Kiki Pasa i nwii 32 N.Y. i yé tiige, Yésu a yé niiga i Galiléa. I mbus, a nke i Yérusalem inyu Pasa kii Mbén Djob i mbat. Ndi, Yésu a mboñ hala bisôsôli inyule Lôk Yuda i nsômbôl nol nye. (Yôhanes 7:1) I mbus, Yésu a ntémb i Galiléa.

I nene le Yésu a yé Yérusalem i ngéda Farisai ni bayimbén ba nlo i nyeeni. Inyuki ba nlo? Ba nyéñ ôm nye nsohi. Ba mbat nye le: “Inyuki banigil boñ ba noñ bé bilem bi bôt ba ngéda kôba? Kii héga, ba njôwa bé moo map ngéda ba nsômbôl je.” (Matéô 15:2) Kekikel Djob a bi kal bé litén le li noñ lem i ‘jôwa moo ipam i liboñ li woo.’ (Markô 7:3) Ndi inyu Farisai, i tjél boñ hala i yé béba keñi.

Iloole Yésu a ntimbhe bo, a ñôt mahoñol map mu kiki ba nkôôba bôk Mbén Djob. A mbat bo le: “Inyuki yak bé ni mbôk mbén Nyambe inyu bilem bi loñ nan? Kii héga, Nyambe a bi kal le: ‘Ti isoñ bo nyuñ lipém,’ ni le: ‘I mut a nleñ isañ tole nyañ bibuk bibe, a nlama nôla.’ Ndi bé ni nkal le: ‘Nu ni nu a nkal isañ tole nyañ le: “I gwom gwobisôna me gwé, bi me bak le me gwélél inyu hôla we, me nkébél gwo Nyambe,” a gwé bé le a ti isañ lipém to ndék.’”​—Matéô 15:3-6; Manyodi 20:12; 21:17.

Farisai i nkal le moni, bigwel moo ni i gwom gwobisôna ba mbôn Djob bi yé inyu témpel, ni le bi nla bé gwélana. Ndi i pot maliga, ba mpot ndik mpodok, ba nyégla makébla map. Kiki bo hihéga man a nla nkal le likébla jé li yé “korban,” hala wee likébla li yé inyu Djob tole inyu témpel, kiki bo le likébla li li yé likébla li témpel. Man a nginda gwé pôla i gwélél i moni nu, ndi a ntjél gwélél nwo inyu hôla bagwal bé. A ntjél yoñ nduñ ni bagwal bé.​—Markô 7:11.

Yésu a nkon bé maséé i tehe kiki ba nkôde mbén Djob. A nkal le: “Ni bi yilha bañga i Nyambe yañga inyu bilem bi loñ nan. A bé bôt ba bihéñba, maliga mon Yésaya a bi bôk pot inyu nan ngéda a kal le: ‘Litén lini li nti me lipém ni bibép, ndi miñem nwap mi yé yaga haa ni me. Yañga yaga nyen ba nke ni bisu i bégés me, inyule ba niiga mambén ma bôt ba binam wengoñle ma yé mambén ma Nyambe.’” Lôk Farisai i timbhe bé Yésu. Ni nye a nsébél limut li bôt, a kal jo le: “Emblana, ni tibil ki nok. I yom i njôp mut i nyo, yo bé yon i nhindis nye, ndi i yom i mpémél mut i nyo, yon i nhindis nye.”​—Matéô 15:6-11; Yésaya 29:13.

I mbus ngéda, kiki banigil ba yé i ndap ni Yésu, ba mbat nye le: “Baa u nyi le Farisai i ñunup ngéda i nok i yom u mpot?” A ntimbhe, a kal le: “Hiki bebela Tata wem nu ngii a mbel bé, b’a nup yo. Nwaha bo. Ba yé baéga ba ba yé ndim. Ndi, ibale mut ndim a ñéga mut ndim, ngo bo iba ba ga kwo ikété bee.”​—Matéô 15:12-14.

Yésu a mboñ wengoñle a yé nhelek i ngéda Pétrô, i jôl li banigil bobasôna, a mbat i yom i nhindis mut. Yésu a ntimbhe le: “Baa ni nyi bé le hiki yom i njôp mut i nyo, i ntagbe i minla, ndi i sôk i luk? Ndi hiki yom i mpam mut i nyo i nlôl i ñem; i mam ma mon ma nhindis mut. Kii héga, mu ñem nyen bipék bibe bi  nlôl, yak manola, ndéñg, malal ma nyega, wip, mbôgi bitembee, liôbôs Nyambe jôl. I mam mana mon ma nhindis mut; ndi i je ngi jôwa moo i nhindis bé mut.”​—Matéô 15:17-20.

Yésu a nkal bé bôt le ba ba mahindi, tole ba jôwa bañ moo i ngéda ba nlamb tole ngéda ba nje. Maselna ni hala, a nyelel bihéñba bi Farisai i i nwas mbén Djob inyu bôñôl matiñ ma bôt ba binam. Maliga ma yé le i mam ma nlôl ñem mon ma nhindis mut.