Omu Paseka yamu 32 C.E. yapandamine kwakamwihi, Yesu anangwilenga lika muNgalileya. Kufumaho, ayile kuYelusalema kuchilika chaPaseka kweseka naJishimbi jaKalunga. Oloze Yesu alingile ngocho mukuzangama, mwomwo vaYuleya vapwile nakumutondatonda mangana vamujihe. (Yowano 7:1) Kaha akindulukile kuNgalileya.

Chasoloka nge Yesu apwile muKapelenau omu vaFwaliseu navaka-kusoneka vejile kuli ikiye kufuma kuYelusalema. Mwomwo ika vejililile? Vapwile nakutondatonda kanyinyino hali Yesu mangana vamuhane mulonga wakuhokola jishimbi jamukwitava chavo. Vamuhulishile ngwavo: “Mwomwo ika tumbaji twove kaveshi kukavangiza visemwa vyavakakuluka jetuko? Chakutalilaho, kaveshi kusana kumavoko hakulya vyakulyako.” (Mateu 15:2) Kalunga kalwezele vatu jenyi vakavangize chisemwa chakwamba ngwavo, ‘vasane kumavoko avo kuheta nakuminguzako.’ (Mako 7:3) Oloze vaFwaliseu vashinganyekele ngwavo nge mutu keshi kulinga ngochoko, kaha navulumuna mulonga waunene.

Muchishishisa chakukumbulula chihula vamuhulishile, Yesu avalwezele hatoma omu vapwile nakuhokola Jishimbi jaKalunga. “Nayenu nawa ikaze mweji kuzombokelanga jishimbi jaKalunga mwomwo yavisemwa vyenu? Chakutalilaho, Kalunga ambile ngwenyi, ‘Vumbikenunga masenu namanenu,’ kaha nawa ngwenyi, ‘Ou mwasaula ise chipwe naye vamujihe.’ Oloze enu mweji kwambanga ngwenu, ‘Weshowo mwamba kuli ise chipwe kuli naye ngwenyi: “Cheshocho nguli nacho chize chatela kachi kukunganyalisa, chinapu wana wakuhana Kalunga,” katela kuvumbika ise numba chachindendeko.’”—Mateu 15:3-6; Kulovoka 20:12; 21:17.

VaFwaliseu vahanjikilenga ngwavo jimbongo, vikumba chipwe kala vyuma vize vahanyinenga wana kuli Kalunga vyatelele kupwa vyakutembele, ngocho kavatelelele kuvizachisa kumulimo wekako, okunyi vyuma kana hanga vanavilamina kuli vatu. Chakutalilaho, mwana nahase kwamba ngwenyi jimbongo chipwe vikumba vyenyi vinapu “kolovane,” kulumbununa wana wakuhana Kalunga chipwe kutembele, kwijiva nge tembele yinasake wana kana. Ngocho ou mwana mwamba ngwenyi jimbongo chipwe vikumba kana keshi kuhasa kuvihana visemi jenyi vatushinakaji vaze vanakalizako, okunyi vyuma kana vichili mumavoko enyi. Shikaho mwana kana nakane mulimo wakuzakama visemi jenyi.—Mako 7:11.

Yesu apihililile chikuma havishinganyeka kanevi vyakuhingika Jishimbi jaKalunga. Ngocho ambile ngwenyi: “Munazeyesa mazu aKalunga mwomwo yavisemwa vyenu. Enu vaka-kulyonga, Isaya apolofwetele kanawa vyayenu hakwamba ngwenyi: ‘Vatu kana ava veji kunguvumbikanga kaha namivumbo yavo, oloze michima yavo yili kwakusuku nayami. Kulemesa veji kungulemesanga cheji kuyanga mwamokomoko, mwomwo veji kunangulanga jishimbi javatu kupwa nge himazu aKalunga.’” VaFwaliseu kavahanjikile chuma nachimweko hamazu avalwezele Yesu. Ngocho asanyikile liyongomena lipandame kwakamwihi. Avambile ngwenyi: “Ivwililenu nakumona munalumbunukila ano mazu: Chuma nachingila mukanwa kamutu keshi chikiko nachimujilululako, oloze chuma chize nachilovoka mukanwa kamutu chikiko nachimujilulula.”—Mateu 15:6-11; Isaya 29:13.

Kufumaho, omu vapwile muzuvo, tumbaji vahulishile Yesu ngwavo: “Uno unatachikiza ngwove vaFwaliseu vahukananga hamazu ove wahanjikanga nyi?” Akumbulwile ngwenyi: “Weshowo mutondo vazenekele kutumba kuli Tata wamwilu navakautukula. Vechenu. Vanapu vatwamina vatupuputa. Kachi nge kapuputa mwatwaminyina mukwavo kapuputa, kaha vosena vavali navaholokela muwina.”—Mateu 15:12-14.

Chasoloka nge Yesu alikomokelele omu Petulu emanyinyineko vakwavo tumbaji hakumuhulisa alumbunune havyuma vyeji kujilululanga mutu. Yesu akumbulwile ngwenyi: “Uno kamwejiva ngwenu cheshocho cheji kwingilanga mukanwa cheji kuhitanga mujimo, kaha hinachiya muchimbushuko tahi? Oloze  vyuma vyeji kulovokanga mukanwa vyeji kufumanga mumuchima, kaha vyuma kana vikiko vyeji kujilululanga mutu. Chakutalilaho, mumuchima mukiko mweji kufumanga vishinganyeka vyavipi, nakujiha vatu, namakoji, namaujila, nawiji, naunjiho wamakuli, nakusaula vyuma vyajila. Evi vikiko vyuma vyeji kujilululanga mutu, oloze kulya chakuzeneka kusana kumavoko kacheshi kujilulula mutuko.”—Mateu 15:17-20.

Yesu kapwile nakukanyisa mutu kupwa naunyojiko, chipwe kuhamika ngwenyi mutu katela kusana kumavoko nge ali nakusaka kuwahisa vyakulya chipwe ali nakusaka kulyako. Oloze apwile nakupayisa vatwamina vamukwitava vaze vahokwelenga jishimbi jaKalunga jakwoloka nakukakachila kuvisemwa vyavatu. Chikupu vene, vilinga vyakuhuka vize vyeji kufumanga mumuchima vikiko vyeji kujilululanga mutu.