Ka sawo mar Pasaka ma higa mar 32 chiegni, Yesu odich gi puonjo ji e alwora mar Galili. Kae to nenore ni obiro wuok mondo odhi Jerusalem e sawo mar Pasaka mana kaka Chik Nyasaye dwaro. Kata kamano, odhi ling’ling’ nikech Jo-Yahudi dwaro nege. (Johana 7:1) Bang’ sawono oduogo Galili.

Nyalo bedo ni Yesu ni Kapernaum sama Jo-Farisai kod jondiko biro ire ka gia Jerusalem. Ang’o momiyo gibiro ire? Gimanyo weche motudore gi chike din ma ginyalo donjonego Yesu. Gipenje niya: “Ang’o momiyo jopuonjreni ketho timbe kod chike mag joma chon? Kuom ranyisi, ok gilog ka gidwaro chiemo.” (Mathayo 15:2) Nyasaye ne ok ochiko joge ni gimakre gi tim mar ‘logo nyaka e okumbo.’ (Mariko 7:3) To e ma pod Jo-Farisai neno ni ng’at ma ok tim kamano nigi ketho maduong’ ahinya.

Kar miyogi dwoko ma achiel kachiel, Yesu nyisogi kaka giketho Chik Nyasaye goyiem. Openjogi kama: “To ang’o momiyo un bende uketho chik Nyasaye nikech timbeu kod chikeu? Kuom ranyisi, Nyasaye nowacho ni, ‘Mi wuoru gi meru luor,’ kendo ni, ‘Ng’at ma wuoyo gi wuon mare kata gi min mare e yor achaya to mondo onege.’ To un uwacho ni, ‘Ng’at mowacho ne wuon mare kata ne min mare ni: “Gimoro amora ma an-go ma anyalo konyigo en mich mowal ne Nyasaye,” jalo ok onego omi wuon mare luor ngang’.’”​—Mathayo 15:3-6; Wuok 20:12; 21:17.

Jo-Farisai wacho ni pesa, mwandu, kata gimoro amora mowal kaka mich ne Nyasaye en gir hekalu, omiyo ok nyal ti kode e yo moro machielo. Kata kamano, adier en ni ng’atno e ma pod dong’ga gi mwandu mowalno. Kuom ranyisi, wuod ng’ato nyalo wacho ni pesane kata mwandune en “korban,” tiende ni mich mowal ne Nyasaye kata ne hekalu. Wuowino nyalo wacho kamano ka gima koro hekalu e ma onego omi michno mokwongo. Omiyo, kata obedo ni pesa kata mwandu gin mag wuowino kendo pod onyalo tiyo kodgi, owacho ni ok onyal tiyo kodgi e konyo jonyuolne ma hikgi oniang’ kata mochando. Kuom timo kamano, wuowino jwang’o ting’ ma en-go mar rito jonyuolne.​—Mariko 7:11.

Omiyo, en gima kare ni Yesu ok mor kod timgi mar gwenyo Chik Nyasaye. Owachonegi kama: “Usetimo wach Nyasaye odoko kayiem nono nikech timbeu kod chikeu. Un joma wuondore, Isaya ne ni kare ka nokoro kuomu niya: ‘Jogi miya luor mana gi dhogi to chunygi bor ahinya koda. Gilama kayiem nono nikech gipuonjo chike dhano ka gima gin chike Nyasaye.’” Jo-Farisai dong’ ka dhogi omoko, kendo ok ginyal dwoko Yesu. Omiyo, Yesu luongo oganda mondo osud machiegni. Owachonegi niya: “Chikuru itu mondo wach odonjnu: Gima donjo e dho dhano ok e ma miye obed ma ok ler, to gino ma wuok e dhoge e ma miyo obedo ma ok ler.”​—Mathayo 15:6-11; Isaiah 29:13.

Bang’e, sama Yesu ni e ot moro, jopuonjrene penje kama: “Be ing’eyo ni Jo-Farisai a ochwanyore bang’ winjo gima nende iwacho?” Odwokogi niya: “Yath moro amora ma Wuora manie polo ok nopidho, ibiro pudh. Wegiuru gibed kamano. Gin gitayo jomamoko, to gin giwegi gin muofni. Ka muofu tayo muofu wadgi, giduto gibiro lwar e bur.”​—Mathayo 15:12-14.

Nenore ni Yesu wuoro sama Petro penjo e lo jopuonjre mamoko ni mondo olernegi wach gima miyo ng’ato bedo ma ok ler. Yesu dwokogi kama: ‘Ok ung’eyo ni gimoro amora ma donjo e dho dhano kalo e iye kae to igole e cho? Kata  kamano, gimoro amora ma wuok e dho dhano a e chunye kendo gigo miyo dhano bedo ma ok ler. Kuom ranyisi, e i chuny e ma paro maricho kaka nek, gi chode, gi terruok, gi kuo, gi chiwo neno mag miriambo, kod ayany wuokie. Mago e gik ma miyo dhano bedo ma ok ler, to ka ng’ato ochiemo ma ok ologo, mano ok mi obed ma ok ler.’​—Mathayo 15:17-20.

Wechego ok nyis ni Yesu wacho ni ji ok onego orit ler mar del, kata ni ji ok onego olog ka pok gitedo kata chako chiemo. Kar mano, Yesu kwedo timbe mag wuondruok ma jotend din nigo mar luwo timbe kod chike mag joma chon, ka gitemo gwenyo chike makare mag Nyasaye. Adiera en ni timbe maricho ma wuok e chuny e gik ma miyo ng’ato bedo ma ok ler.