Seraya Pengerami Paska taun 32 M. nyau semak, Jesus kisuk ngajar orang ba Galili. Udah nya Jesus mupuk ngagai Jerusalem laban deka ngintu Pengerami Paska baka ke diasuh Adat Petara. Tang, Jesus patut bejimat laban orang Judah deka munuh iya. (John 7:1) Udah nya, iya pulai baru ngagai Galili.

Orang Parisi enggau bala penulis Adat datai ari Jerusalem laban deka betemu enggau Jesus. Maya nya, Jesus mega ba Kapernaum. Nama kebuah sida sanggup bejalai ari Jerusalem ngagai Kapernaum? Sida deka ngiga kebuah ngambika ulih nuduh Jesus. Nya alai, sida nanya iya: “Nama kebuah bala murid nuan ngelanggar adat asal aki ini kitai? Sida enda masu jari sebedau makai.” (Matthew 15:2) Tang Petara nadai kala ngasuh nembiak Iya “masu jari nyentuk ngagai siku.” (Mark 7:3) Taja pia, orang Parisi ngumbai nya penyalah ti besai.

Jesus enda terus nyaut sida, tang Jesus nunjukka baka ni sida empu udah sengaja ngelanggar Adat Petara. Iya nanya sida: “Nama kebuah kita ngelanggar pesan Petara ketegal adat asal kita?” Ku iya agi: “Ambika chunto, Petara madahka, ‘Bebasaka apai enggau indai nuan,’ lalu ‘Orang ke bejai apai indai diri, patut diukum bunuh.’ Tang ku kita, ‘Enti orang madah ngagai apai tauka indai iya: “Utai ti dikemisi aku, ke beguna ba kita, nyadika pemeri ke Petara,’ iya tau enda ibuh bebasaka apai indai iya agi.’”—Matthew 15:3-6; Pemansut 20:12; 21:17.

Orang Parisi madahka enti sesiku orang deka meri duit, reta tauka utai bukai ngagai Petara, orang nya enda ulih ngena utai nya ba pekara bukai. Tang iya ke amat, orang nya bedau agi meri pemeri nya lalu semua utai nya agi diempu iya. Ambika chunto, siku anak madahka duit tauka reta iya “nyadika korban,” lalu tu pemeri iya ngagai Petara. Nya alai, iya enda ulih ngena duit tu kena nulung apai indai iya ke udah tuai. Tu reti iya, iya ngemeratka agi Rumah Sembiang ari apai indai iya empu. Taja pia, iya empu ulih sepeneka ati ngena duit tauka reta nya ba pekara bukai. Enggau nya, iya enggai betanggungjawap nyaga apai indai iya.—Mark 7:11.

Jesus balat ringat laban orang Parisi mutarbelitka Adat Petara. Jesus madah: “Nya alai, kita ngasuh jaku Petara nadai agi reti ketegal adat asal kita. Kita tu orang ke pura-pura ngapa. Amat jaku Isaiah lebuh iya benabika pasal kita: ‘Sida bebasaka Aku ngena mulut aja, tang ati sida jauh ari Aku. Nadai reti sida majak nyembah Aku, laban utai ke diajar sida semina adat mensia.’” Pengudah nya orang Parisi enda bemunyi. Nya alai, Jesus ngangauka orang mayuh ngagai iya. Ku iya bejaku: “Pendingka meh ngambika kita mereti: Utai ti tama ngagai nyawa orang, nadai ngasuh iya enda tuchi.”—Matthew 15:6-11; Isaiah 29:13.

Bala murid Jesus nanya iya: “Kati nuan nemu orang Parisi pedis ati ninga utai ti disebut nuan?” Iya nyaut: “Semua utai ti tumbuh, ti ukai ditanam Apai aku ti ba serega, deka dichabut magang. Enti malin ke buta ngiring orang ke buta, seduai iya deka sama labuh ngagai lubang.”—Matthew 15:12-14.

Jesus tekenyit lebuh Peter nanya nama utai ti ngamahka orang. Jesus nyaut: “Kati kita enda nemu? Utai ti tama ngagai nyawa, tama ngagai perut, lalu udah nya pansut ari tubuh. Tang utai ti pansut ari nyawa, datai ari ati. Nya meh utai ti ngamahka mensia. Laban ari ati pansut runding ti jai, ke ngasuh orang deka bebunuh, butang, ngereja ulah seks ti kamah, ngenchuri, besaksi bula, enggau bejaku ngelaban utai ti tuchi. Nya  meh utai ti ngamahka mensia. Tang makai ngena jari ti enda dibasu, enda ngamahka mensia.”—Matthew 15:17-20.

Jesus ukai madahka orang enda ibuh masu jari sebedau nyediaka pemakai, tauka sebedau makai. Taja pia, Jesus ngutuk orang Parisi ke bepura-pura nitihka Adat Petara tang kebendar iya sida nitihka adat mensia. Kebendar iya, ulah ti jai ke datai ari ati ke ngamahka sesiku orang.