O ũrĩa Pasaka ya mwaka wa 32 ĩrakuhĩrĩria, Jesu arahunjia na kĩyo thĩinĩ wa Galili. Agacoka hihi agathiĩ Jerusalemu nĩ ũndũ wa Pasaka, ta ũrĩa Watho wa Ngai ugĩte. No Jesu ageka ũguo ehũgĩte tondũ Ayahudi maracaria ũrĩa mangĩmũũraga. (Johana 7:1) Thutha ũcio agacoka Galili.

Kwahoteka Jesu arĩ Kaperinaumu rĩrĩa Afarisai na andĩki-Watho kuuma Jerusalemu moka kũrĩ we. Hihi moka kũrĩ we gwĩka atĩa? Maretha ũndũ ũngĩtũma mathitangĩre Jesu mahĩtia ma kuuna Watho. Makamũũria ũũ: “Nĩ kĩĩ gĩtũmaga arutwo aku maagarare kĩrĩra gĩa athuri a tene? Kwa ngerekano-rĩ, matiĩthambaga moko mbere ya kũrĩa irio.” (Mathayo 15:2) Ngai ndarĩ hĩndĩ eerire andũ ake marũmĩrĩre mũtugo ũcio wa ‘gwĩthambaga moko nginya kĩgokora.’ (Mariko 7:3) Ĩndĩ Afarisai monaga kwaga gwĩka ũguo arĩ mahĩtia manene.

Handũ ha kũmacokeria ĩmwe kwa ĩmwe, Jesu akamonia ũrĩa moinaga Watho wa Ngai makĩmenyaga. Akamoria ũũ: “Ĩ na inyuĩ mwagararaga maathani ma Ngai nĩ ũndũ wa irĩra cianyu nĩkĩ? Kwa ngerekano-rĩ, Ngai oigire, ‘Tĩaga thoguo na nyũkwa,’ na ‘Ũrĩa ũkaaruma ithe kana nyina no mũhaka oragwo.’ No inyuĩ mugaga atĩrĩ, ‘Ũrĩa wothe wĩraga ithe kana nyina: “Kĩrĩa gĩothe ingĩgũteithia nakĩo nĩ kĩheo kĩamũrĩirũo Ngai,” ndarabatara gũtĩa ithe o na hanini.’”​—Mathayo 15:​3-6; Thama 20:12; 21:17.

Afarisai moigaga atĩ mbeca, indo, kana kĩndũ o gĩothe kĩamũrĩirũo Ngai kĩrĩ ta kĩheo nĩ gĩa gũtwarũo hekarũ, kwoguo gĩtingĩhũthĩrũo na njĩra ĩngĩ. No ũrĩa kũrĩ nĩ atĩ, kĩheo kĩu kĩamũrĩirũo Ngai kĩrĩ o moko-inĩ ma mwene. Kwa ngerekano, mũndũ no oige atĩ mbeca kana indo ciake nĩ “korubani,” ũguo nĩ kuuga kĩheo kĩamũrĩirũo Ngai kana hekarũ, ta hekarũ arĩ yo rĩu nyene kĩheo kĩu. No mbeca kana indo icio irĩ o moko-inĩ make, ĩndĩ akoiga atĩ itingĩhũthĩrũo gũteithia aciari ake akũrũ na marĩ na ũbatari. Na njĩra ĩyo agethema wĩra wake wa kũmarũmbũiya.​—Mariko 7:11.

Jesu arĩ na gĩtũmi kĩega gĩa kũrakara nĩ ũndũ wao kũhũthĩra Watho wa Ngai ũrĩa gũtagĩrĩire, akameera: “Nĩ mwagithĩtie kiugo kĩa Ngai kĩene nĩ ũndũ wa irĩra cianyu. Inyuĩ hinga ici, Isaia nĩ aarathire wega igũrũ rĩanyu, rĩrĩa oigire ũũ: ‘Andũ aya maheaga gĩtĩo na mĩromo no ngoro ciao irĩ kũraya na niĩ. Ũthathaiya ũrĩa maheaga nĩ wa tũhũ, nĩ gũkorũo marutanaga maathani ma andũ.’” Afarisai makaremwo nĩ gũcokeria Jesu nĩ ũndũ wa ciugo icio ciake nditũ. Nĩ ũndũ ũcio ageta kĩrĩndĩ hakuhĩ nake. Agakĩra ũũ: “Thikĩrĩriai na mũnyite wega ũndũ ũyũ: Ti kĩrĩa kĩgeraga kanua ka mũndũ kĩmwĩkĩraga thahu, no kĩrĩa kiumaga kanua gake nĩkĩo kĩmwĩkĩraga thahu.”​—Mathayo 15:​6-11; Isaia 29:13.

Thutha ũcio marĩ nyũmba, arutwo makoria Jesu atĩrĩ: “Nĩ ũĩ Afarisai nĩ mahĩngirũo nĩ ũrĩa ugire?” Nake akamacokeria: “Mũtĩ o wothe ũtahandĩtwo nĩ Awa ũrĩa ũrĩ igũrũ nĩ ũkaamunyũo. Rekei mahĩngĩke. Nĩ atongoria atumumu. Na mũtumumu angĩtongoria ũrĩa ũngĩ, erĩ no kũgwa mangĩgwa irima.”​—Mathayo 15:​12-14.

Jesu akoneka ta amaka Petero amũũria ithenya rĩa arutwo acio angĩ amataarĩrie ũhoro wĩgiĩ kĩrĩa gĩĩkĩraga mũndũ thahu. Akameera: “Kaĩ mũtoĩ atĩ kĩrĩa gĩothe kĩgeragĩra kanua gĩkaingĩra thĩinĩ wa nda gĩcokaga gĩkoima nja ya mwĩrĩ? No rĩrĩ, maũndũ marĩa kanua karagia moimaga ngoro, na macio nĩmo mekĩraga mũndũ thahu. Kwa ngerekano, thĩinĩ wa ngoro nĩkuo kuumaga meciria moru, ũũragani, ũtharia, ngomanio itagĩrĩire,  ũici, ũira wa maheeni, na irumi. Maũndũ macio nĩmo mekĩraga mũndũ thahu, no mũndũ kũrĩa irio atethambĩte moko gũtingĩmwĩkĩra thahu.”​—Mathayo 15:​17-20.

Jesu ndaroiga atĩ ũtheru ti wa bata, kana atĩ mũndũ ndabatiĩ gwĩthamba moko mbere ya kũhaarĩria irio kana kũrĩa. Ĩndĩ, aramenereria ũhinga wa atongoria a ndini, arĩa marageria kwagarara mawatho ma Ngai ma ũthingu na njĩra ya kũrũmĩrĩra irĩra cia andũ. Ũrĩa kũrĩ nĩ atĩ, maũndũ moru marĩa moimaga ngoro nĩmo mekĩraga mũndũ thahu.