . pakuti liŵavu langu ntchakurya chayichu ndipu ndopa zangu ntchakumwa chayichu. Weyosi yo waturya liŵavu langu ndi kumwa ndopa zangu, wakoliyana nani.”—Yohane 6:53-56.

Ŵanaŵaniyani mo Ayuda anguguŵiya ŵati ŵavwa mazu ngenanga! Panyaki yiwu aŵanaŵananga kuti Yesu wang’anamuwa kuti aryengi anyawu pamwenga kuswa dangu laku Chiuta lakuti angaryanga ndopa cha. (Chiyambo 9:4; Ŵalevi 17:10, 11) Kweni Yesu wakambanga kurya liŵavu laki pamwenga kumwa ndopa zaki chayizu cha. M’malu mwaki wang’anamuwanga kuti weyosi yo wakhumba kuzisaniya umoyu wamuyaya, wakhumbikanga kuvwana mu sembi yo iyu wanguja kamanavi kuti wayipereki. Iyu wanguchita venivi po wangupereka liŵavu laki lambula ubudi kweniso ndopa zaki nge sembi. Kweni chinanga mbakusambira ŵaki anandi anguvwisa cha vo iyu wang’anamuwanga ndipu anyaki angukamba kuti: “Vo wakamba munthu uyu vakuguŵiska. Ndiyani wangavwa?”—Yohane 6:60.

Yesu wati waziŵa kuti akusambira ŵaki anyaki adandawula, wanguŵafumba kuti: “Kumbi venivi vakuguŵiskani? Sonu kwe wuli asani mungawona Mwana wa munthu wachikwere ko wenga kali? . . . Vo ndakukambiyani panu, ndivu mzimu kweniso umoyu. Kweni anyaki mwaku yimwi muvwana cha.” Yesu wati wakamba venivi, akusambira ŵaki anandi anguleka kumulondo ndipu anguwere kwawu.—Yohane 6:61-64.

Yesu wangufumba akutumika ŵaki 12 kuti: “Kumbi namwi mukhumba kuluta?” Peturo wangumuka kuti: “Ambuya, tilutengi kwaku yani? Yimwi mwe ndi mazu ngakupaska umoyu wamuyaya. Isi tagomezga kweniso taziŵa kuti yimwi ndimwi Wakupaturika waku Chiuta.” (Yohane 6:67-69) Vo Peturo wangumuka vingulongo kuti iyu kweniso akutumika anyaki, ŵenga akugomezgeka chinanga kuti nawu anguvwisisa cha vo Yesu wangusambiza pa nkhani yeniyi.

Yesu wangukondwa ukongwa ndi vo Peturo wangumuka. Mwaviyo, wangukamba kuti: “Asi ndikusankha yimwi 12? Kweni yumoza waku yimwi ngwakukamba vinthu viheni vakukwaskana ndi anyaki.” (Yohane 6:70) Yapa, Yesu wakambanga Yudasi wa ku Keriyoti. Viwoneka kuti panyengu iyi,Yesu wanguziŵa kuti Yudasi wakhumba kuchita vinthu viheni.

Chinanga kuti venga viyo, Yesu wangukondwa kuziŵa kuti Peturo ndi akutumika anyaki anguleka cha kumulondo kweniso kugwiraku ntchitu yakutaska ŵanthu yo Yesu wagwiranga.