Nunga lam jonok perayaan Paska taon 32 M. Alani i, borhat ma Jesus tu Jerusalem laho mangarayahon Paska. Ndang lomo roha ni Jesus botoon ni halak ro ibana tusi, ai naeng pamateon ni halak Jahudi do ibana. (Johannes 7:1) Dung perayaan i, mulak ma Jesus tu Galilea.

Tingki di Kapernaum Jesus, ro do halak Parise dohot siboto surat sian Jerusalem mandapothon ibana. Ro do nasida laho mangalului sala ni Jesus. Disungkun nasida ma Jesus, “Boasa ndang diihuthon angka siseanmi adat ni angka ompunta? Umpamana, ndang disunsi nasida tanganna laho mangan.” (Mateus 15:2) Sasintongna ndang hea diparentahon Debata naposona asa ‘mamburi tangan sahat tu siku’. (Markus 7:3) Alai didok roha ni halak Parise nunga mardosa angka sisean i, ala ndang dibahen nasida songon i.

Dipatuduhon Jesus ma, halak Parise i do na mangalanggar Patik ni Debata. Didok Jesus ma, “Boasa ndang diihuthon hamu parenta ni Debata alani adatmuna? Umpamana, didok Debata do, ‘Pasangap ma amangmu dohot inangmu,’ jala, ‘Manang ise na mangaleai amangna manang inangna ingkon pamateon do.’ Alai didok hamu do, ‘Manang ise na mandok tu amangna dohot inangna, “Sude na ingkon lehononku hian tu hamu, nunga hubahen gabe silehon-lehon tu Debata,” ndang ingkon pasangaponna be amana.’”​—Mateus 15:3-6; 2 Musa 20:12; 21:17.

Didok halak Parise, molo marsangkap sasahalak naeng mangalean hepeng manang artana gabe silehon-lehon tu Debata, nunga boi i didok ampuna ni Debata. Hape ndang dilehon nasida dope i tu bagas joro. Alani i didok nasida, ndang boi be dipangke nasida artana i laho mangurupi halak na asing. Umpamana, molo didok sahalak ianakhon tu natua-tuana, nunga dipelehon hepengna gabe “korban” tu Debata manang tu bagas joro, ndang boi be pangkeonna hepengna i laho mangurupi natua-tuana. Hape ndang dilehon anakna i dope hepengna i tu bagas joro. Alani i, dipangke ibana ma patik i gabe sidalian asa unang manarihon natua-tuana.​—Markus 7:11.

Sogo do roha ni Jesus mangida halak Parise i, ala dipabalik-balik nasida do Patik ni Debata. Didok Jesus ma, “Gabe ndang marlangku be hata ni Debata alani adatmuna i. Halak na munafik do hamu. Toho ma na nidok ni panurirang Jesaya taringot tu hamu, ‘Holan di pamanganna do bangso on pasangaphon ahu, alai dao do roha ni nasida sian ahu. Ndang adong gunana nasida tongtong manomba ahu, ai parenta ni jolma do diajarhon nasida.’” Ndang boi dialusi halak Parise i hata ni Jesus i. Dung i, disuru Jesus ma asa jonok angka jolma i tu ibana. Didok Jesus ma, “Tangihon jala parrohahon ma on: Ndang na masuk tu pamangan ni sasahalak na mambahen ibana ramun, alai na kaluar sian pamanganna do.”​—Mateus 15:6-11; Jesaya 29:13.

Dung i disungkun siseanna ma Jesus, “Diboto ho do naung hansit roha ni halak Parise i mambege na nidokmi?” Didok Jesus ma, “Sibutbuton do ganup suan-suanan na so sinuan ni Damang na di banua ginjang i. Pasombu ma disi. Panogu-nogu na mapitung do nasida. Molo na mapitung manogu-nogu na mapitung, tarrobung do duansa.”​—Mateus 15:12-14.

Tarsonggot do ra Jesus tingki disungkun si Petrus taringot tu na mambahen sasahalak  ramun. Didok Jesus ma, “Na so diboto hamu do, sude na masuk tu pamangan ni halak, masuk do i tu butuha jala kaluar do i muse? Alai, sude na kaluar sian pamangan ni halak, na ro sian roha do i jala i do na mambahen ramun. Umpamana, sian roha do tubu pingkiran na jahat, mambunu, mangalangkup, mangulahon seks na so patut, manangko, mandok hata na so tutu dohot mangaleai. Angka i do na mambahen ramun sasahalak, alai na so manunsi tanganna laho mangan, ndang i na mambahen ramun sasahalak.”​—Mateus 15:17-20.

Ndang na so lomo roha ni Jesus ias sasahalak, manang manunsi tangan andorang so mangan, manang tingki paradehon sipanganon. Alai na maminsang pamimpin ni agama i do Jesus. Ai munafik do nasida jala rumingkot do di nasida adat ni jolma sian Patik ni Debata. Alani i, sintong ma hata ni Jesus na mandok, pambahenan ni sasahalak na jahat na kaluar sian rohana do na mambahen sasahalak gabe ramun.